#صفحات ممزقة
(قصة واقعية)
الحلقة(2)
بقلم.. القطة الشريرة
خنساء .. يعني انت ينطبق عليك المثل الى يقول الطول طول الباب والعقل عقل ذباب
أمين..سكري فمك انتي الى طالعة تمدي ف وجهك
عزو.. ههههه 1 شي لخنساء
خنساء.. خطفت نظارتها ولبستها وفاتت
أمين.. بصوت عالي سنفور غضبان
رانيا.. هيا نحنا واتتين
زهرة .. هيا وطلعو كلهم للجنان
دلال.. خنساء هيا يابنت
خنساء.. دفت نظارتها بصبعها خيركم
مديحة.. هيا لحوش عمتك
خنساء.. مش ماشية بنقعد مع جدي وتيتا وبنقرا
داليا.. بيفوتك الجو يامتعقدة
مديحة.. جتك بعدين بتجي باش تجي معاها
خنساء.. يصير خير وخشت
_____________________________
طلعو الشباب وخنساء غدت جدها وجدتها
أمين.. يسوق ف السيارة وقعد يفكر ف خنساء والموقف الى صار بينهم ملامحها حلوة عندها نظرة تخليك تتمنى ماتحول عينك عنها
_____________________________
زايد.. الو رانيا
رانيا.. أهلين
زايد.. انا البرا أطلعيلي
رانيا.. تمام وطلعتله خيرك
زايد.. اسمعي بنقولك موضوع ونبيه بيني وبينك
رانيا.. موضوع شن
زايد.. داليا
رانيا .. خيرها
زايد.. عجبتني وشوفي شن وضعها
رانيا.. خلاص تم توا نكلمها مايطلع منك ونحنا نحسابوك عاقل
زايد.. سكري فمك ماتخليني نندم
رانيا.. نبصر ياودي وخشت
___________________________
خالدة.. ياخنساء ياخنساء
خنساء..نعم
خالدة.. مافيش حد من الولاد يرفعنا لحوش عمتك
خنساء.. لا الحق الحوش فاضي
خالدة.. بري لحوش أختي تلقيه مقابل حوش جيرانا ع اليمين أكيد تلقي حد من الولاد
خنساء .. بس ياتيتا مانعرفهم
خالدة.. تعرفي عليهم
خنساء.. دفت نظارتها وقعدت تنفخ يارب الصبر أمتى بنرجع للحوش لبست عبايتها وطلعت
أمين.. درس السيارة وقعد يشوفلها وهيا ماشية
خنساء.. نظامها لما تمشي عيونها ف الأرض لاتشوف يمين لايسار
أمين.. قعد ف سيارته وقعد يراقب فيها
خنساء.. دقت ع الباب وفتحلها واحد طويل وعريض وأسمراني تفضلي
خنساء.. قول لأمك ولاجتك تيتا خالدة تبي حد يوصلها لحوش عمتي سالمة
الشاب.. انتي بنت موسى
خنساء.. وانت شن دخلك وفاتت
الشاب.. خير أمها هذي
أمين.. قاعد ف السيارة ويضحك ع منظر خنساء كيف دف ف النظارة وقارنه حواجبها ونزل من السيارة وين كنتي
خنساء.. عطاته نظرة من فوق للوطة وخشت
أمين.. أوقفي عندك يابنت
خنساء .. ولاكأنها تسمع فيه
أمين.. قعد يسرع ف خطواته لعند مسكها من يدها بقوة
خنساء.. نصدمت من اللقطة متاعه وفكت ايدها بقووة انت مني باش تمد ايدك عليا
أمين.. وانتي مني عشان تستحقريني وتشوفيلي وكأني حشرة
خنساء.. انا حرة كيف مانبي نشوفلك نشوفلك ولو مش عاجبك أنطح الحيط
أمين.. غير ع شني شايفة روحك رايحة زي الغولة لاجمال لارشاقة
خنساء.. وراضية بنفسي هكي وبنتجكتر ومش مشكلتي لو انت تشوف ف روحك صغير قدامي وفاتت
امين.. خش للمطبخ وهوا معصب اول مرة بنت تحكي معاه بالوقاحة هدي أمين الى البنات كلهم يراجو ف نظرة منه تجي وحدة زي خنساء تهينه
خالدة.. شن صار معاك
خنساء.. مسكت كتابها قتلهم وتوا يجو
________________________________
رانيا.. شن رايك ف زايد ياداليا
داليا.. مشاء الله عليه لكن الجمال والشخصية واخدهم أمين
رانيا.. قصدك أمين عاجبك
داليا.. تبي الحق ايه يهبل من يوم شفته ف الصور الى بعتوهم لينا وانا حاطة عيني عليه
رانيا .. بضحكة مجاملة وحتى زايد مافيش منه راه
داليا.. كان ماصار من أمين توا نشوف زايد
رانيا.. قصدك انتي هكي جوك
داليا.. العمر ينعاش مرة وحدة وباش ماينكسر قلبي لازم من الإحتياط
رانيا.. ف خاطرها معقولة هدي تفكر هكي المشكلة مزال فرخة ربي يستر وخلاص
خالدة.. نوضي أفتحي الباب
خنساء .. حطت الكتاب وكانت بتطلع
أمين .. هيييي وهوا معصب خشي الداخل
خنساء.. رجعت ع وراها وخشت بدون ماتكلمه
امين.. فتح الباب اوووو عزيز شن الجو
