صفحات ممزقة ( روايات ليبية )

حلقة 15🔥

#صفحات ممزقة
(قصة واقعية)
الحلقة(15)
بقلم.. القطة الشريرة

خنساء.. خدت التلفون الو
امين.. خنساء ورحمة من عندك غالي ماتسكري لين تسمعيني
خنساء.. الكلام الى بيني وبينك مات من زمان ومايشرفني نسمع واحد زيك
أمين.. خنساء غير أسمعيني
خنساء.. فصلت عليه وقعدت تبكي
الحب يتعوض لكن الكرامة مستحيل تتعوض
دلال.. خشت ع خنساء ولقتها تبكي
خنساء.. قعدت تمسح ف دموعها
دلال.. شن قالك
خنساء.. شي
دلال.. كان تحبيه ويحبك ليش تعذبو ف رواحكم
خنساء.. فوتيه الموضوع خلي نطلعو
دلال.. هياااا
أمين.. حس انه خسر خنساء
---------------------------------------------------
فاتو الأيام والشهور وجاء شهر10
مديحة.. تعاون ف خنساء الى قاعدة ضم ف دبشها ردبالك من السحر ومتخالطي مع البنات وماتكلي كل شي
خنساء.. باهي ماني صغيرة
مديحة.. البسي كويس غادي صقع
دلال.. ههههه خلاص قلتيها 1000مرة
مديحة.. مش عارفة بوك شن جاه باش قبل يبعتك
دلال.. ربي هداه الحمد لله
داليا.. كانت غيرانة من أختها بتموت
خنساء.. تسكر ف الشنطة هكي تمام
مديحة.. خلي نجيبلك ادول وباندول ومضاد حيوي كان مرضتي خوديهم
خنساء.. مش ضروري خيرك يما
دلال.. ايه أرفعيهم احتياط
----------------------------------------------
نورة.. أهلين زايد شن الجو
زايد.. الحمد لله تمام
نورة.. كان ماكلمتك كل يوم مش عارفة شن يصير فيا
زايد.. هههههه حتى أنا
نورة.. بجديات نحكي وصلت لدرجة اني نقعد نفكر فيك ونتبسم
زايد.. شكلك كبدتي
نورة..ههههه مش حانندم كان كبدت فيك والله انت مشاء الله عليك
زايد.. لاردبالك نحنا علاقتنا حلوة لأن نحنا أصدقاء ولوتجاوزت الصداقة حاتبدا مش حلوة
نورة.. بنوع من الإحباط لانها بدت تتعود على زايد اي صح كلامك ونوعدك ان علاقتنا مش حاتتجاوز الصداقة
______________________________
خنساء.. طول الليل وهيا تفكر ف حياتها الجديدة وهل هيا قد انها تتغرب عن أهلها او لا
أمين.. رن هاتفه وشاف لرقم داليا وعطاها بالحمرة
داليا.. قعدت تبكي هيا تبان انها شريرة وقوية بس كانت من الداخل تتوجع ومقهورة هلباااا
____________________________
ف الصبح
مديحة ودلال يودعو ف خنساء بالدموع
موسى.. خلاص هيا عطلنا ع الراجل يراجي البرا
داليا.. كانت تسمع فيهم وكان خاطرها تنوض تودع أختها بس ماقدرتش
طلعت خنساء وسلمت ع نصر وصابرين وركبت ف السيارة هيا وموسى وتوكلو
صابرين.. ماسكة ف يد خنساء شن شعورك
خنساء.. تبسمتلها خايفة الصراحة
صابرين.. هههه أحرف منك
مديحة.. قعمزت ف الصالة وهيا تبكي
دلال.. خلاص يما
مديحة.. خطرت عليا خوك حتى هوا سقدته ومعاش رجع
دلال.. واك يما علاش تفاولي خنساء ماشية لقرايتها وان شاء الله ترجع بشهداتها
مديحة.. أستغفر الله العظيم ان شاء الله يارب
