صفحات ممزقة ( روايات ليبية )

حلقة 29🔥 النهاية 🔥

#صفحات ممزقة
(قصة واقعية)
الحلقة(29) والأخيرة
بقلم.. القطة الشريرة
---------------------------------------------
حسين.. تمام بنمشي نقوللها والى يصير يصير
جعفر.. ياقدع هيا دير تحمية وتوكل
حسين.. بسم الله
_______________________________
خنساء.. أيوا بابا
موسى.. ياهلا شني طلعتي من الإمتحان
خنساء.. ايه ونراجي ف الباص
موسى.. جاوبتي
خنساء.. الحمد لله وين وصلت انت
موسى.. انا ف الأصابعة توا
خنساء.. معناها قريب توصل
موسى.. إن شاء الله
خنساء.. توصل بالسلامة وصكرت
صابرين.. عطل الباص
خنساء.. اي هلبة تعالي نقعمزو غادي ونراجوه
صابرين.. هيا جيتك
حسين.. خنساء
خنساء.. شافت وراها نعم
حسين.. ممكن نحكي معاك شوي
صابرين.. انا تلقيني نراجي فيك
خنساء .. تمام
حسين.. كان متوتر هلباااا ومتلخبط جاوبتي
خنساء.. الحمد لله وانت
حسين.. جاوبت
خنساء.. باهي كويس
حسين.. نبي نقولك موضوع لكن مش عارف كيف نبدا
خنساء.. ابدا من الأول
حسين.. ضحك شوفي ياخنساء انا من5 سنين وانتي ديما ف بالي من هذاك اليوم الى بوستك فيه وطول هالمدة معتبر تفكيري فيك تأنيب ضمير بس ع الشي الى درته معاك وكنت مفكر إن الشي هذا حاينتهي بمجرد ماإنتي تسامحيني بس مانتهاش
خنساء.. ممكن تعطيني الزبدة من الموضوع لأنى مش فاهمة شي
حسين.. يعني وحط ايده ورا راسه وخدا نفس عميق انا نحبك مش بإيدي الشي هذا بس حبيتك واسف لو زعلتك بس كان لازم نقولك
خنساء.. ماتحركت فيها ولاشعرة من كلام حسين بطلت كلمة نحبك تفرحها او تحرك مشاعرها الخيانة وخيبة الأمل قتلولها مشاعرها
حسين.. أسف لو زعلتك بجد اسف واعتبريني ماقلت شي
خنساء.. لا بالعكس لازعلت ولاشي بس ياحسين انا مانصلحش للحب الحب بالنسبة ليا مجرد وهم وكذب ف وقتنا الحالي كلمة نحبك بدت مجرد كلمة تنقال بس وماحد فاهم معناها الحب أفعال ياحسين فعل واحد يثبتلي انك تحبني ولاألف كلمة نحبك الحب إهتمام واحترام الحب انك تقدرني وانك ماتقبلش ع روحك تعطيني القليل وانت قادر تعطيني أكثر الحب انك تصوني وتخاف عليا زي خوفك ع خواتك الحب انك تكون ليا الأخ والأب قبل ماتكون ليا الحبيب والزوج انا فقدت الإيمان بالحب مش معترفة الا بحب عيلتي وأصدقائي بس وانت ربي يجبر بخاطرك ويبعتلك بنت الحلال الى تسعدك
حسين.. ادعي ربي يحنن قلبك عليا وتحبيني لأنى مانبيش غيرك
خنساء.. انا مستحيل ياحسين
حسين.. حانخلي المستحيل ممكن نشوفك بخير باي
خنساء.. قعدت واقفة ف مكانها وتشوف لحسين لعند ماأختفى
صابرين.. قربت منها خنساء الباص
خنساء.. هيا مشينا
صابرين.. شن يبيك
خنساء.. مافى شي مهم
----------------------------------------
جعفر.. شن صار
حسين.. رفضتني
جعفر.. عادي مادورش
حسين.. ربي يعوضنا
------------------------------------------
نورة.. أهلين حبي
زايد.. أهلين ياعيوني
