#صفحات ممزقة
(قصة واقعية)
الحلقة(20)
بقلم.. القطة الشريرة
-------------------------------------------------
رانيا.. كيف بندبرلك ترا
أمين.. خليها تركب للسطح
رانيا .. تبي تودرنا ولاشني
أمين.. دبريلي المهم نبي نكلمها
رانيا.. مادخلي بنقوللها أمين بيحكي معاك تبي باهي ماتبيش خلاص
أمين.. لا ماتجيبي سيرتي بكل
رانيا.. أوووف امين
-----------------------------------------------
خنساء.. يما جبتي جوازي
مديحة.. الحق لا ماجبتهم
خنساء.. عندك علم ضيعتي عليا فرصة الركوب ف الطيارة
حدهم.. ههههه قبل بتجي معانا
خنساء.. ايه هكي قال خالي عبد السلام نرفعوك معانا ونروحو بيك نحنا
مديحة.. الله غالب مش كاتبة
خنساء.. ليش ماجبتيه باه
حدهم .. كان جيتي لغريان توا نجي انا وخالك ونجيبوك لطرابلس
مديحة.. بوها مابيخليها
حدهم .. مابيقول شي توا انا نكلمه
خنساء.. أحسن خالة وحق ربي
حدهم.. ههههههه وين فاضل شفتيه
خنساء.. اي تغير الحيوان مولي زي متاعين المسلسلات
حدهم.. قربت منها شن رايك نزوجوكم لبعض
خنساء.. شهقت ههههه مزال قاعد عندي عقل
حدهم.. وخيره فاضل
خنساء.. لامستحيل توا انا قرايتي وبس
حدهم.. غير زيدي فكري
مديحة.. شن توشوشو
خنساء.. شي
--------------------------------------------
فاضل .. مكسد ف الجنان وفاتح النت
خنساء.. جت من وراه ياااععععع
فاضل .. نخلع يافرخة
خنساء.. ههههههه خواف
فاضل .. ناضلها وقعد يجري فيها وشدها من شعرها
خنساء..لالالا شعري
فاضل .. قعد يكر فيها وقعد يربطلها فيه ف الشجرة
خنساء.. ياحيوان وخلاص فاشلة من الضحك
فاضل.. توا نوريك اليوم تكرهيه شعرك
خنساء.. خلاص بالله يابابا ياأهل النخوه تعالولي
فاضل.. فتح تلفونه وقعد يصور فيها فيديو سوني أنبحي شوي عشان يطلع الفيديو حلو
خنساء.. حطت ايديها ع وجهها ماتصورني لااااااا
فاضل.. بنوريه لخوالك شن تحبي تقوليلهم
خنساء.. جايتكم لطرابلس قريبآ باش ترفعوني للبحر والملاهي
فاضل.. هههههه باهي حولي يديك وريهم كيف طرحتي الأحمال
خنساء.. شتركت ف برنامج الرابح الأكبر
فاضل.. هههه هكي تمام وسكر الفيديو هيا باي
خنساء.. لااااا تعال فكني توا يخشو الرجالة يشوفوني هكي
فاضل.. خش الداخل
خنساء .. يابابا يابابا
موسى.. كان نازل من السيارة هوا ومحمود وخوال خنساء كأن فيه صوت حد ينادي وخشو بسرعة
خنساء.. يابابا انا هنا
موسى.. شن ديري هنا
خنساء.. فاضل ربطني هنا
كلهم يضحكو
عبد السلام.. قعد يصور فيها
موسى.. قعد يفتحلها ف شعرها وكان معقود
محمود.. رابطه ربطة بنت كلب
أمين.. نزل من السيارة ولقاهم متجمعين شن فيه
خنساء.. ماتبيش تشفوله
موسى.. لازم نقصوه
خنساء.. لااااااااا شعري لا
فاضل .. قعد يسمع ف الدوشة طلع خيركم شن فيه
خنساء.. اهوا خدولي حقي منه مادخنيش
فاضل.. خيرني شن درت
عبد السلام.. شن لعب الصغار ليش ربطتها البنت هنا
فاضل.. انا توا بس كيف ريتها
خنساء.. كذاب اسألو راسه التاني
