#صفحات ممزقة
(قصة واقعية)
الحلقة(28)
بقلم.. القطة الشريرة
--------------------------------------------------
خنساء.. شن هوا كيف صار وبدت تبكي
صابرين.. خيرك
خنساء.. خالي عبد السلام دار حادت
صابرين.. وشن حاله
خنساء.. ف العناية قاعد
صابرين.. لاحول لله إدعيله حبيبتي ان شاء الله خير
خنساء.. ان شاء الله
---------------------------------------------------
ثريا.. سامحيني ياماما مانبيش نطلع من هنا وانتي زعلانة مني
مفيدة.. قيمي حوشك وراجلك وأسمعي كلام خالتك
ثريا.. وهيا خانقتها العبرة وتتكلم بالله عليك ياماما سامحيني وتكبلها ع راسها ويديها
مفيدة.. تبكي ومقهورة ع بنتها اطلعي خلاص الناس تراجي فيا
إبراهيم .. خش أطلعي بسرعة كان مش حرام راهو طلعتك ليهم زي الكلبة ياحيوانة من هالحظة حوشي محرم عليك ليوم الدين
ثريا.. يابوي لابالله عليك
إبراهيم.. لاأنا بوك ولاإنتي بنتي اطلعي بسرعة
منتهى .. واقفة بعيد وتبكي ع أختها
-------------------------------
موسى.. زايد انت أركب معانا وخلي امين مع ثريا
زايد.. تمام
ثريا .. طلعت وهيا تجر ف روحها جر وكانت منزلة الوشاح هلبة ع وجها
محمود.. أمين افتح الباب لمرتك
أمين.. وهوا مسبوه وعقله مش معاه وكأنه خاش ف غيبوبة فتحلها وركبت
موسى.. هيا بالسلامة ياإبراهيم نشوفوك ع خير
إبراهيم .. طريقكم بيضة
--------------------------------------------------
مديحة.. نار والعة فيا ع وخي نبي نشوفه
زهرة.. لاحول لله المصايب كان جت تجي مع بعضها
دلال.. كلمتني خنساء بكري حالة صايرة فيها
مديحة.. حتى بوك ماردش عليا قبل نبيه يمشي ويشوفه
زهرة .. إدعيله إدعيله
----------------------------------------------
خنساء.. وهيا تبكي ودعاء وصابرين يهدو فيها رن تلفونها
دعاء.. خالتو
خنساء.. خطفت منها التلفون ايوا خالتي
حدهم .. وهيا فرحانة الحمد لله خالك فتح عيونه وحاله باهي واحتمال غدوة يطلعوه من المستشفى
خنساء.. الله يبشرك بالخير وبالله عليك طمنيني عليه أول بأول
حدهم .. ان شاء الله خلي نكلم امك نطمنها حتى هيا
خنساء.. تمام باي
صابرين.. طمنتي توا
خنساء.. الحمد لله
دعاء.. معناها نوضي تغدي هيا
خنساء.. والله ماعندي نية
دعاء .. قلنا هيااااا خالك وحاله باهي وحتى انا زعلانة عليه أكثر منك لكن كليت عشانه
خنساء.. ههههه باهي تمام
----------------------------------------------------
حسين.. مسند ع السرير ويفكر ف خنساء هيا سامحتني بس قاعد نفكر فيها معقولة يكون هذا حب يعني معقولة نكون حبيتها لكن هيا مش حاتتقبلني حتى كان صارحتها واحتمال كبير تكره حتى شوفتي أحسن شي ندس بقلبي وخلاص
----------------------------------------------------
ثريا.. كانت طول الطريق وهيا تبكي
أمين.. يسوق بدون ولا أي كلمة
---------------------------------------------------
عزيز.. وهدي درج
عيشة.. الحمد لله الى وصلنا ع خير
نورة.. تعرف نعتة حوش خالتي خالدة
عزيز.. خلي نتصل بعزو
عزو.. ها ياخال
عزيز.. مش قتلك ديرلي استقبال ياحيوان
عزو.. وحق الله نسيتك ياخال هيا جيتك
عزيز.. نحنا ف بداية درج
