أرحموني ولو رحمة مرة

الحلقة -16-

((أرحموني ولو ...رحمة مره ))
بقلمي :-فراقد حسن علي
البارت -16-
.................،،................

- ((ومن هنا بدء منحى أخر للقصه ))

-((وتذكروا دائماً أن للبيوت أسرار ))

فرح /رحت للمطبخ وجبت
زرنيخ يعني سم مال جريذيه
وخبطته بكلاص شربت

-لزمت كلاص الشربت بيدي أبجي وارجف

-اريد اشربه وأخاف من الموت
والله اخاف انام بالظلمه ،،زين شلون
اذا متت ودفنوني بالگبر وحدي

-بس قلبي محروك ،،
والله قلبي يوجعني
بس اريد اعرف شنو ذنبي واعيش هيج عيشه

-بقيت مصره على فكره الانتحار
اريد أموت واخلص من القهر العايشه بي
اخذت الكلاص وبقيت كاعده بالمنور

-بقيت أحجي ويه روحي
ساعه اكول اشربه واخلص
وساعه اكول لا اخاف من الظلمه

-حسيت ايد زغيره على جتفي فززتني

-ها ياسمين شبيج تبجين

ياسمين/شوفي نسرين ملخت لعابتي
حبابه تعاي خيطيها اليه
انتي مو تكولين اني بنيتج

فرح/بين دموعي وقهرت قلبي
وعصرت روحي ،،ضحكت على
كلماتها ،،

-اي انتي بنيتي ،،يلا تعاي اخيطها الج
لعابه نسرين وين ؟؟

ياسمين/ضامتها تخاف عليها تتوسخ
وتلعب بلعابتي

فرح/كمت وكلبت كلاص الشربت بحوض مغسله المواعين
وغسلت الكلاص زين خاف واحد يشرب بي مي ورايه
ويتسمم خطيه

-رحت وخيطت لياسمين لعابتها

-بس احس اكو حسره قويه بصدري
شلون الصخره وتكورت بنص صدري
بالكوه اجر النفس

-لليل مااكدرت انام ،،الصراحه
كمت اتخيل هسه مخلد دخل على مرته
وهسه باسها نفس مابوسني بالبستان
واكيد هسه يكوللها شعر وسوالف حلوه

-ابجي وعيوني توجعني من كثر الدمع
بس الحسره جلبت بصدري خنكتني
صبه كونكرت ونامت بنص صدري

-افكر واحاجي نفسي زين اني ليش مقهوره
معقوله احب مخلد ؟؟

-زين شلون احبه !!واني من صغري احب محمود!!

-والله مااعرف شلون افسر حالتي
شنو الكاعد يصير بيه مااعرف

-ثاني يوم أنجمعوا كل عمامي
وعمام أبويه ،،على وكت الغده
وبيت ابويه عادل كلهم أجوي
عدى محمود ماوصل ،،

-سوده عليه اركان حاير بأبنه
بس يبجي يطفر يشيله ويبقى يفتر بي

-وانوب أسلام بي تعويد مو حلو من يريد ينام
لازم الواحد يخلي وساده على رجليه وينومه
ويبقى يحرك رجليه نفس المهد
يعني ((يهزونه على رجليهم))