موسى.. جيبو مقص
فاضل.. ليش المقص وطلع ولاعته نتشو فيها النار وتنحل القصة
خنساء.. والله توا تشوف
أمين.. خش وجاب مقص مش عارف ليش لاصقة فيه هالفرخ أبرد منه مافيه
خنساء.. ماسكة دموعها ماتبيش تبكي بحدا حد اسمع بابا قص العقدة بس
موسى.. قعد يقص ف العقدة وتحررت خنساء
عبد السلام.. حمد لله ع سلامتك
فاضل.. اكتبي دكرى ع الشجرة هههههه
خنساء.. تمسس ف شعرها الحمد لله مش ناقص هلبة
محمود.. بالها ف شعرها هيا
خنساء.. تشوف لفاضل توا تشوف باهي 😒 وخشت
--------------------------------------------------
داليا.. خشت للدار ولقت زايد فاتح الدولاب ويطلع ف دبشه زايد
زايد.. نعم
داليا.. ممكن نحكي معاك قبل مايجي حد
زايد.. أكيد
داليا.. أنا أسفة ع كل شي درته معاك وع معاملتي بس ليا فترة نفكر بيني وبين نفسى انتي غلطت لما ماعطيتك فرصة وبعد تردد منها قالت عادي نفتحو صفحة جديدة
زايد.. شن بنقولك ياداليا هوا انتي جيتي متأخرة الحق لأن قلبي خداته وحدة تانية بس انا ولد عمك ومقام خوك وتبي أي شي قوليلي
داليا.. تجمعو الدموع ف عيونها وطلعت وسيباته
زايد.. سامحيني ياداليا
----------------------------------------------
رانيا.. كانت تراقب ف الوضع وتراجي ف الفرصة باش تبعت خنساء للسطح
خنساء.. الله ريحة فتات
دلال.. فتات الجنوب حتى هوا
خنساء .. نبي دحية وفتحت الثلاجة
دلال.. توا بنتغدو
خنساء..نبيها ف موضوع تاني بعدين توا تعرفوه
طاب الغداء وتغدو
رانيا وخنساء يغسلو ف الماعين
دلال.. نعاونكم
خنساء.. لاااااااااا بري ضمي الديار
رانيا.. الجماعة الى الداخل شن يديرو
دلال.. رقدو
رانيا .. مسكت تلفونها وبعتت مسج لأمين
أمين.. قرا المسج وركب للسطح
رانيا.. طلعت البرا وغسلت البخشات
خنساء.. تغسل وتفكر كيف بتنتقم من فاضل
رانيا.. حبي خنوس أركبي للسطح وانشريهم باش يجفو بسرعة
خنساء.. بري انتي نكره أمه سطحكم كان درتوه بار احسن
رانيا.. وراسك هاتي نغسل عنك
خنساء.. البخل متاعك وركبت وهيا راكبة من الدروج ياخوفي نلقى هذاك الواطي مع وحدة اكيدا حاننجلط المرة هدي
أمين.. واقف خلف الباب باش اول ماتركب يسكر عليها وياخد راحته ف الكلام
خنساء.. كانت لابسة سروال أمريكي وبلوزة وردية وضافرة شعرها ضفيرة 6 حطت المحبس وكيف بترفع البخشة سمعت صوت الباب تسكر وشافت وراها وقعدت واقفة تشوف وساكتة
أمين.. حط المفتاح ف جيبه لازم تسمعيني
خنساء.. بكل ثقة ربعت إيديها وضحكت بهزوة انت منو باش انا نسمعلك
أمين.. قرب منها انا حبيبك الى كنتي تحبيه وتتصلي بيه ومش قادرة تعيشي من غيره والى مازلتي تحبيه
خنساء.. يععععععع يعععععععع معاش دكرني لأنى نستحقر ف نفسي لما ندكر انى عطيت قلبي لواحد زيك بس الحمد لله لأن ربي وقضني قبل مانغلط ونكمل معاك
أمين.. الكلام هذا مش من قلبك
خنساء.. صدقت الكلام هذا مش من قلبي
أمين.. كنت
