أرحموني ولو رحمة مرة

الحلقة -9-

((أرحموني ولو ...رحمة مره ))
بقلمي :-فراقد حسن علي
البارت -9-
.................،،................

فرح/من كام مخلد يريد يطلع شاورني

-بليل أجيج ،،لا تنزعين الفستان
غمزلي وطلع

-يمه قلبي قام يوجعني من كثر الخجل

-شنو قصده يكول بليل أجيج ،؟؟
وشيريد جاي علينه مره ثانيه ؟؟
وليش غمزلي؟؟

-بعد ماخلصت الحفله والهوسه
البنات مروه وكوثر وهاله خمن البيت بسرعه
ورجعن كل الغراض بمكانها

-اني اخذتلي دشداشه جديده تفصال وخياط ايدي

-ودخلت للحمام غسلت ،،
يمه شعري أحسه ملثك ،،
ومعظم من كثر البخاخ
ام الصالون تجيب وتبخ

-وجهي من غسلته وجلفته بصابونة الركي
حسيت كل جسمي تنفس مو بس وجهي

-طلعت مشطت سويت جذيله وحده
نزلت على طول ظهري

-يادوب شربتلي كلاص جاي وقطعه كيكه
اجت مريم كالت /مخلد بالباب وأبويه دخله للديوانيه

-وكالي روحي نادي على أختج فرح تجي تسلم على رجلها

-لا ياربي صدك جذب ،،شبي هذا أجى درب الركض

-صعدت فوك على عمه هناء

-عمه فدوه الحكيلي أجى مخلد واستحي من عنده
شلون راح أكعد وياه وحدنه

هناء/اول شي تعالي أخليلج كحله حجريه توسع عيونج

-شوفي اني امج قبل لا أكون مرت عمج

-اول شي لفي المشمر على راسج وستري نفسج
لان الواحد ميعرف شضامتله الدنيا

-ثاني شي لا تكعدين وياه وحدج ،،
اخذي خواتج مريم وفطوم وكعديهن يمكم

-خاف يكلج طلعيهن أريد اسولف وياج
كوليله أبويه مايقبل ،،
وخليهن يبقن كاعدات
لان أخاف من تروح أترزل
هسه ينحرج ويسكت

-ولا هسه ولا بعدين تسمحيله
يمد لا أيد ،،ولا رجل ،،
ولا حتى لزمه ،،ولا طخه
كل ماتثكلين عليه يكوم يموت عليج

-عود بيوم الدخله هاي السوالف من حقه

-وخلي يسولف براحته بس بدون تجاوز
واخذي وانطي وياه بالحجي

-وهسه عيونج صارت تمرعد أتمرعد

-لفي المشمر زين على راسج وانزلي سلمي عليه
ولا تنسين الوصيتج عليه

فرح/عمه هناء كلش حبابه وهواي تنصحنه وتعلمنه

-نفذت كلامها ونزلت أخذت مريم وفاطمه
وكتلهن تبقن كاعدات يمي ممنوع تطلعن
حتى لو مخلد كاللجن روحن
كلله أبويه مايقبل وأبقن كاعدات

-دخلت للديوانيه ،،السلام عليكم

مخلد/وعليكم السلام

باسم /بويه فرح رجلج جاي يتفق وياج
على شغلات زواجكم وترتيبات الزفه