ع الهوى

١٨

شكرا لكل اللي صوت وانطاني تعليقات ايجابية
واللي دينتظر على نار
احبكم

#ع_الهوى١٨
Shahd Alsalman
ايسر ما اجة سالت علي كالولي ماخذ اجازة كم يوم ومحد يعرف ليش وادكلة يطلع مغلق
ورة يومين او تلاثة بعد ما خلصت برنامج فتحت جهازي ولكيت رسالة من ايسر ملحكت اقراها لان دك علية راسا وشلتة بلهفة
- الو ايسر وينك يمعود
- هلو فريد شلونك
تكدر تجيني
- وين انت !؟
- تعال برة الاذاعة واكف
- ومتفوت !!
- فريد ما عندي وكت اطلع بسرعة
- اوكي جايك
قلقني كلش وطلعتلة بسرعة اريد افتهم شبي لكيتة كاعد بالسيارة ايدة ع الباب وساند وجهة على كفة
صعدت سلمت علي وبسرعة سالتة
- شبيك ايسر واكع بمصيبة انت ؟!
- اسمعني فريد
انت اخوية واني بصراحة ما اكدر اكثر اضم ولا اخفي عنك تعبت العب هالدور
- شكو !؟
- تتذكر من رحت سالت على ابوك
- اي
- كتلك هو موجود بس مسافر
- صحيح
- اني جذبت عليك هو موجود وممسافر
- ليش سويت هيج شنو الغاية يعني !؟
- هذا هو صورتة شوفة
شوفني صورتة بية شبه منة كلش جبير بس الفرق بالعمر بيناتنا
- اوكي وبعدين ممكن اعرف السبب
- ابوك متخصص بامراض السرطان الحميدة والخبيثة وبروفيسور يعني دكتور شاطر كلش
- زين !
- وهو نفسة دكتور ...
انتظرتة يكمل بس سكت وحبس انفاسة
- احجي يمعود شنو هالعذاب ؟؟؟
- هو دكتور در
- شنو دكتور در !؟
- يعني دكتورها وديعالجها ومعرفت هو ابوك الا لمن كتلي
من رحت للشمال جنت رايح علمود در اشوفها وهناك اكتشفت انه دكتور عامر هو نفسة والدك مجنت منتبه لاسمة الكامل ومن قريتة تاكدت واصلا جنت هواية اشبهة عليك
- يا اشبهة عليك ! يا دكتور !
احجيلي در شبيها ؟؟؟؟
- على كيفك
در مريضة ..
مريضة بالسرطان
- در !!!
ايسر يحجي وانفاسي بدت تتكطع وتنخلط وياها شهكات البجي صرخت صرخة باسمها خلتني افقد السيطرة على نفسي واني اضرب بيدي على راسي وصدري لزم ايسر ايدي
- الزم اعصابك واهدى شوية واسمعني للاخير
در بعد كم يوم عمليتها العلاج الكيمياوي مفاد وياها
واذا مات...
وغص ايسر بالبجي مكدر يكمل الكلمة ورجع يحجي
- مراح اسامح نفسي اذا انت مو يمها واني اعرف بكل شي واعرف بحبك الها
- وديني عليها بسرعة
- حوديك بس اوعدني تبقى قوي كدامها
- قوي !
يا قوة بعد ويا حيل ويا صبر يتحملون اللي ديصير وياية
- لخاطرها هي بحاجتك
- اني اللي بحاجتها ايسر الله يخليك وديني عليها
- هسة راح احرك ونروح ان شاء الله واوديك البيت جيب جنطتك
-ما اريد شي اطلع كبل بسرعة
- ماشي
- يا رب ساعدني
الطريق كلة مرة ابجي مرة اصفن مرة اسكت مرة اظل اون والوم بنفسي ومرة الوم ايسر لان ما كالي شي من الاول
هديت بعد ساعات من كثرة المشاعر والصدمة الحسيت بيها
- ايسر شلون ؟؟
وشوكت صار بيها المرض !؟
- الوكت العرفت بي هي مريضة من خابرتني مرة وسالتني عنها وكتلي اكو يمك هوسة تتذكر جنت انت بالمستشفى يم الحجية الله يرحمها
- اي وسالتها ثاني يوم كالتلي انت متعارك ويا المدير
- صح بيومها اجتي للشغل وظلت تشتغل وتتعب وتروح وتجي وكفنا يم باب الغرفة دنحجي واشوفها ورقة مدري مال شنو مشفتها الا مالت علية ووكعت ردت اصحيها بس شفت وجهها كلش اصفر اخذتها للمستشفى وانت بوقتها دكيت فمردت اكلك شي واخوفك وانت اصلا جنت ملتهي
- وشلون عرفت !؟
- ورة مسديتة منك اجة الدكتور وكال صحت المريضة والله يتولاها برحمتة مفتهمت لزمتة من ياختة وسالتة شيقصد كالي هي مريضة سرطان كتلة شلون عرفت كال من ردت اسويلها تحاليل كالتلي اني مريضة و هالشي عادي يصير وياية
واول مفتت عليها الغرفة طلبت مني ما اجيبلك سيرة و كالتلي اني ممتاكدة هيج مجرد شك بالمرض بس جانت تجذب حتى تقنعني ما اكلك
- يعني انت من جيت للمستشفى جنت ...
- اي اعرف واجيت اخذها لان اي عدوى من المستشفى ممكن تضعف مناعتها ومو زين عليها من اجيت جنت خايف عليها
وهي خافت لا من ازعل اجي واكلك
- يعني حتى اتصالاتكم جانت لهذا السبب ؟؟
- اي وسبب ثاني
- شنو هو ؟
- جنت اتصل بيها حتى ارتب انه تعيش يم عمتي بالشمال فترة العلاج وهي عمتي اللي دلتني على المستشفى والدكتور كالتلي صديقتها عالجت عندة ومجربي خوش طبيب ورحبت بيهم لان هي وحدانية وتحب تساعد الناس
- وجانت حاضنتك وتبجي لهذا السبب
- جانت تحس حتفاركك ولان كالتلي اني مريضة من فترة وبيوم عيد ميلادها درت بنتيجة التحاليل وهذا السبب اللي خلاها ترفضك هي حجتلي كل شي وكالت انت تحبها ولوما تريدك تبعد وتنساها وتكرهك متحاول تشوفك شخصية غريبة عنها وتصرفات تخليك تشك بيها
- جنت كل يوم اشوفها تذبل واني عبالي من ضغط الشغل
- لا مو منة جانت هواية تفقد وعيها وهواية تتوجع ومرات اقفل الباب عليها واخليها تنام ترتاح يعني هي عانت ذيج الفترة هواية
- ليش سوت كل هذا !؟
- در متقبل توجع كلبك ومخلتني لا اني ولا اهلها نبين شي كدامك بقت على امل تتعالج او يكون السرطان بيها بنسبة خفيفة ..