نورة.. شن جوك وشن مداير
زايد.. الحمد لله اليوم كلمت أمي ع موضوعنا
نورة.. بجديات وشن قالت
زايد.. قاتلي لا وانا نبيلك بنت خالتك
نورة.. باهي تمام ربي يهنيك هي باي وامسح رقمي
زايد.. هههههه يامجنونة نبصر عليك قاتلي وين بنلقو أحسن منها
نورة.. تبكي وماتبيش تتكلم
زايد.. حبي ماتبكيش ياعمري والله نبصر عليك
نورة.. هكي البصارة هيا
زايد.. اسف خلاص توا جاي انا لحوشكم ذوقيني حاجة من تطيبك
--------------------------------------------
دعاء.. تبكي ياريتني جيت ف درج
صابرين.. هيا روحي معانا
خنساء.. اي هيا روحي معانا
دعاء.. ياريت نقدر مش حايوافق بوي نعرف
صابرين.. وواك مانحب الوداع وقعدو يحضنو ف بعض
---------------------------------------------------
زهرة.. أيوا يابنتي
ثريا.. أهلين ياخالتي كيف حالك
زهرة.. الحمد لله وإنتي
ثريا .. بخير
زهرة.. بنقولك اليوم معزومة ع العشاء
ثريا.. إن شاء الله خالتي
---------------------------------------------------
ف العشية
موسى.. يكلكس جنب حوش نصر هي سلامتك يابنتي
صابرين.. بارك الله فيك ياعمي
نصر .. طلع ومسك رشادة نكسرلك المرش توا
موسى.. بنتك عندي راه
صابرين.. نزلت وحضنت بوها
موسى.. هيا نزلت ونحنا عابيين عليها
خنساء.. ههههه
نصر.. هيا تفضلو
موسى.. بارك الله فيك
نصر.. شكرآ ياصديقي
خنساء.. يضحك عمي نصر
موسى.. بهلول
خنساء.. ههههههه
-----------------------------------------------
أمين.. السلام عليكم
كلهم وعليكم السلام
مديحة.. كانت مدايرة العالة تفضل
أمين.. خش وقعمز
زهرة.. كلمت ثريا عزمتها ع العشاء
خالدة.. وهيا مزال عندها وجه تقابل
عادل .. حرام عليك يما خلاص انسي
خنساء.. نزلت من السيارة وخشت تجري يما يما
دلال.. هادي خنساء وناضت تجري
خنساء.. حضنت أختها وقعدو يبكو
دلال.. ياكلبة موليا تهبلي
خنساء.. بطلنا نكونو زي ماإحنا بدينا أحلا
رانيا.. ومدايرة لساين ونقزت عليها وحضنتها
دلال.. خشي كلهم ف الدار
خنساء.. السلام عليكم وجت عينها ف عين أمين
أمين.. ضحكلها كان خاطره ينوض يحضنها ويشكيلها همه وطبطب عليه كان خاطره عيونهم يتلاقو وتقعد تتبسمله ويسمع منها كلمة نحبك
خنساء.. سلمت عليهم كلهم ولما وصلت ف أمين مدت روس اصابعها وسحبتهم بسرعة
أمين.. وجعاته الحركة متاعها بس خلا روحه طبيعي
خالدة .. تعالي يابنتي قعمزي جنبي
رانيا.. بنبدو ف العنصرية
خنساء.. تبوس ف جدتها وتطلع ف لسانها لرانيا
أمين.. كان يشوفلها ويتبسم بدون وعي
عزو.. شن هادوشة وخشلهم ف الدار وقعد يعد فيهم
زهرة.. صلي ع النبي
كلهم عليه الصلاة والسلام
خنساء.. ع اساس اجنبي اول مرة يشوف زحمة
عزو.. انا من بكري نراجي فيك تتكلمي ياسنفور غضبان
خنساء.. ههههه ياشرشابيل
عزو.. نورتي شن جوك
خنساء.. الحمد لله تمام يما وين داليا
مديحة.. ف الجامع تقرا ف القرأن
خنساء.. باهي مليح وعمي محمود