عزو.. تم وقبل مايطلع يما سخنو الغداء خالتي عيشة وصلت نمشي نجيبهم ونجي
رانيا .. تمام باه
--------------------------------------------------
زهرة .. ياقهرتي شن بيقولو عليا لما بيسمعو
مديحة.. قوليلهم كل شي صار بسرعة بسرعة
زهرة.. ماحد بيصدقها
مديحة.. ربي يستر وخلاص معاش تفكري خلاص
--------------------------------------------------
ف المغرب
موسى.. حمد لله ع سلامتكم
كلهم الله يسلمك
ثريا .. نزلت من السيارة ونزل بعدها أمين
زايد .. سيارة عزيز
محمود.. والله طارو من بالي إنهم جايين اليوم
موسى.. هيا تفضلو هيييي
رانيا.. يما وصلوو
مديحة.. زغرطي زغرطي حرام تخش للحوش هكي
زهرة.. لساني معقود يامديحة
سارة .. رررورري ررررورري
خالدة.. تزغرطو ع العار
عيشة.. لا ياوخيتي الى صار صار توا خلاص الله غالب
خالدة.. وهيا تمسح ف دمعتها من طول عمرنا ماشيين والناس تحلف بروسنا اليوم بعد هالعملة من بيقدرنا
عيشة.. الناس كلها تغلط
---------------------------------------------------
أمين.. واقف جنب ثريا وروسهم ف الأرض
موسى.. هذا ولدك وهدي عيال ولدك يازهرة ومن اليوم هيا وحدة من العيلة ردبالك منها وحبيها زي رانيا وخلاص الى صار ماضي وتم
ثريا.. طاحت ع مفيدة سامحيني ياخالتي والله ماقصدنا
زهرة.. وجعتها ثريا وحضنتها خلاص يابنتي الله غالب الى صار صار توا
أمين.. باس ع راس امه سامحيني يما والى تبيه انا فيه
زهرة.. مسامح ياولدي وقعدت تزغرط والدموع ف عيونها
----------------------------------------------------
خنساء.. كل شوي كانت تطمن ع خالها
صابرين.. وصلها مسج وفتحاته وقعدت تنقز
دعاء وخنساء .. خيرك
صابرين.. ولد عمي باعتلي مسج
دعاء.. ترا شن كاتبلك
صابرين.. السلام عليكم انا هيثم ولد عمك الصراحة ديما نشوف فيك ف الكلية ونبي نكلمك ونخاف تفهميني غلط انا معجب بيك وبشخصيتك وياريت تعطيني فرصة نقرب منك
دعاء.. ياسلام ياسلام صابرين بتكبد
خنساء.. هههههه مش قتلك بتتزوج قبلنا وبتخلينا عوانس
صابرين .. يابايخات
دعاء.. ماتردي طول خليه لبعد الإمتحانات
خنساء.. ايه عدبيه ردبالك تكوني متاحة وسهلة المنال زينا
صابرين.. تم
---------------------------------------------------
منتهى.. يما تعشي حرام عليكم تعذبو ف رواحكم
مفيدة.. بوك وين
منتهى.. من بكري ماطلع من داره وحتى هوا من امس ماحط شي ف فمه
مفيدة.. هاتي سفرته خلي نرفعله
منتهى.. تمام
---------------------------------------------------
رانيا.. بنمشي حتى انا
زهرة.. وين ماشية
رانيا .. نوصلو العرسان لحوشهم
مديحة.. خليها تمشي بينها
رانيا.. طلعت جري
الشباب دارو موكب لأمين وثريا ووصلوهم لحوشهم
نورة.. سخفتني ثريا الحق
دلال .. ايه حتى انا والله الى هيا فيه صعب
----------------------------------------------------
خنساء.. رن تلفونها هدي داليا وردت وهيا مستغربة الو
داليا.. السلام عليكم
خنساء.. وعليكم السلام
داليا.. خديتيهم بنيتك ياوخيتي وتقول فيها وهيا تبكي
خنساء.. كيف مافهمت
داليا.. نبيك تسامحيني ع كل شي
خنساء.. فهميني شن تقصدي