خنساء.. قصت عليه كلامه من أعماق قلبي الكلام هذا ماتكون تحسابني مازلت نفكر فيك ولانحبك يامسكين انا تجاوزتك من زمان يعني مافيش شي يخليني نفكر بواحد نسونجي عيل ماعنده درة رجولة
امين.. عصب احترمي نفسك
خنساء.. نحترمها مع ناس تستاهل الإحترام أختي مالقيت حد ف الدنيا الا أختي تعرف ندعي من ربي ان ثريا ماتجيبلك بنات لأن الى زيك ينخاف منهم يعني مش بعيدة تستفرد بوحدة من بناتك مسكينات
أمين.. ضمي فمك انا مش هكي
خنساء.. بكل برود حاجة تخصك وتوا افتح الباب بكرامتك
أمين.. كنت نبي نتأسفلك ونقولك انى ندمان بس بعد كلامك هذا وربي توا تندمي
خنساء.. مش زي ماندمت لانى كنت مع واحد زيك مقرف وزبالة افتح افتح
أمين.. فتح الباب وهوا معصب ونزل بدون مايشوف وراه
خنساء.. أنا قلت الكلام هذا مش مصدقة وخدت تلفونها ورنت ع دعاء وخبرتها
------------------------------------------------
دعاء..رررررروووررري والله تعجبيني ياقلبي ياريتني معاك وشفت منظره الواطي
صابرين.. يستاهل الكلب خير مادرتي فيه توا معاش يفكر يجي جيهتك
دعاء.. وهيا واقفة ع السرير بالله احكيلي ع تعابير وجهه كيف وشن كانت ردت فعله
-------------------------------------------
دلال.. انتي بروحك
رانيا.. ايه
دلال.. وين خنساء
رانيا.. خنساء توا تجي تنشر ف البخشات
دلال.. تمام بنحكيلك حاجة صارت معايا
رانيا.. خير ان شاء الله
دلال.. كلمتني نورة وقاتلي انى عاجبة خوها عزيز ويبي رقمي
رانيا.. بجديات
دلال.. ايه توا كلمتني شن رايك انتي
رانيا.. والله عزيز ولد كويس وخوتي يحبوه الحق وانتي شوفي روحك
دلال.. خايفة يطلع مش جدي
رانيا.. لامانتوقعش انتى أعطيه فرصة
دلال.. هكي رايك
رانيا .. اي الحق
دلال.. معناها نرد عليها بعد يومين ثلاته
--------------------------------------------------
أذن العصر
وناضو.. الرجالة مشو للجامع
خنساء.. صلت العصر وخدت دورة ع الحوش وكانت معصبة من رانيا وفاتت ع المربوعة ولقت فاضل راقد نوم الظالم عبادة ياولد خالتي توا نوريك
دلال.. خشت دوش
داليا.. شادة فراشها ع اساس مريضة وهيا مقهورة من الى قاعد يصير فيها
خنساء.. خشت للمربوعة بشويا وقربت ع فاضل وطلعت الدحية من جيبها وضربتها ع وجهه
فاضل.. ناض مقعمز ومش فاهم شي
خنساء.. ههههههههه البيض كويس لشد البشرة
فاضل .. ياواطية ياسخيفة ياباردة يعععع توا عاجبك الزفرة الى انا فيها
خنساء.. هههههه محلاك
فاضل.. توا نوريك ياقردة
خنساء .. تسمع ف أمها تنادي وطلعت جري
فاضل خش جري للحمام وقعد يدوش حيوانة الفرخة هدي
----------------------------------------------
أمين.. كان قاعد ف المزرعة ومضايق هلبة من كلام خنساء أول مرة حد يهنيه ويقلل من قيمته وأكثر شي وجعه كلمتها متع ندعي من ربي ثريا تجيبلك ولاد لأنك حاتستفرد ببناتك
--------------------------------------------------
رانيا.. خنساء انتي زعلانة مني
خنساء.. شن رايك يعني