زهرة.. ف حوش جتك عيشة
خنساء مليح بكل وزايد
رانيا.. هههه خيرك تقولي فيهم بالقطارة
خنساء.. معاش نسأل ولاشن
مديحة.. طلع من بكري
خنساء.. باهي نمشي ندوش عندكم الجو ساخن
عزو.. جاية من القطب الشمالي امالا
خنساء.. نحنا مزال الجو بارد
مديحة.. نوضي خلاص
خنساء.. مافيش طاسة عصير حلويات ضيفة انا راه
خالدة.. قعدت تفتش تحتها وعطتها حلوة
دلال .. نوضي باش تحطي العشاء
رانيا.. هههههه شوفي كيف مفنصة عيونها
خالدة.. ماحد يتعبها بنتي بكل
خنساء.. باست جدتها والله انتي أحسن وحدة
--------------------------------------------
ثريا.. دارت طاجين بطاطا وخبزة كسكاس وخشت للدار وقعدت تشوف شن تبي تلبس
-----------------------------------------------
زهرة.. نوض ياأمين المغرب قريب باش تجيب مرتك
أمين.. ناض وطول الطريق وهوا يتحسر
-------------------------------------------------
دعاء.. بجديات تحكي حسين
حسين.. اي بجديات نحكي بس نبيك تساعديني
دعاء .. تم وانا معاك
--------------------------------------------------
خنساء.. واقفة ف المطبخ مع البنات ويهدرزو ويضحكو
داليا .. السلام عليكم
خنساء.. مشت تجري وحضنت أختها
داليا .. حضنتها بقووة وقعدت تبكي
خنساء.. تمسحلها ف دموعها خلاص معاش تبكي
داليا.. مسحت دموعها
خنساء.. بري غيري وتعالي هدرزي معانا
داليا.. تمام
رانيا.. تعرفو عرسي مزال عليه أسبوعين وانا خايفة يموت حد
خنساء.. فال الله ولافالك ف الداخلي تعلمتلكم اغاني ماتفهم شي
دلال.. الله علميني
خنساء .. الحصة ب10
دلال.. اصلآ الأغاني حرام
خنساء.. اي صدقتك
--------------------------------------------
أمين.. فتح باب الحوش وخش
ثريا.. كانت لابسة سروال اسود وبلوزة دمية ومدايرة شعرها الفوق ومنزله خصلات أمين شن رايك
أمين.. البسي عبايتك وهيا كان ملهوف ع خنساء وع شوفتها ويبي يعبي عينه من شوفتها
------------------------------------------
صابرين.. تكذبي
دعاء.. وحق ربي لكن قالي خليه بينا الكلام
صابرين.. متخافيش مش حانخبرها
دعاء.. عارفتك قدها
-------------------------------------------
مديحة.. الباب يخبط يابنات
خنساء.. هيا هي وفتحت الباب
ثريا.. السلام عليكم وكان أمين وراها
خنساء.. ياهلا بالعروسة وقعدت تبوس فيها الف مبروك صح متأخرة لكن عيب مانقولها
ثريا.. تسلمي وكانت مستغربة من ردة فعل خنساء
امين.. حتى هوا كان متأمل ان خنساء تغار من شوفت ثريا بس للأسف صار العكس
خنساء.. تفضلو
خشت ثريا وروحو الرجالة من الجامع وكان الجو كله ضحك وهدرزة
موسى.. شن رايكم غدوة نمشو نزردو ف مزرعة نصر
كلهم ايه خاطرنا ف زردة
خنساء.. عزو مايمشيش
عزو.. وليش
خنساء.. كيف الغفير يخلي شغله
عزو.. يما كلميها
كلهم ههههههه
ثريا.. كانت مركزة ف أمين وشبحاته لخنساء وقعدت ماسكة دموعها
...................................................
