نقطـة تحول 🌹
الحلقـة │ 21 │🍃
هـي لآيك قبـل مـا نقــرو 💞
.
.
.
.
فآت الوقت ،، و مع العشية سليم كان مقعمز لوطآ في الصالون و شوية ويسمع صوت الشريانة متع الباب // استغرب وشاف وراه لقي بَسنت مغيرة ملابسها ولابسة لبسة طلعة و نازلة من الدروج ..
سليم : علي خيير ! ؟ :/
بسنت : شنو ؟
سليم : وين ماشية ؟
بسنت : مش ماشية ل مكآن ،، مرت عمي وفلك جو
سليم " نآض " : خيرك ما قلتيش ؟
بسنت : نسيت 🌚
سليم : صار نسيتي " ومشي ل البآب وفتحه "
ع ماجدة : ولدي كيف حآلك
فلك : صبآحيةة مباركة 😍 مع أنها جت متأخرة 😂
سليم : الحمدُ لله / تفضلو خشو
" خشت ع ماجدة و وراها فلك // وسليم خبط فلك علي راسها "
فلك " حطت يدها مكان الخبطة " : أمتي بتبطلها الحركة هادي -.-
سليم " ضحك " : خشي
" سلمت ع ماجدة علي بسنت / بعدين فلك " ..
فلك : صباحية مباركةة بيساا 😍 / إستاحشتك ❤
بسنت " سلمت علاها " : حتي أني
ع ماجدة : قلنا نجوكم أحني ما فيش داعي تجو أنتم أكيد تعبانين ومنه نشوفو الحوش
بسنت : مرحبتين بيكم مرت عمي
ع ماجدة : معاش تقولي مرت عمي توا قوليلي عميمة
بسنت : حاضر عميمة 😅
فلك : ههههههههه
بسنت : بيلسان ما جتش معاكم ؟!
فلك : البارح روحت مع خالتك حواء توا يجو يجيبوها
سليم : صار مزال فيه من جاي
بَسنت : أها 😌
سليم : طالع أني 😒
ع ماجدة : خليك وليدي علاش طالع
سليم " خدي فُونه ومفاتيحه " : لا عادي خودو رآحتكم
طلع سليم ل الجنان // و فلك وبسنت و ع ماجدة خشو ل دار الضيوف ،، خلتهم بسنت مقعمزين وخشت ل المطبخ حطت سفرة فيها كاسات عصير و مترد شكلاتة و ضيفتهم ✨ // قعدو يهدرزو علي حوسة أمس شوية وشن دارو الصبح ف الفيلا ..
ع ماجدة : بنخش ل المطبخ أني خ نطيبو عشي
بسنت : مافيش داعي خالتي توا ندير اني
ع ماجدة : لالا نديره أني مش هَ يطلع زي تطيبي
بسنت : أوك كيف ما تبي 😅 / عارفة مكانه المطبخ عميمة ؟
ع ماجدة : إي ريته خليك مقعمزة
مشت ع ماجدة ل المطبخ // و فلك و بسنت قعدو مقعمزينْ ..
فلك : تحملاها ماما معليشي غايرة على سليم 😂
بَسنت : لالا عادي ولا يهمك
فلك : جهاد وراني صوره الحوش بس طلع ف الواقع أحلى ب هلبا // ذوقه طلع حلو سليم ههههههه
بسنت " ابتسمت " : كان تبي ننوضو و شوفيه كله !
فلك : تمام هي
ناضو فلك وبَسنتْ ، طلعو من دار الضيوف و خشو ل الصالة اللي فاتحة ع المطبخ // قعدت فلك واقفة وتتفرج و بسنت مشت ل ع ماجدة تساعد فيها وتعاون فيها واطلعلها كان تبي حاجة مع أنها قاعدة ما تعرفاش مزبوط المطبخ ،، بعدها قالتلها ع ماجدة بري قعمزي بحدا فلك 🙊 // طلعت بسنت من المطبخ مستغربة و قعدت تلود هيآ وفلك ف الحوش ويهدرزو ..
فلك : أها اليوم بعد الغدي روحو خالتي و سهى بعدين شروق
بسنت : أكيد تعبتو هلبا صح
فلك : لالا بالعكس مع أنه أول عرس ف العيلة بس الحَمدُ لله جي منظم و فات علي خير وجيي يههبل 💕
بسنت : عقبآل عرسك فلوكتي
فلك : إن شآء الله بعد عمر طويل 😂 / خ نكمل قراية قبل
اللي يسمع توا يحساب العرسان مسطفين قدام باب حوشنا 😂
بسنت : بالعكس ألف واحد يتمناك // بعدين أكيد فيه هكِ معجب سري ولا حاجةة 😂
فلك " سرحت ومبتسمة "
بسنت : وين مشيتي ؟! شكلهه كلامي صح 😂
فلك : تي لالا // زي ما قتلك قرايتي قبل 😅
بسنت : حتي أني هكي كان طموحي بس عمي دار هكي صار اللي صار 💔 // لكن بأذن الله هَ نكمل ومش ه تأتر حياتي الخاصة علي قرايتي
فلك : إن شآء الله حبيبتي / وأحسن شيء انه سليم مش من النوعية اللي يربط الشخص بيه يعني ه يهتم انك تكملي قرايتك و مش ه يأتر عليك هههه
بسنت " ابتسمت / بعدين قالت " : حق عمي قعد ف الفيلا // المفروض احني جينا وسلمنا عليه
فلك : لا تقريبا هوا ه يجي ف الليل عادي
بسنت : بس عيب احني المفروض جينا
فلك : عادي بالعكس أهم شيء تكونو مرتاحين
بسنت " ابتسمت / بعدين قالت " :
خلينا مرت عمي لوطا بروحها خ ننزل نعاونهآ
فلك : أول شيء مش ه تخليك تمسي شي معاها تحب تدير بروحها // تاني شيء قالتلك قوليلي عميمة توا 😂
بسنت : حاضر هي ننزلو 😂