رانيا.. وحق ربي انا رفضت بس هوا قعد شاد ف الموضوع
خنساء.. مش عارفة شن يبي مني خوك مش خطب ليش قاعد لاصق فيا
رانيا.. راهو خوي نادم لأنه خسرك
خنساء.. حاجة ترجعله انا فهمته يبعد عن طريقي وانتى زيدي فهميه
رانيا.. أهم شي ماتزعلي مني
خنساء.. تعاوديها نزعل منك
رانيا.. أخر مرة التوبة
----------------------------------------------------
بعد 4 ايام
روح فاضل وهوا تفكيره ف خنساء
وبعده بيومين رجعت خنساء للداخلي
امين.. طول الفترة الى فاتت مارجعش للحوشهم بكل وقافل تلفونه
---------------------------------------------
خنساء.. والبنات يتغدو ف المطعم
دعاء.. أسمعي ياخنساء انتي لازم تعطي لحسين فرصة وتسمعيه
خنساء.. وليش يعني
دعاء.. انا الحق يومها خديت رقمه وتصلت بيه باهي
صابرين.. انتي من يقدرك بس
دعاء.. غير أسمعي بس هوا حكالي قصة البوسة قال انه ضارب عناد مع الولاد وستفزوه الولاد خصوصآ انهم اصغر منه وكان خايف يطيح قدره وغصبآ عنه باسك
خنساء..قوله قدرك طاح لما درت الحركة الحقيرة متاعك
دعاء.. نحنا كلنا نغلطو وماحد معصوم
خنساء.. انا مانقدرش نحكي مع واحد زيه تافه وحقير ولاد اصغر منه يأثرو عليه
دعاء.. والله هوا نادم يابنت ويبي يتأسف شن المشكلة كان سمعتيه
خنساء.. وانا مانبيش نسمعه
دعاء.. علمانك ووحلنا فيك
صابرين.. انتي شن واجعك
دعاء.. الحق لأنه نادم وباين عليه الولد محترم وحتى أسلوبه راقي
خنساء.. حاجة ترجعله
دعاء.. صامطة 😒😒
----------------------------------------------------
زهرة.. بسم الله هذا شنو صوت التقربيع
خالدة.. لاحول الله خير إن شاء الله
رانيا.. ووووه يما صوته قريب
زهرة.. خدت التلفون الوو يازايد هذا شنو الدق
زايد.. عركة بين التبو والتوارق وربي يستر
زهرة.. روحو روحو
زايد.. هيا شويا بس
ونقلبت أوباري
---------------------------------------------
خنساء.. معقمزة مع صابرين بعد ماالدكتور عتذر عن المحاضر بالله توا بنراجو الباص للساعة 5
صابرين.. ياريته اليوم توكت عمي محمود كان هذا جانا طول
خنساء.. الكلية فاضية تخوف هيا نمشو للكفتيريا عطشت
صابرين.. هيا هييي وناضو مشو
خنساء.. فيه صوت غريب ورا الشجرة
صابرين.. ماسمعت شي
خنساء.. صوت قطوس شكله عالق ومشت ورا الشجرة وشهقت
كانو فيه ولد وبنت يبوسو ف بعض وعايشين اللحظة
الولد.. يا...... 🔞
خنساء.. بخوف اسفين
الولد.. قعد يجري فيهم ويسب
صابرين.. يما يما
خنساء.. تجري وتشهد
حسين.. كان جاي للكلية بحكم الداخلي متاعهم لاصق ف الكلية عشان يرجع المدكرة للبنت ويشوف الولد يجري ف خنساء وصابرين
يتبع
أنت تقرأ
صفحات ممزقة ( روايات ليبية )
Romantizmللكاتبة : القطة الشريرة تتكلم عن بنت يعتبرها الناس معقدة و انطوائية و لا تملك اي صداقات و لكن عندما تجد الحب أمامها تتغير 180 درجة ؟ فهل التغير يفيدها ؟ و هل الحب صادق ام لا ؟ و ما نهايتها ؟ قصة جميلة جدا من داخل المجتمع الليبي 🔥
