أرحموني ولو رحمة مرة

الحلقة -17-

(أرحموني ولو ...رحمة مره ))
بقلمي :-فراقد حسن علي
البارت -17-
.................،،................

أركان /وصلت للمقر اليداوم بي مخلد
سلمت على الشباب ،،وطلعتلهم ألباج
اني عسكري وضابط حالي حالكم
رحبوا بيه ،،

-وسالتهم على مخلد كالوا هسه يجي
طالع بشغله

-كعدت يمهم شويه وسمعت صوت
مخلد دخل وسلم بس شافني أنصك بمكانه

-هو لابس عسكري ،،واني لابس مدني
كمت وتقدمت عليه ومديت أيدي أصافحه

-هو مد أيده صافحني لان حرجته
حقه صارت بيناتنه عجينه مال بوكسات

-بس مستغرب وجودي
وبعيونه الف سؤال ليش جاي عليه

-مخلد عندي وياك كلمه خاصه
بس أريد نكعد بمكان وحدنه
او نطلع نكعد بره المقر بأي مكان يعجبك

مخلد /لا بره مااكدر أطلع تعرف
واجب وخاف كولشي يصير
لان شوفت عينك الاوضاع الامنيه تعبانه

-تعال تفضل هنا أستريح ،،
من رخصتكم شباب
عدنه موضوع عائلي وألاخ أركان نسيبي

-أركان /طلعوا الشباب الاثنين الجانوا كاعدين يمي
من الغرفه ،،ومخلد كعد على الكرسي كبالي

مخلد/قبل ماتبدي بسالفتك،، اول شي لازم أضيفك
تشرب جاي ،،كهوه

اركان/اني جاي اسولف وياك بموضوع وامشي
ضيافتك وكرمك واصل ،،

مخلد/أحنه ولد عرب ومانرضاها لنفسنه
خطارنه يطلع بدون ضيافه

أركان/يابه بالله العظيم ماتقصر
انطيني بس بطل مي بارد

-كام مخلد جابلي مي بارد ورجع كعد كدامي
بس شنو قلق ،،ومبين عليه متوتر
حتى من يحجي نبرته حاده من التوتر

-عشت ،،،،
شربت المي مجرش كسر سنوني
وهو يراقبني

مخلد /بالعافيه

-أركان اذا جاي على سالفه طلاك فرح
لا تفشل نفسك وتطرق الموضوع

أركان /نزلت بطل المي وخليت بصف رجلي

-مخلد عندي وياك موضوع مهم
واريدك تواعدني ،،وتنطيني وعد زلمه حوك
ان الموضوع الي هسه راح تسمعه مني
ميطلع بره باب هاي الغرفه
ومن بعد ماتسمعه أنت حر ألاختيار

مخلد /غير أفتهم شنو السالفه
حتى أكدر أوعدك أو لا

أركان /سالفه شرف ،،وستر عرض

مخلد /لا يابه الا سوالف الشرف
أوعدك وعد زلمه ،،
وأني أبو محمد وكلمتي وحده وماتصير أثنين
حافظ سالفتك بصدري وما تطلعت بره باب الغرفه

أركان/كفو والله ،،عشت يالنشمي

-أنت تعرف وبالذات سوالف الشرف
اذا وصلت لحلوك النسوان يكومن يألفن قصص بكيفهن
ومن حرف واحد يسولهن قراءه وحساب