عشق ليليان 💥💕

135

مهدي تفاهم مع امين يتلاقاه برا ... وصل للشط لقاه قاعد يستنى
- مهدي : سلام ..
- امين : سلام ... صافا مهدي ؟
- مهدي : الحمدالله ... ( قعد مقابلو ) عيطتلي معناها جبتلي ليدوسي لي حاب
- جبد من الساكادو لي جنبو ورق : هادو هوما ... اي معلومة ممكن تحتاجها تلقاها هنا
- مهدي يقلب فيهم : يعطيك الصحة امين ... ( نزلهم من يدو شاف معاه و تبسم ) .. كشما تحتاج اني هنا .. درت فيا بليزير مننساهش
- امين : ما تخممش فيها ديرها ما صراتش عادي ... الناس العزاز علينا منحسبولهمش البليزير
- مهدي : تعيش .. انا نخليك درك
وقفو تصافحو و كل واحد مشا فطريقو ... مهدي رجع للدار .. توحشها والفها دايما قريبة ليه .. دخل الدار سمع فالغنا جاي من الجنينة .. بقا واقف فبلاصتو و يشوف مع الدار بعينيه يحوس عليها .. كمل يمشي جيهة الجنينة ... تبسيمتو عراضة كي شافها كتف يديه و كمل يتفرج فيها
ليليان بعد ما خرج مهدي ملقاتش وش دير ... بقات دور فالدار شافت الشومبرة الثالثة اللي كاينة و مش مالفة تدخلها فتحت .. فمها تحل ...
- واااو تهبل ... ( كانت شومبرة فيها 2 فوتوي و بيبليوتاك حاكمة حيط كامل معمرة بالكتب من كل انواع .. جيهة اخرى خزانة حاكمة الحيط الثاني فيها تيليفيزيون كبير تحتها معمرة بليسيدي و على جنابها ديباف كباار .)
دور فيها و تتفحص فكل حاجة بيدها ... وصلت ليباف تفكرت لي كانو عندها فالقصر .... عينيها لمعو من الفرحة
- ليليان رايحة تصددي من ماكلة و القعاد نسيتي نادي و كان تبقاي هكا ... يرووووح هاد الكور و تولي كيف البقرة ... ( طبطبت بيديها على الباف ) ... تعمرتوو غبرة اليوم نحي عليكم الغبينة ههههههههه
دورت راسها تشوف مع البيت فتحت البالكون طلت على الجنينة ... نزلت تجري خرجت طابلة صغيرة من الصالون للجنينة و خرجت كابل طلعت جابت الباف و حطتهوم في زوج ... برونشات تيليفون و زادت فولييم لآخر درجة ... نحات كلاكات ( البليغة )