عشق ليليان 💥💕

127

- كامي : منسينييش .. و دير لي تقدر عليه
- حرق المسافة بيناتهم و وقف فوجها : قتلك سينيي و منيش نتفاوض معاك ... كاميليا تعرفي بلي نقدرو نخرجوك من الشركة بدون ارادتك و بطريقة قانونية و هكاك راح تخسري دراهم على المحاميين في باطل ... و تعرفي الصحافة بتصريح واحد مني راح يروح بريستيجك هدا كامل ... فهمتي درك ولا نزيد نوضح اكتر
- كامي دورت وجها و ملامح الغضب على وجها تعرفو يديرها ... عاودت شافت فيه و هزت الورق سينياتهم و مدتهملو : مزال تشوفوني
- خطف الورق من يدها : فجهنم الحمرة (جا ماشي مبعد دور ليها ).. ااه نحب نوصيك ... نتي و عبدو غير حبسو وش راكم ديرو .. متقدروش تآديوها و هي معايا ( غمزها و دور راجع لطوموبيل ... جبد ليليان من يدها و يكركر فيها وراه ركبها و ركب حتا هو و مشاو فسكاات )
مهدي يسوق و مقلق .. وجهو مقلوب .. ليليان باقية تلوح عينها ليه حابة تحكي معاه ... فهمت بلي غلطت هو يدير فهاد شي بش يحميها و هي تتبهلل
حطت يدها على يدو فوق الفيتاس جبد يدو حطها على الفولون .. غمضت عينيها تتحكم في روحها لمت يدها ليها و دورت تتفرج فطريق من سكات
مفاقتش مع الطريق حتى شافتو حبس قدام القصر .. بلعت ريقها و شافت معاه .. معبرهاش نزل و بقا واقف يستنى فيها نزلت و محبتش تمشي ... مش فاهمة سبب لي جايهم هنا ... و زيد تخاف منهم و تتوتر خاصة و مهدي مش واقف جنبها و حاكملها يدها ... مهدي فهمها و غاضتو وقف قدامها و جبدها من يدها كبشت فيه كانو راح يهرب
- مهدي : متخافيش اني هنا ...
- هزت راسها بالايجاب و هي تتبسم : متطلقنيش برك
تبسملها و مشاها معاه ... دخلو لقاو سالم و اب عبدو قاعدين فصالون ... راح مهدي ديراكت رما روحو فوق الفوتاي و قعدها جنبو ... ليليان غير تشوف بعينيها ما فاهمة والو
سالم و اب عبدو غير شافوه جاي جيهتهم وقفو .. و هو مقيمهمش و قعد عاودو قعدو ...
- مهدي : وش سي سالم توحشتوني ؟
- سالم : ايه مهدي ولدي ... كان ترجع لينا
- قبل ما يكمل جات ام مهدي و قفت فوق راسو : كان يخليها و يرجع لينا يحط عقلو فراسو
- جاوبهم مهدب بكل برود : مش نتوما لي تقولو وش ندير فحياتي ... و زيد مجيتش على هاد الموضوع