أرحموني ولو رحمة مرة

الحلقة -2-

((أرحموني ولو ...رحمة مره ))
بقلمي :-فراقد حسن علي
البارت -2-
.................،،.................

محمود/يمه خلي فرح بحظني اريد اشيلها

-كامت أمي من فراشها
واني زحفت على ايديه ورجليه
ورحت يم السله ،،

-وامي شالت فرح وخلتها بحظني
شكد خفيفه وصغيره

-يمه يصير تبقى اليه ،،
ومن تكبر اني اتزوجها واكوم احبها
نفس ماابويه يحبج
حتى رب العالمين ينطينه هديه
نفسها جاهل صغير

فاطمه/ههههههههه ،،الله كريم يمه منا لهذاك الوكت

-شدكولين سهام ،تنطين فرح لمحمود

سهام/وين أحصل عريس أحسن من محمود لفروحة

الجده/جدة محمود أخذها مني ،،
فرح الك ماتصير الغيرك

محمود/ااااي عفة جدة بس انتي شاطره

-من باجر أشترليها ويايه أبو الجيس (عصير مجمد بكيس)

فاطمه/ههههه ،،لا يمه هي بعدها صغيره
ماتكدر تاكل وتشرب مثلنه

محمود/شنو تبقى بدون أكل وشرب ،،
خاف تموت وماتكبر نفس الكائنات الحيه مال علوم

سهام/ههههه ،،محمود فرح صغيره تشرب بس حليب

محمود/هااا،،أفتهمت
من باجر أجيبلها حليب من صخول بيت علاوي

فاطمه/ههههه تخبل الولد ،،
-يمه أمها ترضعها
ميحتاج تجيبلها انت حليب

محمود/يعني شلون ترضعها؟؟

-منين تنطيها حليب ؟؟

-قابل خاله سهام صخله لو هايشه!!

الجميع /ههههههههه

الجده/هههه جدة محمود من أشتعلت أصفاح بليسك

-يول شكثر تسال ،،

-انت الك الصافي
هي خالتك سهام ترضعها على صدرها

محمود/جدة والله انتن النسوان بلوة على كولة جدي

-مرت الايام ،،وعمه نجمة جابت ولد سموه (رافد )

-وراها ،،عمه كمرة جابت بنيه سموها (نوال)

-يعني هم وفرح نفس السنه صاروا

-فرح صارت يوم ١٠/١/١٩٩٠

-ورافد وراها صار بس مو حلو أسمر طوخ

-وراهم نوال صارت بأول يوم أمتحانات نص السنه
واني عندي امتحان دين

-أجت أمتحانات نص السنه
وتعال يا محمود أقره
روح يامحمود رد أملاء
وأحسب رياضيات

-واني يوميه كل مااجي من المدرسه
اركض بوجهي لغرفه عمي باسم حتى أشوف فرح

-مرات أشوف خاله سهام ترضعها على صدرها
أستحي واطلع اركض ،،
لان امي كالت عيب تباوع
على خاله سهام من ترضع فرح