#مسارات_حياتنا_ستتغير
الحلقة 5
ملاك : خشيت رقدت بدري في عز نومي كل شي مر قدامي ضحكنا وبصارتنا والحادث كل تفاصيل عشتها من جديد بنفس الوجع معش حسيت بشي الا بعياط امي ومريم فتحت عيوني لقيت الحاج وامي ومريم وايناس جنبي .......شن في
الحاج : انتي كويسه توا يابابا
ملاك : اها شن في راسي صداع امي كنك تبكي ....نضت قعمزت
مني : يانعلياا ياامي خوفتيني عليك شن تحلمي وشن في
مريم : ملوكه كنك
ملاك : ياريتني ماعطيته يسوق ياريت ماجريت انا سبب كل شي كان هضا مراد معانا انا سبب موته مستحيل نسامح روحي
الحاج : استغفري ربك يابابا هضا حد عمره وهضا يومه انتي مش سبب حرام عليك تحكي هك اتعبي روحك وشوفي امك وخياتك كيف منفجعات عليك
ملاك : انا تعبااانه مستحيل ننسى انا تعبانه مرات مااات وخذاني معه
مني : الله غالب ياامي ماعندك غير الصبر ادعي ربي يصبرك
مريم : خلاص لوكه صبي توضي وصلي الفجر قريب توا تتريحي صبي سلم خيتي
ايناس : صبي غيري دبشك تقطري امياه صبي هيا
ملاك : مستحت ادموعي وصبيت بدون مانحكي خشيت دوشت وايناس مدتلي دبشي لبس وطلعت طول قعمزت علي السرير نسمع في الفجر ياذن نضت طلعت من الدار شور وسط الحوش سمعت الحاج وامي يحكوا وجتني مريومه
مريم : شن لوكه توا
ملاك : الحمدلله
مريم : تبي شي
ملاك : تعالي ......سحبتها من يدها وعديت شور امي والحاج ......باتي تصلي بينا الفجر
الحاج : ياعيون باتك اكيد ياباتي تعالن هيا
مريم : انا وملوكه بس نوسه خليتها تصلي جوا
الحاج : هيا ومعانا امكن هيا يامني
مني : هيا
مريم : توا نجيب لبست الصلاة
ملاك : انا جبت بتاعي
مريم : تمام هي
مني : هيا تعالي ملوكه
ملاك : عدينا للمربوعة وصلينا الفجر مع بعضنا وتريحت واجد بعد الصلاة وطول خشيت رقدت انا ومريومه في داري ونضت الصباح علي صوت مريومه
مريم : لوكه نوضي عندك جامعة بدري او شن
ملاك : ﻻﻻ عدي انتي توا نشوف حد يشيلني عشان نعدو عشيه للسوق
مريم : خلاص معناها نعدي انا عشان طولت هيا سلام
ملاك : تم .....كملت باقي نومي نضت ساعة 9 علي المنبه صبيت خشيت الحمام وطلعت غيرت دبشي لبست سروال امريكي وبلوزه لعن فوق الركبه سماوية رفعت شعري كعكه وخذيت شنطتي وشتات ونظارات ونقال وطلعت لقيت امي وايناس يفطرن ....صباح الخير