داليا.. أمين وثريا شدوهم مع بعض وعقدو عليهم واليوم جابوهم شوفتهم وهما مدلولين ومكسورين خلتني نعرف ان لكل ظالم نهاية وان دعوة المظلوم ماتتردش سامحيني ياوخيتي انا أكثر وحدة كسرتك وزعلتك والله نادمة وحق الله نادمة ع كل شي
خنساء.. كانت مصدومة من الكلام الى سمعاته ودموعها نزلو مسامحة دنيا وأخرة مسامحة
داليا.. قعدت تبكي بصوت عالي
خنساء.. صكرت الخط ومسحت دموعها الحمد لله ياربي الحمد لله ع كل حال
دعاء.. شنو
خنساء.. ربي خدالي حقي ف نفس اليوم الى تبلا فيه عليا ربي فضحه وشدوه مع ثريا
صابرين.. إحكيلنا
خنساء.. بدت تحكيلهم
--------------------------------------------------
ثريا.. حولت عبايتها وقعمزت جنب أمين الى كان مقعمز ف المربوعة ويدخن ليش ماتبيش تحكي معايا كأنك تلوم فيا أنا
أمين.. ينفخ ف الدخان ومايبي يشوفلها
ثريا.. أمين حرام عليك والله حرام نحنا الزوز غلطنا راه ماتتعاملش معايا هكي
أمين.. بدون ولاكلمة
ثريا.. ناضت من جنبه وخشت للدار وقعدت تبكي لعند خداها النوم
أمين.. كان تفكيره كله ف خنساء
-----------------------------------------------
فاتو الأيام
عبد السلام.. طلع من العناية وحاله كويس
خنساء.. كانت تقري ف حسين وجعفر و جوهم كله ضحك من مقالب جعفر
أمين .. يطلع من الصبح ومايرجع لأخر الليل
ثريا.. طول الوقت تبكي وخلاص
عزيز.. طلب دلال رسمي وبوها وافق
-------------------------------------------------
خنساء.. طلعت من قاعة الإمتحان وهيا فرحانة الحمد لله اليوم أخر يوم ف الإمتحانات وأخيرآ
صابرين.. طلعت بعدها وحضنتها كلها جاوبتها
خنساء.. حتى أنا وخدت تلفونها ورنت ع دعاء
خنساء.. دعاء جاوبتي
دعاء.. لااااااااا بس حصلت رقم المراقب
صابرين وخنساء.. هههههه
دعاء.. نحكو بعدين مش فاضية انا الطروف محاوطيني
خنساء.. تمام توا ينفعوك وصكرو
صابرين.. تعرفي متحشمه ان بوك بيروح بينا وبوي مش جاي
خنساء.. بويا زي بوك عادي
صابرين.. توا بتروحي وبتشوفي أمين
خنساء.. منو أمين
صابرين.. هههههه اي نسيتيه لكن مش لهدرجة
خنساء.. لهدرجة ونص خلاص أمين ليس عنده وجود ف حياتي
صابرين.. الله حيووو
خنساء.. هيا ناخدو دورة ف الكلية بالك نشوفو هيثم
صابرين.. اسكتي مادكريني اول ماطلعت من الإمتحان لقيته باعتلي رسالة جاوبتي
خنساء.. خلاص لازم تحني عليه
------------------------------------------------
مديحة.. دلال كلمي بوك شوفيه وين وصل
دلال .. تمام هي
أمين.. وينه عمي هوا
مديحة.. ماشي بيروح بخنساء
أمين.. ف خاطره واخيرآ حاتجي
----------------------------------------------------
جعفر.. قوللها
حسين.. مرات تكرهني
جعفر.. ومرات حتى هيا تحبك
حسين.. لا خليه حب من طرف واحد راضي بيه
جعفر.. مبردك غير برا ياراجل وانا معاك راهو الدنيا تنعاش مرة وحدة ماضيعش الفرصة
حسين.. تمام بنمشي نقوللها والى يصير يصير
يتبع
أنت تقرأ
صفحات ممزقة ( روايات ليبية )
Romanceللكاتبة : القطة الشريرة تتكلم عن بنت يعتبرها الناس معقدة و انطوائية و لا تملك اي صداقات و لكن عندما تجد الحب أمامها تتغير 180 درجة ؟ فهل التغير يفيدها ؟ و هل الحب صادق ام لا ؟ و ما نهايتها ؟ قصة جميلة جدا من داخل المجتمع الليبي 🔥
