#صفحات ممزقة
(قصة واقعية)
الحلقة(8)
بقلم.. القطة الشريرة
خنساء.. كيف وصلت لشارعهم وتسمع ف صوت سيارة تمشي وراها بالشوية
بدت تسرع ف خطواتها
الشاب.. بشويا يازلزال الى من شوفتك صار ف قلبي إعصار الله أحد عليك ياقمة افريست
خنساء.. خلاص عصبت دفت نظارتها ووقفت لازم نسب جد أمه وتلفتت يا.... وقعدت مصدومه هذا انت
أمين.. هههههه شن رأيك مفجأة صح
خنساء.. لاااااا وبعدين شن حركات العويل الى دير فيهم توا كان شافك حد تبي تشوهلي سمعتي
أمين.. ستاحشتك
خنساء.. خشت ف بعضها
أمين .. تعالي أركبي نوصلك
خنساء.. لا شن بيقولو عليا الناس بعدين
أمين.. ولد عمك عادي
خنساء.. انا نعرف انك ولد عمي لكن الناس ماتعرفش وفاتت عنه
أمين.. الفرخة هدي قداش تهبل
خنساء.. حاطة ايدها ع قلبها ووتتبسم
_______________________________
موسى.. الو
مديحة.. اهلين
موسى .. وصل أمين
مديحة .. أمين
داليا.. كانت واقفة مع أمها ف المطبخ زعما خيره
موسى.. ايه توا كلمني وخدا مني نعتة الحوش
مديحة.. لاوالله ماجانا حد
موسى.. نتصل بيه مقفل
مديحة.. الباب يخبط بالك هوا
داليا.. وعلامات السعادة ع وجها طلعت تجري فتحت الباب وكانت حنساء هيا
إنتي
خنساء .. ف من كنتي تراجي امالا
داليا.. حد وشافت السيارة درست حي سيارة أمين
خنساء.. وخيرك فرحانة هلباااا
أمين.. نزل وملامحه تغيرو لما شاف داليا واقفة ع الباب
داليا.. ونقول ليش الجو حلو اليوم
أمين.. وهوا يجامل فيها شن جوك وشن أخبارك
________________________________
زهرة.. كان نعرف شن خطر عليه المشية للجبل
رانيا .. نقولك لكن ردبالك تقولي انا خبرتك
زهرة.. شن فيه قولي
رانيا.. ولدك يبي خنساء
زهرة.. ترا فكينا من الكذب متاعك
رانيا.. وحق ربي مانكذب
زهرة.. هيا صح فالحة وناشطة لكن شينة والحق حق
رانيا .. الحب ومايدير
____________________________
خنساء .. تغير ف دبشها والفرحة مش سايعتها وووه حاسة قلبي بيطلع
مديحة.. نورت ياأمين شن حالك وشن أخبارك وشن حال أمك وبوك وجدودك
أمين .. كلهم بخير
دلال.. دسيهم سنونك وبطلي تفنيص ف الولد
داليا.. شفتي كيف ردلي الروح
خنساء .. كانت فايتة للمطبخ
مديحة.. ديري قهوة لولد عمك
خنساء .. ووواك لازم تحطني ف موقف بايخ يعني وقعدت دير ف القهوة
أمين.. كل مايرفع راسه يلقى داليا تشوفله والحركة هدي خلاته مش مستريح
موسى .. السلام عليكم
كلهم وعليكم السلام وقعد يسلم ع أمين
مديحة.. أشرت لبناتها وطلعو
خنساء.. مدت السفرة لدلال خودي أرفعي
داليا.. جت قدامها هاتي أنا نرفع
مديحة.. خليها هيا ترفع وانتي امشي طلعي الفلوس من داري وبري للمحل مع أختك جيبي مشروب ومخلل
خنساء.. خليها ترفع
مديحة.. ارفعي انتي القهوة بردت وانتو بسرعة ديرو شن قتلكم
خنساء.. رافعة السفرة وترعش وعيونها ف السفرة بس ياربي
أمين.. كانو عيونه فيها
موسى .. ااو دبة
خنساء.. فنصت فيه بطريقة عفوية بابا
موسى.. هههههه نسيت وبعدين عادي مافيش حد غريب
خنساء.. مدت القهوة لبوها وحطت السفرة
موسى .. هذا شن مدي لولد عمك
خنساء.. عنده يدين يرفع بروحه وكيف بتمشي
موسى .. تعالي إحكيلي شن درتي ف الإمتحان
خنساء.. قعمزت جنب بوها وقعدت تحكيله
أمين .. كان يشرب ف القهوة ويشوفلها
خنساء .. رفعت عيونها فيه وشافلها وغمزلها وتبسم خنساء توترت وناضت جري للمطبخ
