The Alexandros Series: MY HEART REMEMBERS (REVAMPED VERSION)

CHAPTER 008 - Face to Face with The Alexandros

"HI, LUNA. IS THIS SEAT TAKEN?"

Napasinghap si Luna nang sa pag-angat niya ng tingin ay makita si Stefan na nakatayo sa harapan, bitbit ang tray ng pagkain na ni-order nito sa counter ng cafeteria.

Sandali siyang natulala. Ngayon lang niya ito nakitang pumunta sa canteen para mag-lunch. Kadalasan ay may baon itong take-out food mula sa mga restaurants o fast food chains sa bayan at sa classroom lang o sa rooftop ng High School Department building kumakain kasama si Paul.

Ito ang unang beses na nakita niya ito sa loob ng cafeteria simula nang mag-umpisa ang klase.

Natauhan siya nang maramdaman ang bahagyang pagsipa ni Kaki sa paa niya sa ilalim ng mesa. Nakalimutan niyang kasama niya ang mga kaibigan at nakikita ng mga ito ang reaksyon niya sa harap ni Stefan.

Her face flushed in embarrassment.

She cleared her throat and forced a smile. "No, you can have this seat if... y-you want." Oh dear, bakit ako nauutal?

Kahit sina Dani at Kaki na nakaupo sa tabi niya ay hindi rin makapaniwala sa paglapit sa kanila ni Stefan. Sa loob ng dalawang buwan simula nang mag-umpisa ang klase ay hindi nila ito nakitang naki-halubilo sa iba maliban kay Paul.

Pigil hininga siya nang maupo na si Stefan sa harap niya at ipinatong sa table ang tray nitong may pagkain at bottled water.

Ang bawat mesa sa cafeteria ay sakto para sa anim na estudyente. Ang mesang kinaroroonan nila ay okupado nilang tatlong magkakaibigan, at magkakatabi sila. Tatlong upuan ang bakante sa kanilang harapan, and Stefan chose to sit in front of her, making her heart stumble in panic.

"How do you like the food here?"

Lalo siyang namangha nang mag-umpisa itong magsalita. Inasahan niyang tahimik lang itong kakainin, pero ano'ng gulat niya nang kausapin siya nito.

"M-Masarap naman at... lasang malinis."

Napatingin ito sa pagkaing nasa food tray niya. Wala pa halos bawas ang kanin na kasama sa meal number six na ni-order niya. The meal number six included a serve of sweet and sour fish and sautéed carrots and corn.

"Kauumpisa mo lang din ba?' tanong pa ni Stefan.

Tumango siya. "Yeah, m-mahaba ang pila kanina." Kunwari ay inilibot niya ang tingin sa paligid. "Hindi mo... kasama si Paul?"

"Nah, he went home. May emergency sila sa bahay nila at hindi siya papasok ngayong hapon." Napatingin ito kina Dani at Kaki na naka-mata rin dito habang patuloy sa pagsubo. "Karina and Danilo, right?"

Si Dani ay napa-ubo nang marinig ang kompletong pangalan, samantalang si Kaki ay pigil na natawa.

"I hope you don't mind me sitting here with you guys?"

Pairap na inabot ni Dani ang bottled water nito sa tray, habang si Kaki naman ay kibit-balikat lang ang ini-sagot.

Umusal ng pasasalamat si Stefan bago nag-umpisang kumain. He ordered chicken alfredo and a slice of cheesecake.

Niyuko din niya ang pagkain at nilaru-laro. Ganitong kaharap niya si Stefan ay hindi niya alam kung papaaano a-akto nang tama. Naka-ilang tikhim siya, at naka-ilang sipa na rin si Kaki sa paa niya upang gisingin siya sa pagkakatulala sa harap ni Stefan.

Hanggang sa si Dani ay hindi napigilang magtanong, "Ngayon ka lang yata namin nakitang kumain dito sa cafeteria, Stefan?"

Bahagya lang nitong sinulyapan si Dani. "My sister usually prepares my food, but she was sick this morning so... here I am."