-----------------------------------------------
نصر.. وهدي غريان توا وين
صابرين.. للداخلي يابوي
خنساء.. بابا ماعندي مدكرات راه
نصر.. ههههه توا نوقفولك ع مكتبة
موسى.. خيرك ماقلتي من أمس
خنساء.. أمي دهبتلي شيرتي
نصر.. أهيا مكتبه هيا انزلو
نزلو صابرين وخنساء السلام عليكم
صاحب المكتبة وعليكم السلام
خنساء.. قعدت تساوم ف المدكرات وخدت 3 وكيف بيطلعو قابلها مصحف صغير ودكرت انها ماجابت معاها شراتها وطلعو
نصر .. قعد يسأل ع مكان الداخلي ووصلو
موسى .. انزلو هييي
خنساء.. لما وصلت ف الجد حست بكمية خوف غير طبيعية انا بنروح روحو بيا
نصر .. ههههههههه
موسى.. اياه علينا
نصر.. توا تتعودي يابنتي واهي صابرين معاك متخافيش
صابرين.. حتى انا بنروح
موسى ونصر.. ههههههههه
نصر.. عبو عليكم انزلو هييي شوفو البنات كيف مروحات من الكلية مشاء الله عليهم
خنساء وصابرين .. نزلو بعد ماشافو بنات كانو يقرو معاهم ف التانوية
موسى.. حضن بنته وهيا تبكي انتي قدها وشدي ف قرايتك كويس ومدلها200دينار
صابرين.. حتى هيا تودع ف بوها ومدلها مصروفها
نصر وموسى ركبو وتوكلو
صابرين.. هيا حبي لازم نقولو كلمات التشجيع قبل مانخشو
خنساء.. نحنا قدعات وبطلات وقدها وحانجيبو امتياز
صابرين.. وحلوات
خنساء.. هيا بسم الله وفاتو ع جماعة البوابة السلام عليكم
جماعة البوابة.. وكانو كبار ف السن وعليكم السلام
_______________________________
دلال.. اي والله خلت مكانها الحق
رانيا.. أول بنت ف العيلة تمشي للداخلي سعدودها
دلال.. اي قداش كان خاطري ف القانون
رانيا.. وانا كنت نبي صيدلة
أمين.. ماخاطرك ف كف
دلال.. ههههه منو هذا
رانيا.. أمين البارد
دلال.. سلمي عليه
رانيا.. يوصل وانتي سلمي ع حوشكم
دلال .. يوصل هيا بالسلامة
رانيا.. باي
زهرة.. ديما وانتي تهدرزي
رانيا.. خليني يما مقهورة خنساء اليوم رفعها عمي لغريان تكمل ف قرايتها
زهرة.. قالي بوك أمس وماصدقته
أمين.. كان فاتح التلاجة ويسمع فيهم
رانيا.. قاتلي دارلها تلفون وشفرة
زهرة.. باهي كويس شكله بدا يتفتح
--------------------------------------------
خنساء.. كانت راكبه هيا وصابرين بعد ماعرفو رقم غرفتهم كم حي شوفي البنات شن لابسات
صابرين.. تقرص فيها ضمي فمك وماتحشمينا
خنساء.. جو استار أكاديمي😂😂😂
صابرين.. هههههه عادي بنات ف بعضهم وأخيرآ وصلنا
وفتحو الباب وكانت معاهم وحدة ف الغرفة
صابرين وخنساء.. السلام عليكم
البنت.. وعليكم السلام وناضت سلمت عليهم
كانت لابسة شورت وبدي نص كم وشعرها اصفر ومنقية حواجبها وحلوة هلبة
صابرين.. شن اسمك
البنت .. اسمي دعاء
صابرين.. عاشت الاسامي وانا صابرين وهدي خنساء
دعاء.. بالجودة بيكم
خنساء.. كانت مركزة فيها هلبة انتي متزوجة
دعاء.. هههههههههههه يسمع منك ياحبيبة
صابرين.. هأحم هيا خلي ننزلو ناخدو العهدة
