أرحموني ولو رحمة مرة

الحلقة -8-

((أرحموني ولو ...رحمة مره ))
بقلمي :-فراقد حسن علي
البارت -8-
.................،،................

فرح /يالله ....ألسلام عليكم

-يابه الله يساعدكم على محمود موع أذاناتكم من كثر السوالف

-دواه بس اركان هو يعرف كل مفاتيح شخصيته

-وياليتكم كنتم جوارين اركان !!! (بعدين تعرفون شقصد)

-محمود أخذ  أنظاركم الكريمه بس الشخصه
حتى ما نطانه مجال نتعرف على بعض

-هو عرفكم عليه سابقاً ،،وشرحلكم كل تفاصيل حياتي
وحجالكم شلون قشمرني

-الصراحه اني اتذكر الحادثه ،،
وأتذكر كل تفاصيلها
بس مااعرف شنو عواقبها

-الى ان أجى اليوم الوكع بي الفاس بالراس......

-بسنه ٩٦ بعد ماطلع اليوم السابع
من وفاة جده خاجيه الله يرحمها
وشالوا بيت أبويه عادل لبغداد

-هذاك اليوم أنصب عزه جديد بالبيت
عماتي هلكثر بجن ونعن وحتى كامن يلطمن

-وامي سهام ،،وعمه هناء وياهن يبجن ويلطمن

-بس عمه رجاء ولا يمها الموضوع

-جان يوم دوامي ظهري
وماجنت حافظه أملاء
محد فارغ ويقريني ويكتبني
درس الاملاء مال (ماء ،،بناء،،أمين بناء)

-بدت معلمتنه أسمها ست أخلاص
واختها هم معلمه أسمها ست رجاء
والله حتى شكلهن يشبه الرجال

-وهاي ست أخلاص من أهل بغداد
وحتى تسوق سياره ،،
ورجلها عسكري يمكن ضابط
ومسؤول الفرقه الحزبيه هنا بالقريه

-يالله هلكد مكروها وابد ماكو بقلبها رحمه
اذا مانحفظ الدرس لو ناخذ درجه قليله
تشلفط أيدينه بالعوده

-بدت ترد الكلمات بس والله تحجي بسرعه
ماألحك اكتب وياها

-واني ماحافظه الدرس ،،تركت القلم بنص الدفتر
وكمت أبجي بصوت عالي

-هي شافتني أبجي أجتي عليه
كالت /ليش تبجين وشافت دفتري فارغ
ما جاوبتها،، أخاف منها

-كالت /كومي أوكفي وره الباب يم الزباله
انتي كسوله وحرامات ماخذه مكان من الرحله
واهلج مسجليج بالمدرسه

-كمت من مكاني ورحت وكفت وره الباب

-انوب لزمت أثنين بنات
وحده تغش على الثانيه هم وكفتهن يمي

-دك الجرس للساحه ،،و صارت الفرصه
هي جمعت دفاتر الصف وخلتهن على اول رحله

-أجت وضربت بالبنات بالعوده على أيديهن
وصلت يمي

جان تكول /يلا افتحي أيديج خلصيني اريد اطلع

-أني خفت وكمت أبجي مافتحت أيديه