#صفحات ممزقة
(قصة واقعية)
الحلقة(7)
بقلم.. القطة الشريرة
خنساء .. أحسن من حالك
أمين.. ضحك ليكم وحشة
خنساء.. شهقت بصوت عالي وسكرت عليه
أمين.. مد التلفون لرانيا وقعد يضحك
رانيا.. تشوفله هوا وزايد حد يفهمني شن هوا الى صار
زايد.. خوك بدا يحب
رانيا.. هوا معروف انه وين ف حاجة أنثى يحبها لكن خنساء مش مصدقة
أمين.. خدوده حمر زي بيكاتشو انا بروحي مش مصدق
_____________________________
دلال .. خيرها سكرت
خنساء.. كلمة أمين قعدت تتردد ف وذنها ليكم وحشة ليكم وحشة
دلال .. نكلم فيك وليش حادفة تلفوني هكي
خنساء.. شبحتلها شي شي وناضت طلعت
دلال.. خير عمها هادي
_______________________
هاجر.. ألو ياسمين
ياسمين.. أهلين
هاجر.. شني قريتي
ياسمين.. انا بإذن الله بنغش
هاجر .. عينك بتشد علينا لجنة من مدرسة تانية
ياسمين.. قصدك مش مدرسينا
هاجر.. ايه
ياسمين.. وووووواك الهم توا كيف الحل
هاجر.. شن رأيك نصاحبو خنساء الفترة هدي
ياسمين.. انا تبيني نصاحب الغوريلا باش الولاد يضحكو عليا
هاجر..تي ياحيوانة ماه باش ننجحو
ياسمين .. تمام
هاجر.. غدوة نمشولها ف الحوش
ياسمين .. تمام
________________________________
أمين.. راقد ف فراشه ويدكر ف منظر خنساء وحركاتها ويتبسم
أما خنساء .. قرت كلام أمين الى مكتوب ع الكراسة أول مرة تحس بالإهتمام والحنية أول مرة حد يفهم عليها وكتبت جنب المجهول أمين ورسمت قلب وسهم
_____________________________
فاتو الأيام وأمين ماقدرش ينسى خنساء زي ماتوقع وقرر إنه يمشيلهم عشان يشوفها
أما زايد فكان زعلان لأن داليا رفضاته وتسبلت بقرايتها
اما.. خنساء فرحانة بصحبت هاجر وياسمين وحتى هيا مانست أمين وديما تفكر فيه
____________________________
خنساء .. ترعش وخايفة لأن غدوة أول يوم ف الإمتحانات ومسكرة ع روحها الدار وتقرا
رانيا.. شن أخباركم
دلال.. الحمد لله كساد وخلاص
رانيا .. بالله قنعو عمي وتعالو بعد تكمل خنساء الإمتحانات
دلال.. والله عمك هذا مسكر راسه
أمين.. رانيا ف من تكلمي
رانيا .. دلال
أمين.. عيونه😍😍😍 وجري جاب ورقه وقلم وكتبلها قوليلها تعطيك خنساء
رانيا .. تفنص فيه
أمين.. هيااااا
دلال.. ألو وين مشيتي
رانيا.. معاك عطيني خنساء نسأل عليها
دلال.. تمام شوية هي هيا أشبح وين مسكره ع روحها مانشوفو فيها بكل
رانيا.. عندها الحق
دلال .. فتحت الباب وخشت ع خنساء
خنساء.. ووواك ليش ماخبطتي طيرتي المعلومات بخشتك هدي
رانيا .. حاطة السماعة ع ودن أمين تبيه يسمع خنساء كيف تعيط
دلال.. كانك حافظة كويس ماعندهم وين يطيرو
خنساء.. انا ليش مصكرتها الدار واضحة مانبيكم تخشو
دلال.. غير سكري فمك رانيا بتكلمك كملتلها الرصيد
خنساء.. خدت التلفون
دلال.. لما تكملي بيه مديه
رانيا.. اهلين خنوس شن الجو
خنساء .. تمام وإنتي
رانيا ..انا تمام لكن ف ناس مش تمام
خنساء .. ناس مني بسم الله
رانيا.. أهما معاك
أمين.. الو
خنساء.. 😳😳😳 هذا أمين ياحليلي
أمين.. وهوا يضحك ليش يحليلك
خنساء.. تقرا ف الأفكار انت ولاشن