ف الصبح
خنساء.. الملح رفعتوه
رانيا .. ايه
دلال.. كل شي مكتوب ف الورقة رفعناه
خنساء.. معناها نطلعو خلاص
زهرة..تساعد ف خالدة وركبتها ف السيارة
--------------------------------------------------
أمين.. بعياط قاعدة مالبستي
ثريا .. مستعجل تشوفها
أمين.. مش وقت دوة فاضية
ثريا.. اي دوتي فاضية الدوة المعبية كلها لخنساء امس قريب تاكلها بعيونك
امين.. ساكت ويشوفلها
ثريا .. لو انت تعامل فيا هكي عشان حاط ف بالك اني غلطانة فاسمحني الغلط كله راكبك من راسك لعند رجليك انت الى وهمتني وانت الى تقربت مني وانت الى سمحت بالغلط وانت الى بستني ف الفترة الى كنت خاطب فيها خنساء
أمين.. هزه كلام ثريا وخلاه يفوق ع روحه
ثريا.. تبكي انا خلاص معاش عندي حد الا انت بوي قبل مايطلعني للسيارة قالي حوشي محرم عليك ليوم الدين قولي انت وين نمشي نقتل روحي باش تستريحو مني
أمين.. قرب منها وحضنها اسسس خلاص معاش تبكي انا نبي شوية وقت اصبري عليا باهي
ثريا.. انا نحبك ياأمين ومستعدة نصبر معاك العمر كله
امين.. مسحلها دموعها خلاص البسي هيييي
ثريا .. تمام
-------------------------------------------------
خنساء.. تعالو نركبو من خلف باش ندربكو ع راحتنا
رانيا.. اي هيا
دلال .. اهو أمين وصل
خنساء.. كانت ردت فعلها طبيعية مش حب ومش كره يعني فعلآ تجاوزت أمين
موسى.. هيا
عادل.. ياسواق عطيها المية متخافش ع الباتريا
البنات .. ههههههه
عادل.. تعلمو تعلمو ونطلقو
------------------------------------------
حسين.. مقعمز جنب أمه الى راقدة ع السرير وتاكل عن طريق الطوبوات يما انا غدوة بنمشي نخطب نبيك تدعيلي البنت توافق وترضى
ام حسين.. نزلت دمعتها ممكن أول مرة تحس انها فعلآ عاجزة ومريضة لإنها مش حاتكون مع ولدها ف يوم زي هذا
حسين.. مسحلها دمعتها وباسلها ع يدها البنت مش من هنا يما واسمها خنساء وقعد يحكيلها عليها
--------------------------------------------
كلهم انتشرو ف المزرعة الكبيرة
زهرة.. الصلاة ع النبي مشاء الله زارعين فيها كل شي
مديحة.. تبارك الرحمن
خنساء.. رجعت للسيارة وجابت تلفونها
امين.. نزل من سيارته خنساء نبي نحكي معاك
خنساء.. الكلام بينا انتهى من زمان
امين.. ممكن بالنسبة ليك لكن بالنسبة ليا لا
خنساء .. انت شن مزال تبي مني
امين.. انا نحبك ومستعد نطلق ثريا ونتزوجك
خنساء.. قعدت تضحك قداش تسخف ياأمين بطل توهم روحك وفيق خلاص انا نسيتك من زمان ومستحيل نسمح لروحي انى نتزوج واحد زيك
امين.. انا تغيرت
خنساء.. الشي هذا لروحك مش ليا انا انت كنت درس تعلمت منه هلبة حاجات بس توا خلاص تم كل شي وياريت تبطل طبع الخيانة وتصون حوشك ومرتك ومشت عنه
---------------------------------------------
مديحة .. هيا يابنات ديرو الفطور
ثريا .. خشت ف البنات وبدت تعاون فيها
والرجالة .. قعمزو جنب خالدة وقعدو يديرو ف الشاهي
أمين.. كان قاعد يتمشى هوا وزايد
زايد.. تعال نمشو للسيارة نكسدو ع الاغاني
امين .. هييييي
مديحة.. ياخنساء تعالي
خنساء.. نعم
مديحة .. بري للسيارة وجيبي الدجاجة نسيناها غادي
خنساء.. اوووف ديما تبعتو فيا