خنساء.. شن هيا العهدة
صابرين.. بطاطين وفراشات
خنساء .. هيا
دعاء.. خلي نمشي معاكم ولبست عبايتها ووشاحها وطلعو
دعاء..كانت معروفة ف الداخلي وكل شوي توقف ع مجموعة بنات وتقعد تسلم
خنساء.. ماحبيتها البنت هدي
صابرين.. توا تسمعك فكينا منها
خنساء.. هيا نسبقوها ونمشو للمطعم جيعانة بنموت
صابرين.. هيا
----------------------------------------------------
أمين.. كان مضايق من فكرة ان خنساء مشت لغريان يعني قررت تعيش حياتها وتجاوزت حبها ليه
زايد.. خش لحوشهم ولقى أمين مقعمز ع العتبة السلام عليكم
أمين.. كان سرحان ويفكر
زايد.. خنساء
أمين.. شافله
زايد.. وين سرحان
أمين.. مشت اليوم لغريان
زايد.. وانت شن واجعك
أمين.. مش عارف
زايد.. خايف تلقى حد يحبها غادي
أمين .. مانبيها تنساني نبيها تقعد ديما تفكر فيا حتى كانها مجروحه مني
زايد.. نهنيك ع صراحتك وانانيتك
أمين.. عمرها مارفعت صوتها ف وجهي عمرها ماطلبت مني رصيد حتى كان ماعندها تقول عندي تسأل عليا ف كل دقيقة ماعمرها عاتبتني لأني كنت انتظار عمري مابررتلها اي شي لأنها كانت واثقة فيا كيف ماتبيني نكون اناني
زايد .. ماتعرفش قيمة الشي الى كان عندك الا لما تخسره على شنو ندمان توا
أمين.. ندمان لأني عتبرت حبها ضعف شخصية وستهنت بيه عشان شهواتي
زايد.. ماعندي مانقولك الحق انت قاعد تحصد ف ثمن اغلاطك
--------------------------------------------
خنساء وصابرين .. خدو دورة ف القسم الداخلي وسلمو ع البنات
دعاء.. انتو توا زي خواتي وخودو راحتكم ورن تلفونها الو حبي
خنساء.. شافت لصابرين ياحسرة علينا
دعاء.. خيرك ياعمري زعلان اها عشان الإنتظار والله ياقلبي ماما الى تكلم فيا انت عارف اني ف قسم داخلي
صابرين.. مصح وجهه مايبيها تكلم حتى امها
خنساء.. حيوان لأنه
دعاء.. نحبك ونموت فيك حبي شويا اختي ع الخط ماهو بكري وصيتها ع شوية حاجات تجيبهملي الخميس كان جوني باي
صابرين.. عيلتها تحبها شكلها
دعاء.. اهلين ياعمري حتى انا ستاحشتك
صابرين وخنساء .. شبحو لبعض بستغراب وشافلوها
دعاء .. قعدت تضحك وغمزتلهم
خنساء.. بصوت واطي ملعبة
صابرين.. ربي يهدي
دعاء.. صكر توا حبي نكلمك بعد شوي ههههه خيركم مستغربات يابنات
صابرين.. لاعادي
دعاء.. اي واضح من وجوهكم اسمعو انا نكلم ف عشرة وبشفرة وحدة بس مانحبش فيهم ولا واحد كل الموضوع اني نخلي فيهم يحبوني وبعد مايتعلقو فيا ويفتحو موضوع الخطوبة نسيبهم بدون سبب
خنساء.. وليش هذا كله
دعاء.. تربعت تحت بنحكيلكم لأني تريحتلكم هذا انا كنت عايشة قصة حب 4 سنين مع واحد وبعدها بدا يطلب مني اني نطلع معاه وندير معاه كل شي عيب وفعلآ طلعت معاه
صابرين.. ليش طلعتي معاه
دعاء .. اولآ لاني نحبه ثانيآ كلمة انتي مرتي كانت تخلي فيا نضعف
خنساء.. تنهدت
