فينك أراجلي لعزيز؟؟(بالدارجة المغربية)

2

#فاتي
نزلنا تانشوفو ضاهرة الافتراس الطبيعية كيدايرة حاطين فالصالون جوج طبالي كبار وحدة للناس لكبار ووحدة للبراهش  دايرين طبسيل كبيير حطوه للبراهش فيه المرقة تاع بطاطا و خيزو و الزيتون و دجاجة ضارو بيها الدراري كولشي كاياكول بهمجية حيت فيهوم الجوع و المخاطفة على اللحم و النتيف و البكا و الضحك
فيروز:عاوتاني كايتخاطفو
فاتي: اودييي شوفي خوك اش كايدير لدكرى
فيروز:اويلي علاه مافراسك كايبغيها
فاتي:داخلنا عليك بالله
فيروز:اه سمعتو تايكول لبارح*احح اقلبي تانبغيها*
فاتي:صدق خوك رومنسي
فيروز:كيتنا حنا لي فينا الفقر العاطيفي دوزي نحنجرو
   دخلنا للصالون كلسنا فبلاصة زوينة تحط طاجين كبير تاع اللحم و البرقوق تجمعو كاع لعمام و لعمات و لسوء الحض كلس حدايا عمي سمحمد و فيروز ميتا عليا بالضحك فرقات جدة الخبز و بدينا على بركة الله تانقسيو
سمحمد:عرفتي ابنتي فاتي هاد الخروف مسكين كانو فيه الباسر و تجهد عليه الحال بدات تاجيه الصريصرة مسيكين وهي تنوض جداك شراتو حيت جاها رخيص و دارو معه هاد البرقوق باش يحيد الريحة و كي شتي دابا هاد البرقوق كا...
فاتي:صافي اعمي شبعت هاك ها خبزي انا نايضة بقات فيروز تاضحك حتى دمعو عينيها بنت الكلبة شويا هو يتكحاز حداها عمي سمحمد
سمحمد:بنتي فيروز عرفتي بلي...
فيروز:بلا ماتحاول حيت نتا فاش كنتي كاتعيف فاتي كنت كانخشي فوجهي و الحمد لله شبعت واكول اللحم قبل ما يدود حيدو خليوني ندوز
جدة: اديك سلوم الشفارة فين غادية و تنقزي عليا هنايا
فيروز: خليني نخرج عند فاتي راه شبعت.اصلا فين باقي شي غدا مع العصر
جدة: عليها باركة تخشي فكمارتك نوضي الله يطيرك خرجي الله يخرجك فشي حيط
فيروز:انا وياك افطيطيم
   #فيروز
خرجت كنجري ومع دلك ضرباتني الصندارة للمسعودة طلعت للبيت ديال لبنات حيت دايرين بيت للبنات و بيت ديال الدراري و بيت الضياف و بيت الازواج كولهوم البيوت مباعدين دخلت لبيتنا لي فيه جوج سدادر واحد ديالي وواحد ديال فاتي و لوخرين كايفرشو فلارض حيت اصلا هادا الصيف و تبارك الله الصيف عندنا فوق الشواية لقيت فاتي حالا الماريو ناااري الساطة باتخرج
فيروز:فيين غادية
فاتي:بيت هي نخرج ندور اصلا قنط و شحال هادي ما خرجت هي من الدار للخدمة و من لخدمة للدار
فيروز:اه نيت شحال هادي ما شفت الزين و اللوز ولكن شوفي صبري مابين يجي ماجد و ياسين و نخرجو معاهوم
فاتي:ايه الالة واش غانديرو دابا
فيروز:نمشيو للموقف عند عماد نعاونوه فلبيع و يشري لينا خبزة فيها الطيحان و الموناضا
فاتي: وهيلا ما بغاش
فيروز:ومالو لخاطرو بزز منو كاتعرفي بلي كايكون عليه الدرك كتيير و خاص لي يسربي ليه و حنا غانعاونوه
فاتي:تاهادا ناضار يالاهي
  خرجنا بالبيجامات انا لابساها فلغوز و فاتي فلكري و هزينا شعرنا كعكة مهملة و التيليفون خشيناه فالسوتيانات . جربناها مشية من الفخارة للموقف ماكاينش لي يهضر معاك و لا لي ينك عليك حيت اصلا عمي صلاح معروف و شحال من مرة دخل للحبس و بابا جليل عسكري ادن تاواحد ما يقدر يهضر معانا وهادا احد الاسباب لي خلاتنا بايرات وصلنا للحانوت سخونا و الكليان تبارك الله كي الدبان
فاتي:هاواحد السلام عليكم
عماد:الله جابكم الله تعاونوني فاتي غسلي الماعن و فيروز تمسح الطبالي
فاتي:نعاام نونونو نتا لي غاتغسل لماعن و انا و فيروز نمسحو الطبالي و نسربيو لكليان
عماد:لااا انا لي راجل فيكوم
فيروز:اوا خلي ديك الرجلة تنفعك يالاهي نمشيو
عماد:احبسسس كالاك واخا موافق ولكن باينة بيتو شي حاجة
فاتي: اوا هانتا فهمتينا اولد عمي بغينا جوج خبزات فيهوم الطيحان
فيروز: وجوج كانيطات تكوكا
عماد: اييه و شحال بالسلامة بيتبقاو خدامين معايا
فاتي: تال لوحدة تليل لوقيتا معاياش كتسالي
عماد: اخا عمر كاد معاك واحد جوج خبزات و باسيلينا جوج حكيكات . واهانتوما عقلو مزيان
فاتي و فيروز:عااقلين
#فاتي
كفضنا على كمايمنا بعدما كلينا احح بنيين وبدينا نسربيو انا لي كنمسح الطبالي و نحط الطباسل و فيروز بقات حدا البرمات برا كاتطيهوم اللوبيا فلخبز و كاس داتاي و تخلص منهوم كانضحكو مع لكيان و كايدورو معانا بقينا على نفس المنوال تا سالينا و تسالينا ركبنا عماد فالطروا و غادي مكيسيري و حنا تانضحكو تاوصلنا حلينا الباب لقينا الزبل تاع البراهش نعسو حيت عيااو باللعب دخلنا للكوزينا حتى كانسمع واحد الصوت مؤلوف
....:تال دابا عاد جايا فين كنتي بالسلامة؟؟؟
•••••••••••••••••••••••••••••••••••••••••••
السلام  زيونات لحبوبات كي جاكوم البارت لي غادي نكول ليكون هو ابتداءا من البارتات جاية غاتولي القصة نااااااااااار و الفكاهة غاتزاد و الرومنسية بنوع اخر _^^_تابعوني محبوبتكم**لوليي**