عزيز.. تمام وانت
امين.. ماشية الحمد لله
عزيز.. قول لخالتي هيا خلي نوصلها لحوش بنتها
أمين.. خلاص توا نوصلها انا
عزيز.. غير ناديها نوصلها
أمين.. بكري مافي حد هذا ليش دوروك توا خلاص انا جيت درق وجهك روح
عزيز.. هكي جوك انت 😒😒 نسخن فيك راه
أمين.. 😎😎 قتلك روح انا وقعدو يتصارعو ع الباب ويضحكو
خنساء.. تيتا جدي راقد نوضته ماباش ينوض
خالدة.. معناها مش ماشية انا مانقدرش نسيبه بروحه
خنساء .. لابري انتي وتوا نقعد معاه
خالدة.. متخافيش تقعدي بروحك
خنساء.. مافي شي توا نصكر الباب ونشد كتبي
خالدة.. ربي يبارك فيك يابنتي ولبست وطلعتها للباب
عزيز.. خش سلم ع خالدة
امين.. بالله ياجتي بتركبي معايا ولامع المهبول هذا
خالدة.. منو الى يسوق كويس
عزيز.. ياخالتي أمين سواقته زي وجهه ومرات يقلبها بيك
خالدة..بعيد السو
امين.. شدها من يدها هيا ياجتي راهو عزيز كذاب ومايعرفش يسوق
خالدة.. وصلوني انتو الزوز
عزيز.. يشوف لخنساء شن تقولي انتي بكري
خالدة.. خيرك مع البنت
عزيز.. بكري سألتها انتي بنت موسى قاتلي شن دخلك
خالدة.. عندها الحق تستاهل
خنساء .. دفت نظارتها بصبعها خلاص تيتا بنخش انا
خالدة.. طيبي الشاهي الأخضر لجدك توا ينوض
خنساء .. باهي وخشت
أمين.. حتى الضحك ماتضحك زي الناس
________________________________
مديحة.. وين خنساء
خالدة.. قعدت مع جدها
مديحة.. بروحها
خالدة.. شن بيصيرلها يعني
مديحة.. مابيصير شي لكن قتلها تجي أنا
خالدة.. بتكشيخ حتى نحنا نخافو عليهم وأكثر منك راه
زهرة .. شافت لمديحة خلاص مادوريش نحنا بعد المغرب بنروحو
خنساء.. حولت الشاهي من النار وكيف بتصفيه نكسر المغطى متع البراد وتبزع ع ايدها وقعدت تنقز ف المطبخ
أمين.. باهي ياحبي انتي انا توا قدام الحوش ننزل ندوش وبعدها نتلاقو وين ماتفقنا نحبك وصكر
خنساء.. دور ف المطبخ وتنفخ ع ايدها ودموعها ينزلو
أمين.. خش للمطبخ وشافها واقفة وتنفخ ع ايدها وقرب منها
____________________________
مديحة.. كان تفكيرها ف بنتها وخلاص
زهرة.. خيرك انتي هكي قلقتيني معاك
دلال.. ياماما تعالي حني أهي الحناية جت وكلهم حنو
مديحة.. انا امتى ندير حاجة زي الناس
زهرة.. يالطيف وخلاص البنت مابيصيرلها شي
مديحة.. والله يازهره هم البنات للممات الواحد مايتريح لين يزوجهم
دلال.. غير نوضي وتوا نكلمو بابا يجيبها
زهرة.. خليها نحنا شوي تانية وبنروحو
____________________________
أمين.. خيرك
خنساء.. حولت النظارة الى تعبت دموع وقعدت تمسح ف دموعها شي
أمين.. نحرقتي
خنساء.. حطت ايدها وراها لا
أمين.. تي خيرك انتي هكي شن تحسابيني بناكلك راهو انتي بنت عمي وزي أختي مابنضرك انا هاتي يدك نشوفها
خنساء.. مدتله يدها وهيا تبي تنفجر من البكاء
أمين.. مسكلها يدها وقعد يشوف فيها
خنساء..كانت أول مرة حد يلمس ايدها بحنية نست وجعها وقعدت تشوف لأمين
امين.. حرق خطير هذا وقعد يفتح ف الدولايب
خنساء.. شن دور
امين.. العسل
خنساء.. دور ف العسل وانى واقفة معقولة
أمين.. لحظة صمت من الصدمة
خنساء.. بالك عندك مانع 😒
أمين.. خاطري نفهم من وين جايبة الغرور هذا وأخيرآ لقيته هاتي يدك
خنساء.. مدتله يدها المشاكل الجانبيه خليها ع جنب وبشويا ع يدي لو سمحت
أمين.. يشوفلها وهوا مرقي حواجبه اسسسسس وقعد يحطلها ف العسل وينفخ
خنساء .. كانت عاضة ع شاربها ومغمضة عيونها
أمين.. كان مركز ع ايدها لعند شاف دمعه طاحت ع كم العباية
يتبع
أنت تقرأ
صفحات ممزقة ( روايات ليبية )
Romanceللكاتبة : القطة الشريرة تتكلم عن بنت يعتبرها الناس معقدة و انطوائية و لا تملك اي صداقات و لكن عندما تجد الحب أمامها تتغير 180 درجة ؟ فهل التغير يفيدها ؟ و هل الحب صادق ام لا ؟ و ما نهايتها ؟ قصة جميلة جدا من داخل المجتمع الليبي 🔥
