أرحموني ولو رحمة مرة

الحلقة -22-

((أرحموني ولو ...رحمة مره ))
بقلمي :-فراقد حسن علي
اليارت -22-
.................،،.......... ......

أركان /اخذت سيارتي وطلعت الكربلاء
وسعدون ابن ابو رامي جيرانه هو يسوق
الطريق كله عيوني وشلت من الدموع
راسي أنفخ من القهر ،،ربي عفوك ورضاك

-يمكن سعدون سوه الطريق اقل الساعتين
كلش سريع بالسياقه
والله هسه لو يكلبنه ويسوي حادث
مااهتم الروحي لان قلبي مشعول نار

-بس وصلنه الكربلاء ،،
والله احس نفسي مو امشي ،،
لا أركض ركض ،،

-أريد أوصل للعباس وأحشمه
أكله جايك مكسور الظهر ورايد الفزعه

-مارحت لا توضيت ولا ابد
لان سبحت وطلعت من البيت

-وصلت الباب أبو الجود ،،
حلكي يابس من القهر ،،
وروحي عطشانه على شوفه ابني بخير

-هلكثر بجيت ،،هلكثر صرخت
امشي وأسولف وياه ،،
احس يباوع عليه ويشوف حالي ،،
وأتخيله يكلي
((هذا اني موجود أسمعك شتحجي وشدكول ))

-دعيت لوليدي ،،ودعيت دعوة من قلب
أبو محروك كون يحفظ جميع الاطفال
لأهلهم من كل سوء وكل شر

-وصلت باب الضريح الجوه
وصرخت صرخه أحس حنجرتي قفلت
-هاااااا يالعبااااااس راااايد وكفتك اليوم
أبني عفته بغداد مطروح
هااااا يا أخو زينب ،،لا تردني خايب
بقلب مجروح

-الوادم كلها بقت تباوع بوجهي
كعدت باب الضريح على ركبي
بس شلت جف ايدي ،،وسلمت على الامام
بقيت كاعد بمكاني حتى ما بقت بعيوني دموع
قلبي محروك ناااار وشاعله بي

-((لسان حال أركان ،،بضريح أبي الفضل العباس(ع) ))

((جيتك ماد الايد.....أقسم عليك بحق زينب والعضيد
وبحق ضلع امك الزهراء وضلع الوحيد
أنا جايك انخاك ودموعي تهل
مالي مقصد غيرك ياكفيل
جايك بحق سكنه والطفل الرضيع
وبحق اللي قضى بأرض البقيع
جيتك وكلي امل بخذ الطلب
مالي غيرك ياعضيد))

-مااعرف شكد بقيت كاعد
بس اشهك وابجي ،،والزلم الرايح والراد
هذا اليصيح الله يعينك ،،
وهذا اليكول الله يكوي حيلك ،،
وهذاك يرد الله يبرد قلبك

-كمت بعد ما حسيت روحي بردت
واحس قلبي أنجلي من كل قهر
عيوني بطلت أتصب دمع
دخلت للشباك وجلبت بي
سلمت على الامام ،،
وتخيلته رد سلامي

-كتله /ادري بيك كافل أيتام ،،وأبني يتيم أم
وجيتك معتنيك ولا رايد لا سلطه ولا مال
رايد بس بجاهك عند الله تخلص أوليدي
من هاي الشده

-خطيه سعدون ويايه ويايه ما تركني أبد
طلعنه من الضريح ،،
رحت للحمامات توضيت
ورجعت صليت

-سعدون تفاجئ بيه من صليت
وأكتشف اني من الطائفه السنيه
صارلنه شكثر ساكنين بهاي المنطقه
يعرفون لقبنه الجبوري وكبل
وامي دائما تذكر اهل البيت وتوزع ثواب
اغلبيه المنطقه عبالهم جبوري من آل الواوي
مايدرون أصلنه جبوري من آلبو طعمه
الحمد لله عشيرتي كلها العراق
نصها سنه ونصها شيعه