أرحموني ولو رحمة مرة

الحلقة -10-

((أرحموني ولو ...رحمة مره ))
بقلمي :-فراقد حسن علي
البارت -10-
.................،،................

محمود /صعدت الغرفتي وحيل مخنوك

-يارب العباد خلصني مااريد هذا الزواج
انت اعلم بقلبي بس حب فرح بي

-ثاني يوم العصر كلنه متحضرين
اني وامي وابويه واركان

-نروح لبيت حجي نافع ابو علاء
حتى نشوف البنات ،،

-بعد ماطلعوا الجماعه
أصدقاء ابويه العصر

-بليل أبويه اتصل على الحجي
وبلغه على اليوم نتشاوف يوم الرؤيه

-وانوب امي حجت ويه أم البنات وتفقت وياها
البنيه الجبيره تصير حلالي
والصغيرة تصير حلال لاركان

-الجبير أسمها رفل مواليد ٨٧
والصغيره اسمها رسل مواليد ٨٩

-مخلصات أثنينهن ثالث متوسط
وكاعدات بالبيت الحجي يخاف عليهن
من الاوضاع

-بس أني شنو ماكو البنيه المجبوره والمغصوبه على واحد
اني روحي وحالتي وجهي أكثر منها حزن وقهر

-أخذوني شحط والله رايح غصب عني مو باأرادتي
لا فرحان ولا شي

-وكلها بجفه ومن اتذكر سطره الراشدي من ابويه بجفه
بيوم حاجيته وردت اتزوج فرح
سطرني راشدي
وهو عمره ماضاربني هيج

-جان يخوفنه بالحزام يطبكه بالنص ويبقى يطكطك بي
يطلع صوت يرهب
واذا أشتدت وكاحتنه اني واركان
يضربنه على رجلينه لو على ظهرنه

-عمره ماضربنه على وجهنه

-ااااااخ لهسه سطره الراشدي تاكل بروحي

-هسه لو محصل على فرح والله أنسى السطره
بس عمر الامنيات ما تحققت

-وصلنه لبيت الحجي وتلكانه من الباب
طاير بجيتنه ،،

-وابنه علاء الجبير وخالد
خوش شباب الله يستر عليهم
شالونه بالصلوات

-بعد السلام والضيافه والمجاملات

-اركان كاعد بصفي تكول خلفته ونسيته
يحجي همس
اركان/اكلك من هسه الحلوه اليه،،

محمود/اخذهن أثنينهن عليك بالعافيه
بس خلصوني مو أختنكت

اركان/لو يصير ميخالف بس اطمئن على وضعي
يابه أتزوج أثنين ،،وثلاثه ،،
بس تمشي الامور صح
وتجي ويايه عدله

محمود/شماأشوف راح تفشلنه
وكلشي ماتدبر بيوم عرسك وبس تهوبز
هسه دبر وحده وعود فكر بالثانيه والثالثه

أركان /أفاااا اني أخوك يا أبو شكريه
هيج ضنك بخوك الملازم أبو أسلام

محمود/بس أنلصم،، ابو أسلام
من هسه خططت تزوجت
وخلفت ولد وسميته اسلام
وانت بعدك ماشايف العروس
والله أحلامك بايخه مثل وجهك