دعاء.. بعد خدا مني شن يبي بدا يتغير عليا وقالي زي ماطلعتي معايا حاتطلعي مع غيري رغم انه يابنات وحق ربي ماعمري خنته ولاكلمت دكر
خنساء.. حشاك كلاب
دعاء.. ف الاول بكيت ونتحرت بس لما طلعت من المستشفى عرفت قيمة الحياة وانها مستحيل توقف ع حد وبديت ف الإنتقام بعد الأحدات تعرفت ع واحد الحق قدع لنم حكيتله قصتي وقتله عليه وسام الجيفة وشن دار بيا وقالي انا زي وخيك ووعد ناخدلك حقك عطيته مكان شغله واسمه الكامل ورفع جماعته وخشولهم بسلاح قعدو يجبدو فيه قدام الناس وعطوه طريحة الموت وصورهولي وبعتهولي
صابرين.. بجديات تحكي
دعاء.. فتحت تلفونها أهما صوره
صابرين .. مسكين حالة صايرة فيه
دعاء.. سكين ف كبده يستاهلو أكثر
خنساء.. وصاحبك هذا وينه توا
دعاء.. ماهو طلع أخمر من وسام بعد فترة قعد يبتز فيا ياتطلعي معايا يانشهدر بيك وسام مش خير مني باش يذوقك وانا لاااااا
خنساء وصابرين.. باه
دعاء.. كسرت الشفرة وفتحت شفرة تانية وخديت وعد ع روحي مانوثق ف ام دكر وحانخليهم يجرو ورايا زي الكلاب
صابرين.. قصتك حزينة الحق
دعاء.. القصص الحزينة تقويك وتتعلمي منها
خنساء.. سرحت شويا زعما ندير زيها لااااا نخاف من فلاحتي نبدا زيها
دعاء.. هيا إحكولي ع قصصكم انتو
خنساء.. خليها مرة تانية نحنا لازم نرقدو غدوة جامعة
----------------------------------------------
أمين.. رانيا ومدلها بورزة شكلاطة
رانيا.. تفضل شن تبي
أمين.. رقم خنساء
رانيا.. انت شن تبي فيها البنت فهمني
أمين.. مادخلك دبريلي ف رقمها بالله
رانيا.. توا نكلم دلال ولما تبعته نبعتهولك ف رسالة
أمين.. والله أحلا أخت ف الدنيا
-----------------------------------------------
مديحة.. اشبح وين خنساء
موسى.. بكري شوي كلمتها قاتلي نسجمت وحالها باهي
مديحة.. اي كلمتني حتى انا
موسى.. ان شاء الله دير فايدة
مديحة.. ان شاء الله
---------------------------------------
خنساء.. من التعب اول ماحطت راسها ع المخدة رقدت وبدا تلفونها الى حاطاته ع الهزاز يضرب فتحت عيونها بتعب وقعدت تشوف للرقم الى نهايته 43 هذا أمين عطاته بالحمرة مش عارفة خير أمه
أمين.. ردي ياودي وعاود رن
خنساء.. ااوووف وردت وهيا معصبة الو
أمين.. شكلك راقدة
خنساء.. مادخلك وليش واخد رقمي وشن تبي
أمين.. نبيك انتي ياخنساء انا نحبك وندمان اعطيني فرصة نصحح غلطتي
خنساء.. لما كانت عندك الفرصة انت ضيعتها بروحك وتوا امسح رقمي وبطل تتصل بيا لأنى نكرهك نكرهك نكرهك وصكرت عليه وقفلت تلفونها
أمين.. يعاود عليها لكن كان رقمها مقفل عصب وحدف النقال ع طول ايده
خنساء.. لبست المصلية ونزلت للساحة كانت كبيرة وقعمزت ف المعشب تحت النخلة
دعاء.. كانت فايقة وتسمع ف هدرزتها ونزلت لحقتها
خنساء.. قاعدة تبكي ليش ياربي صار معايا هكي والله مزلت نحبه لكن مش قادرة نسامحه
دعاء.. خنساء
