#مسارات_حياتنا_ستتغير
الحلقة 8
ملاك : من عز نومي نضت مضايقه بكل خذيت نقالي وطلعت برا الاستراحة كانت نسمة الهواء سمحه والمزراعة هادية كلها نوووم كنت لبسه توته سروال واسع وبدي ربع وفوقه جاكه غطيت راسي بالطربوش الجاكه وقعدت نمشي تباعدت عن الاستراحة قعمزت تحت شجرة وفتحت نقالي قعدت نتفرج علي صور مراد صورة نضحك من موقف اللي صار فيها وصورة نضحك من اهبالنا ولقطته له هو راقد وشريط حياتنا قعد يمر قدامي لعند انهرت نبكي ....مرااادي وينك يانبض قلبي رايفت عليك ياغالي وين سيبتني انا اللي سببت في خسارتك ليا ياريتك معايا ياريتك جنبي انت الوحيد اللي كنت تفهمني وتعرف شن نحس مش بس شن نفكر انا تعبانه تعبااانه ....فجاة
وسيم : كنت مروح من الشباب اصحاب عندهم توكه روحت ساعة 4 الليل وانا بنخش للحوش لمحت حد ماشي شور الشجر لحقته قعمز تحت الشجرة ويربش في نقال قربت وصلت قريب من شجرة سمعت صوت بكاء سامعه من قبل عرفتها هيا وواضح كانت مضايقه وكانت تحكي لمراد خوها حسيتها بحاجة لحد يخفف عنها قرارت نجيها قدمت منها .....ملوكه
ملاك : نطيت بسرعة نفجعت ....من من
وسيم : ماتخافش وسيم انا .....قربت جنبها
ملاك : فجعتني شن ادير هنا
وسيم : الحق شفتك من بعيد نحسابك حد زاقب في المزراعة
ملاك : اهاا اسفه مش قصدي
وسيم : عادي ياهبله ممكن نقعمز معك
ملاك : اهاا اكيد ....قعدت نمسح في عيوني
وسيم : قعمزت ....تتفرجي علي شن
ملاك : مديتله نقال
وسيم : خذيته وشفته لقيتها صورة مراد قعدت نمشي ونتفرج .....الله يرحمه
ملاك : امين
وسيم : رايفتي عليه اكيد
ملاك : بكككل
وسيم : ليش مضايقه وتبكي كنتي
ملاك : تعبانه بدون مراد
وسيم : الله غالب هذي الدنيا وفاهم شعورك والله
ملاك : مستحيل تفهمني اصلا مافي حد فهمني حتي اهلي ماقدروش يفهموني يااللي عارفين علاقتي بمراد تصدق
وسيم : شن احكي
ملاك : كنت نحس بمراد بمجرد مايضايق كان يمرض طول نمرض كان يخبط نحس بوخزه في مكان الم بتاعه
وسيم : سبحان الله تؤوم بتاعك هو
ملاك : اها
وسيم : موته كانت مفجاة لنا كلنا
ملاك : ااااه انا سبب كل شي
وسيم : كيف هو مات في حادث اللي نعرفه