أمين.. لابس إنتي قلتيها بصوت عالي وتباعد عن أخته شن جوك وشن أخبارك
خنساء .. دفت نظارتها تمام وإنتو شن أخباركم
أمين.. نحنا بخير والحمد لله شني مستعدة للإمتحانات
خنساء.. لااااا ايه مش عارفة
أمين.. معناها غير هكي تشدي ف كتبك عندنا كنتي توري ف فلاحتك
خنساء.. شن نوري ف فلاحتي مانيش ف مبارة وبعدين عقلي أكبر من الحركات التافهة الى تحكي عليها
أمين.. خلاص خلاص نبصر عليك خيرك إنتي هكي
خنساء .. لأنى هكي
أمين.. ماتبيش ديري هاتف باش نسأل عليك بدل مانقعد متمرمد هكي
خنساء.. وليش بتسأل عليا يعني
أمين.. لأنى نستاحش فيك يابنت
خنساء.. حطت ايدها ع فمها ووقفت كان قلبها يدق بقووووة وف نفس الوقت بطير من الفرحة
أمين.. وين مشيتي
خنساء.. قاعدة
أمين.. شوفي أنا ولد صريح راه وماتقولي يلعب عليا شهادة لله كنت متوقع أول ماتروحي ننساك لكن ماقدرتش نتخيل فيك ديما ف الحوش وديما نفكر فيك وعن قريب بنجيكم
خنساء.. ليش جاي
أمين .. نزل راسه وضحك باهي باه يعني الكلمه هدي بس لفتت نظرك
خنساء.. وهيا تبي تطلعله من التلفون من كثر الفرحة لكن تحاول انها ماتكون خفيفة ايه
أمين.. نبي نشوفك
دلال.. انتي يافرخه هيا هاتي التلفون
خنساء .. سكرت ع أمين
دلال.. ساعة تهدرزو شن تحكو
خنساء.. كلوف والشغلة شن دخلك
دلال.. بنحكي معاك ف موضوع حقا
خنساء .. شنو
دلال.. مش ملاحظة ان أختك داليا متغيرة
خنساء .. إيه ديما ساكتة ومانعرفش خيرها
دلال.. خيرها زعما من لما روحنا من أوباري وهيا هكي
خنساء .. كلميها انتي وأسأليها
دلال.. كلمتها قاتلي مافيا شي
___________________________
زايد.. مكسد ف المزرعة وقعد يفكر ف داليا ولأنه قلبه تحكم فيه بعتلها رسالة ممكن نحكي معاك
داليا.. وهيا تقلب ف التلفزيون وصلتها رسالة زايد قرتها وسكرت التلفون مانقصني غير انت
___________________________
بدو الإمتحانات
ياسمين .. أسمعي خنساء كان اللجنة ساهلة بدلي الأوراق معانا تمام
خنساء.. بس هذا غش
هاجر.. عارفينا بس انتي صاحبتنا ولازم تساعدينا ولامعاش تكلمينا
خنساء..خافت انها تخسرهم بعد لقت من يعبرها تمام
___________________________
فاتو ثلاتة الأيام الاولات ع خير وخنساء راضية ع روحها
هاجر.. خنساء ماتقولليش خيره حسين ديما يشوفلك
خنساء.. بنوع من التوتر حسين لاااا وين
ياسمين.. خيرك خفتي يعني الفصل كله ملاحظ نظراته ليك
خنساء.. مانعرفش مانندريش سلام بنروح توا وطلعت من المدرسة وكانت تراجي غير أمتى توصل للحوش
ياسمين .. خيرها
هاجر.. وراسك الا فيه سر
_____________________________
خنساء.. كيف وصلت لشارعهم وتسمع ف صوت سيارة تمشي وراها بالشوية
...يتبع
أنت تقرأ
صفحات ممزقة ( روايات ليبية )
Romanceللكاتبة : القطة الشريرة تتكلم عن بنت يعتبرها الناس معقدة و انطوائية و لا تملك اي صداقات و لكن عندما تجد الحب أمامها تتغير 180 درجة ؟ فهل التغير يفيدها ؟ و هل الحب صادق ام لا ؟ و ما نهايتها ؟ قصة جميلة جدا من داخل المجتمع الليبي 🔥
