أرحموني ولو رحمة مرة

الحلقة -1-

((أرحموني ولو ...رحمة مره ))
بقلمي :-فراقد حسن علي
البارت -1-
.................،،.................

-يالله ،،،السلام عليكم

-أعرفكم على نفسي ،،أني محمود عادل ألجبوري

-من سكنه قضاء المحموديه ،،أطراف محافظه بغداد

-ساكن بأحد القرى التابعه لقضاء المحموديه ،،
يعني أحنه ناس باب عرب

-وساكن ويه أبوي وأمي وأخوي أركان بيت الاجداد
بوسط البستان التابع لملكية جدي

-والحلو البستان
بي ساجية مي جاريه منين تجي وين تروح مااعرف

-وبيت الجد والجده ،،وبكل قريه ،،وبكل حي ،،وبكل منطقه ،،
وبكل محافظه ،،وبكل أقليم ،،وبكل بلد

هو:-عبارة عن فندق للزعلان ،
مطعم للجوعان ،
مكان ملاذ للضايج والمتلاغي
محكمة قضائية لحل المشاكل الأسرية والسرية ،
مكان للإجتماعات العاطفية والعائلية

-وبيت الجد والجده ،،جميع الغرف متاحة للدخول
وحتى الغرف الخاصة منها .

-البيت بي ٥ غرف متوسطه الحجم
وهول ،،وأستقبال ،،وحوالي مفتوح على كل الغرف ،،
ومطبخ وحمام ،،

-وحديقه خلف البيت كلش جبيره
الي هي أمتداد للبستان
الي جدي بنه البيت بوسطه مساحتة الف متر يمكن
وتقريبا مساحه ألبيت٢٠٠ متر
والبيت ينقطع بسياج ومحوطه من جميع الجهات

-أحنه ساكنين بغرفه أمي وأبوي واني وأخوي أركان

-وغرفه لعمي باسم
وغرفه لعمي أحمد
وغرفه لعمي محمد

-وغرفه هي بالاصل الجدي والجديتي بس هسه العمه (شمس )مستحلتها تنام هي وجديتي بيها

-وجدي ينام بالهول دأئما قريولته موجوده ومفروشه

-والمطبخ بي ألثلاجه الي تُنفتح بابها وتُنسد
أكثر من أي باب ثانيه بالبيت.

-وبي طاوه الطماطه والبيض على الطباخ
وحتى البيض المگلي وحده
بريوك كل صبح
يكون من ألذ وأطيب الأطعمه بهذا البيت

-في بيت الجد والجده ،،حالة التنبيش وألاستماع
للاخبار الصغيره والجبيره ،،
والي تخص عايلة البيت او تخص الاقرباء او الجيران
متعة من نوع خاص والإطلاع
على تفاصيل وأكتشافها متعة أكبر .

-في بيت الجد الجده ،،كسر صحن أو كلاص أو أستكان
شيء أقل من العادي،، ومن ينكسر يصيحون الاهل فدوة طار الشر  ...

وتخريب كيلون الأبواب ،،وقفاله الشبابيك ،،وتكسير ألجام
شيء مو بالغريب ...

-في بيت الجد والجده ،،صراخ ألعمه (شمس )حاضرومتواجد دائما
للحفاظ على نظافة البيت
وحتى لا تضيع جهودها في التنظيف سدى
وصريخها دائم ،، لا تدخلون بقنادركم ونعالاتكم على فراش البيت