خنساء.. نخلعت وقعدت تمسح ف دموعها
دعاء .. قعمزت مقابلتها وحضنتها
خنساء.. كانت محتاجة لحد يحضنها ويطبطب عليها
دعاء.. عمرك مادسي دموعك كل ماحسيتي انك تبي تبكي ابكي عشان تخففي ع روحك
خنساء.. كيف قدرتي تنسي حبك الاول نبي ننسى وكانت تتكلم وهيا تبكي
دعاء.. من قالك نسيته مانسيته بس تعلمت كيف نعيش حياتي من غيره كنت نوض الصبح من فراشي نقول يادعاء اليوم هذا حايمر بدون وسام لكن عادي حايفوت كان صعب عليا بس تعودت ومامتت حتى انتي توا تتعودي
خنساء.. تريحت لدعاء وحست روحها انها ظلمتها لما حكمت عليها وحكتلها قصتها
دعاء.. هذا بالذات لازم تنتقمي منه
خنساء.. كيف
دعاء.. أعطيه فرصة تانية لكن المرة هدي انتي خونيه رديله نفس المعاملة
خنساء.. مانقدر
دعاء.. لاتقدري قوي قلبك بس لكن قبل كل شي تبي تعديل ف اللوك متاعك
خنساء.. انا عاجبتني روحي هكي
دعاء.. شن تحسابيني جويل بنديرلك شفط ولصق
خنساء.. ههههههه
دعاء .. انتي حلوة راه بس لو النظارة تلبسي حاجة بسيطة تمشي مع وجهك يعني يكون ايطارها خفيف مش هدو زي نظارت جدي ولوحي عليك لبس العزوز والبسي حاجات مناسبة لعمرك وانتي راه ابسط حاجة تندارلك تتغيري كان تعطيني حواجبك نلعبلك فيهم
خنساء.. لاااااااا
دعاء.. انا نفهم ف الحاجات هدي هاتي نديرلك تنظيف وشمع لوجهك شن رايك
خنساء.. لا انا جاية بنقرا وهذا كله مانبيه
دعاء.. تمام براحتك لكن زي ماقتلك اتصلي بيه وقوليله نرجعو وانا معاك متخافيش
خنساء.. قتنعت بكلام دعاء فتحت تلفونها ورنت ع امين بس كان مقفل لانه لما حدفه نفتح والبطارية تحولت
دعاء.. عادي حتى غدوة هيا نوضي نرقدو
----------------------------------------------------
ف الصبح
صابرين وخنساء.. نزلو من الباص
خنساء.. يحليلي ع الزحمة
صابرين.. اسكتي ساكتة بطني بدت توجع فيا
خنساء.. هيا نتبعو البنات ونحنا مش فاهمات شي
صابرين.. ديري روحك تعرفي ماحد احسن من حد
خنساء.. وووه شوفي الولاد كيف بنفوتو جنبهم
صابرين.. غمضي عيونك وفوتي
الشباب.. كانو واقفين جنب الكلية
خنساء وصابرين روسهم ف الأرض
واحد من الشباب.. ربي يحفظك دكرتيني بحناي الله يرحمها
الشباب.. هههههههه
صابرين.. حاطة يدها ع فمها بتضحك
خنساء.. ان شاء الله تلحقها وخشو يجرو
صابرين.. ههههههه ضحكني
خنساء.. حيوان واحد
صابرين.. محلاها كلية المحاسبة وقعدو يدورو ع المدرج الى عندهم فيه محاضرة الإقتصاد1
خنساء.. المدرج 3 اهوا وخشو
صابرين.. الله ع الشعور
خنساء.. كيف بنخشو جنب الولاد
صابرين .. مادوري تعالي نقعمزو جنب هدوكا البنات
خنساء .. قعمزت جنب صابرين وقعدت طلع ف المدكرة من الشنطة وحست بحد قعمز جنبها ولما رفعت عيونها نصدمت
----------------------------------------------------
امين.. خش لأمه ف المطبخ أسمعي يما أخطبيلي ثريا بنت خالتي مفيدة
يتبع