أرحموني ولو رحمة مرة

الحلقة -7-

((أرحموني ولو ...رحمة مره ))
بقلمي :-فراقد حسن علي
البارت -7-
.................،،................

محمود /اجتي فرح تركض تبوس باأمي فاطمه

-ومن وصلت يمي تريد تحظني
ابويه دفعها على كيفه
وكالها،، روحي بويه يم امج

-استغربت ليش هيجي سوه 🤔

عادل/يلا بويه اصعد فوك أنجطل وارتاح

-وانتي فاطمه اخذي ولدج وصعدي فوك لغرفتج

فاطمه/شكو شصاير ،،شبيكم شو وجوهكم مچفيه

عادل/فاطمه اصعدي فوك واني أفهمج

محمود/صعدت لغرفتنه صايره هوسه
مكلوبه صاير بيها أنقلاب هدوم وفراش

-امي صعدت وبقت متفاجاه من الهوسه
شمرت عبايتها وبدت تعزل وترتب

-رحت أنجطلت على الجربايه
واركان هم أنجطل ويايه

-شويه وصعد أبويه ،،وامي تقدمت عليه
وحظنته كبالنه ،،

-وهمه خطيه أثنينهم كاموا يبجون

-اني واركان بقينه نباوع عليهم
اول مره أشوف امي تحظن ابويه
كبالنه ابد مامسويتها من قبل

-أبويه مااستحى من أمي ولا من عدنه
بجى بجى بس الله يعلم بالحسرة الخانكها بصدره
عبالك منتظر جيت أمي حتى هيج يبجي بحظنها

-كعد بالكاع ولم رجليه على صدره
ورجع راسه على الحايط وغطى عيونه بيده

-وامي كعدت بصفه متعرف شلون تواسي

-وهو بده يحجي ويبجي وصوت شهكاته
تزرف بروحي ،،

-وبكل شهكه أحس برغي ونت
يظبن ظلوعي

-أحس كل هذا الصار بابويه بسببي

عادل/فاطمه تعرفين شنو الذابحني والكاسرني
ومهشم خاطري وهاد حيلي

-صح موت امي كسر ظهري
وهد حيلي ،،بس مااعترض هذا أمر الله
والموت حق كل أحنه نغمض بس وجه
ربج يدوم

-الكسرني فاطمه أهانة أخوي اليه
هاني بنص ديوان أخوتي وعمامي واولادهم

-واني حاسب نفسي جبيرهم
وكلت أظمهم تحت جنحي وماريد تفرقتهم
بعد موت أبوي

-يولي أخويه هاني هواي ،،
وكل أهانه أقوى من الثانيه

-اول شي سحب أبني الزعطوط من حظني
وتولاه كفخات كدام الجميع

-اتوسل بي واكوله الصبي مريض
طلعته من المستشفى
اتركه من ايدك اني أأدبه
وهو بي ما يدك عليه كفخات

-يول فاطمه كلها بجفه ومن دفعني
وكومني بالكاع بجفه

-والله حسيت روحي صرت بحجم العصفور
اني عادل ابو محمود الزلم تحلف بأسمي
لو يمرهم طاريه ،،