مديحة.. خير بلاك
خنساء.. من التوتر قعدت تغسل ف وجها ف المطبخ
مديحة.. انتي الإمتحانات بيهبلوك
خنساء.. كانت عايشة ف عالم تاني
_____________________________
ف العشية
هاجر وياسمين يخبطو ف الباب
امين.. فتحلهم تفضلو
هاجر&ياسمين شافو لبعضهم خنساء موجودة
أمين.. لحظة بس
هاجر .. محلاه
ياسمين.. هذا من وين جاهم
هاجر.. خوها زعما
ياسمين.. خوها خنساء من غير محرمة
أمين .. خنساء ياخنساء
دلال.. نوضي يناديلك
خنساء.. مشت وهيا ترعش نعم
أمين.. ف زوز بنات حلوات يبوك البرا
خنساء.. فنصت فيه ديل الكلب ديما أعوج
أمين.. محلاك وانتي غيرانة
مديحة.. جت طالعة من الدار تبي شي ياأمين
أمين .. بنات يبو خنساء
خنساء.. هاجر وياسمين هادو وطلعت
ياسمين.. اسمعي لاسلام ولاكلام من هوا السمح الى فتحلنا
خنساء.. طارتلها ولد عمي
هاجر.. ضروري تجيبي الرقم متاعه
خنساء.. هذا مريض ويغسل ف كلاويه وخاطب
ياسمين .. خسارة
خنساء.. هيا خشو توا يجي بابا يعيط عليا
_______________________________
نورة .. قصدي نبي نفهم يازايد ليش مايبيش يرد عليا ليش دار هكي
زايد.. والله شن بنقولك مش عارف أنا نكلمه ونشوفه
نورة.. بارك الله فيك يازايد بس انت خيرك مضايق
زايد.. ماخيرني شي
نورة.. نزعل منك كان تخبي عليا
زايد.. قعد يحكيلها
نورة وزايد اصدقاء من قبل ماتتعرف ع أمين وديما يحكو لبعض ف أسرارهم
____________________________
ف الليل
داليا.. تسشور ف شعرها ودلال تكلم ف خطيبها
مديحة.. خنساء نوضي فرشي لولد عمك ف المربوعة
خنساء.. نقرا مش فاضية
مديحة.. هالخمس دقايق مابينقصو منك شي
خنساء.. اووووف رفعت الفراش والوراغن بالغل وخشت للمربوعه حدفت الفراش وفوقه الوراغن والمخدة
أمين.. ساعدي روحك
خنساء.. نخلعت من وين طلعت انت
أمين .. بدا يقرب منها
خنساء .. ركبت ع الجلسة وقعدت لاصقه ف الحيط وتمشي ع جنب
أمين.. ههههه فتح شنطته وطلع منها هدية مغلفة
خنساء.. تشوفله وهوا يقرب منها ومدلها الهدية
أمين.. خوديها بسرعة قبل مايجي حد
خنساء.. لامانقدرش نرفعها
أمين.. راه نزعل منك ارفعيها قتلك
خنساء .. أزعل ولاطربق مانبيش
امين.. فتح الهدية بغل انتي شكلك مش من النوع الى يتفاهمو معاه بالعقل وطلع منه تلفون البيلة وجبدها من يدها وحطه ليها ف جيبها وسحبها لعند طلعها وسكر عليها الباب
خنساء.. هذا كله مش قادرة تستوعب الى صار وخشت جري للحمام وطلعت التلفون من جيبها ولقت رسالة واصلتها بطلي عناد ياسنفور غضبان توا تشوف مش انا الى تتعامل معايا هكي وقفلت الهاتف ودساته
_______________________________
ف الصبح
خنساء.. لبست بسرعة وطلعت تجري وأول مافتحت الباب وقفها صوت أمين
امين.. صباح النور ياحلوة
خنساء .. صباح الخير
أمين.. ليش قافلة التلفون
خنساء.. وبعدين تلقاه ف المربوعة
أمين.. شن قتلك أنا
خنساء.. مانفهمش وتوا خليني ف حالي متأخرة هلبا اليوم
أمين.. بنمشي معاك
خنساء .. يتبع
أنت تقرأ
صفحات ممزقة ( روايات ليبية )
Romansaللكاتبة : القطة الشريرة تتكلم عن بنت يعتبرها الناس معقدة و انطوائية و لا تملك اي صداقات و لكن عندما تجد الحب أمامها تتغير 180 درجة ؟ فهل التغير يفيدها ؟ و هل الحب صادق ام لا ؟ و ما نهايتها ؟ قصة جميلة جدا من داخل المجتمع الليبي 🔥
