ع الهوى

١٧

وعدتكم اليوم انشرلكم ٣ اجزاء
وباجر ان شاء الله نكمل
شكرا جزيلا على تفاعلكم وتعليقاتكم
تصبحون على الف خير يا رب

#ع_الهوى١٧
Shahd Alsalman
رجع ايسر من سفرتة للشمال وانتظر منة اخبار علمود ابوية
اول مفات سلم وانطاني صوغة السفرية على كولتة
شافني كاعد واترقب يحجي
- فريد
- نعم
- بخصوص اسم والدك
-عرفت مكانة ؟؟
- اي
فعلا موجود ورحت للمستشفى بس كالولي انه سافر لمدة ٣ سنوات يكمل ابحاث ودراسات هناك واصلا من زمان مسافر يعني مو هالايام
-صدك !؟
زين مكدرت تعرف وين سافر ؟
- لا بس كالولي بالمانيا طلبت يحددولي وين كالو ما عدهم معلومة
او بالاحرى مرادو ينطون تفاصيل اكثر
- اها شكرا ايسوري تعبتك
- لا بالعكس
حتدور علي ؟
- بصراحة ايسر والحجي بيناتنا
اني ما اريد ؛ بس لان امي وصتني
وهسة عرفت بي موجود ومسافر ومراح اتعنى حتى احصل فيزا واروحلة اذا رجع الله كريم عود
- تمام
بلشنا نحجي بالشغل وتحضرنا حتى نسوي حلقة جديدة وتفاجئنا برسالة من سارة المذيعة الجديدة انه هي متكدر تجي وبلغت المدير بهذا الشي
وطبعا لازم نستبدلها بغير وحدة وهذا الشي زعجني كلش لان هي ما عدها اي مسؤولية تجاه شغلها عصبت وحجيت وحتى اتجاوزت بالكلام
بس المدير حاول يهديني وكالي الحق وياك والمشكلة الاكبر كل المذيعات كومبليت يعني ما عدهم مجال حتى يسوون البرنامج وياية
طلعت برة اشم هوا لان اذا ابقى وياهم راح اكسر الاذاعة من عصبيتي ومباقي غير نص ساعة على موعد البث والتسجيل
لحكني ايسر وكالي خلي نسوي اني وياك هالمرة
مفتهمت شنو قصدة بعدين كالي اكثر من مرة ردناك تصير مذيع بدل اعداد البرامج بسبب نبرة صوتك حنينة وجذابة ضحكت علي وهو يمثل الحركة
بس للحظة تذكرت شلون جانت در تتمنى هالشي وتكلي اريد نسوي برنامج سوية ونقدمة احنا الاثنين ومجنت اقبل
دمعت عيوني ووافقت على حجاية ايسر ما عندي غير حل  وفعلا سوينا البرنامج اني كمذيع ومعد وايسر المخرج حتى ننقذ الموقف اللي حطتنا بي سارة ...
" اول كلمة احبك " ...
جان هذا عنوان الحلقة اول كلمة احبك كلتها او سمعتها وشنو جان الاحساس وقتها
كل الحلقة ذكرتني ب در وخاصة اخر مرة دموعها وكلمة احبك منها حسيت نفسي دا احترك  والمأساة تجددت علية بالكوة خلصتها
و طلعت من الاذاعة
رحت على الشط بجيت بكل قوتي على كل شي اشتاقيت حيل وحنيت حيل وبعد ما اكدر اصبر اكثر على هالبعد
رجعت للبيت وطلعت صورنا سوية من جنا صغار لحد مكبرنا وصار هذا حالي كل يوم عبالك رجعت لنقطة الصفر احس نيران شاعلة بكلبي ...
قررت اموت نفسي بالشغل اتعب اتعب اتعب حتى ارجع انام وما اكعد على شي غير الشغل لا تفكير لا وحدة لا اشتياق لا حنين ماكو ما اريد احس بشي اريد تخلص كل الايام وبس ..
صار وقت حلقتنا وكاعدين اني وايسر وطلعنا فاصل تونا
دك تلفون على ايسر ارتبك وبسرعة طلع واشرلي اكمل ويا سارة
رجع وعيونة مغوركة بالدمع ووجهة ميتفسر سالتة شصاير اشرلي براسة ماكو شي
باقي ساعة ونص ونختم الحلقة وخلال هالساعة ونص يمكن فوك السبع مرات يطلع يخابر او يجي اتصال و يرجع يكمل او اني اكمل وياها
سوة حركة لسارة بمعنى استعجلي حتى تختم بسرعة هالحلقة
وفعلا بسرعة ختمت وشغل اغنية وطلع ركض من الاذاعة لحكتة اسألة شصاير وياه ما جاوبني وعافني ..
ركب سيارتة وراح اتصل علي ميرد عفتة ورجعت لشغلي بس بالي كلش يمة واجة المدير ديشوف شلونة وكدرت اغطي غيابة لان اذا عرف بي طالع بدون ميكلة حيتعارك وياه وهو اصلا مديداوم هواية و عدى هاليوم وخلص بس بصعوبة
اتصلت بي اكثر من مرة بس ميجاوبني ودزيتلة رسايل من تفرغ اتصل علية ضروري كلش ظل بالي يمك
نمت ورة مخلصت اعداد حلقة حتى اتعب وانام بسرعة بلا ما اتكلب بالفراش ..
بالليل كمت احلم احلام مزعجة وشغلات مخيفة كلش در ، امي ، اني
كلها كوابيس اكعد وانام وارجع اكعد مخنوك وحالتي حالة
كمت صليت الفجر وقريت قران شوية ارتاحيت بس كلبي احسة معصور حيل ومقبوض حاس اكو مصيبة او شي مو زين حيصير ..
صار الصبح و رحت لشغلي اول ما فتت للاذاعة خالين بالباب قطعة نعوة سودة ردت اوكع من طولي لان بالليل حلمت بامي رجعت ماتت بس من دا اعلك القطعة مالتها قريت اسم در بيها بحيث كد ما حسيتة حقيقة كعدت اشهك بالبجي
قريت الاسم لكيتة ابو انور اللي يشتغل حارس بالاذاعة بسبب الجلطة الدماغية توفى
انقهرت علي لان بعدة مو كلش جبير بالعمر بس انا لله وانا اليه راجعون قريتلة فاتحة وكلت الله يستر من هذا اليوم من اولة فزة وخرعة وموت
طبيت للاذاعة وتوجهت لغرفتي حتى ابلش شغل ..