مديحة.. بري وسكري فمك
خنساء.. فتحت السيارة وقعدت دور ع الدجاجة وجبدتها
زايد وامين .. يشوفو لخنساء وهيا ماتشوفش فيهم
زايد.. كلكس لخنساء
خنساء.. نخلعت ونقزت وطاح تلفونها
امين .. هههههه
زايد.. فتح باب السيارة ياخوافة
خنساء.. خلعتني وقعدت تضحك وكيف نزلت بتاخد تلفونها حست بحاجة قرصتها وعيطت
زايد.. خيرك وجاء يجري
خنساء.. مش عارفة شن قرصني
أمين.. نزل وقرب منهم
زايد.. عقرب امين قدامك إقتلها
امين.. عفسها لعند ماتت وحط عليها رشادة
زايد.. تو نجي نمشي نادي عمي شكلها هيا الى قرصاتك
أمين.. قعد ع ركبيه وقابلها
خنساء.. تشوف لصبعها
امين.. بدا يحوللها ف وشاحها
خنساء.. حول يديك عني
امين.. بعياط اس ولاكلمة وربطلها وشاحها ع يدها
خنساء.. فكاته مانبيش منك شي
امين .. بطلي حركات الصغار وجبدلها يدها بقوة وربطها
موسى.. وخوته جو يجرو
محمود.. هاتو طاسة فيها بنزية وموس لاميتا
زايد.. تمام
مديحة.. جت تجري هيا والبنات
محمود.. فتح مكان اللدغة وبدا الدم الأسود يطلع وحطلها صبعها ف ف البنزينة
خنساء.. تضحك مصقعة ههههههه
موسى.. خليه صبعك وأسكتي
مديحة.. وين لقيتيها العقرب
محمود.. نرفعوها للمستشفى ولاشن
موسى.. ماتحتاج لمستشفى ماتشوفش فيها زي الجن غير ردبالك تشربي مية بس
خنساء.. تمام
-------------------------------------------------
فات اليوم كله حلو
امين.. كان خايف ع خنساء وطول الوقت حاط عينه عليها
زايد.. كليتها البنت بعيونك
امين.. مش كان رفعوها للمستشفى أحسن
زايد.. بوك وعمك يزبطو ف الحاجات هدي
موسى.. هيا المرواح
رانيا .. خسارة مزال نبي نقعد
دلال.. اي الجو مش عادي
خنساء.. بعد تتزوجي وتجينا زيارة توا نعزموك هنا
------------------------------------------------
ف الليل
دعاء.. شنو مستعد غدوة
حسين.. ان شاء الله
دعاء.. ربي يكون معاك بس حط ف بالك كل الإحتمالات
حسين.. أكيد
---------------------------------------------
ف الصبح
خنساء.. تكنس ف الجنان
محمود.. صحة للفالحة شن حالك اليوم
خنساء.. الحمد لله
محمود.. باهي كويس
----------------------------------------
جعفر.. زي الحق جايبني معاك
حسين.. ماهو كان ماوافقت نبيك ترفعلي معنوياتي
جعفر.. ولايهمك
صابر.. عم حسين بالله ياولد خوي شن طيحك ف الجيهة هدي بعيدة بكل
جعفر.. القلب ومايريد ياعمي
صابر.. ههههه فعلآ
-----------------------------------------
مفيدة.. ياإبراهيم بنطلب منك طلب ومانبيك تزعل
إبراهيم .. كانه يزعل فوتيه
مفيدة.. نبي نمشي عند أختي زهرة
ابراهيم .. لا وكلمة تانية نرمي عليك يمين الطلاق وناض من عن السفرة وطلع
مفيدة.. قعدت تبكي
---------------------------------------------
دعاء.. شني مشيتي
صابرين.. كيف بنطلع توا
دعاء.. عبيلها راسها تسمعي
صابرين .. تمام ولايهمك
---------------------------------------
رانيا .. الله من زمان مانضنا ولقينا الحوش مضموم
دلال.. صدقتي
خنساء.. سلمكن بايرات ياحناتي وانتي يافالحة عزيز من بكري ف المربوعة يراجي فيك تفطريه
دلال .. كذابة
خنساء.. اسمعيه صوته زي العنز المدبوحة
رانيا.. هههههه
دلال.. تحشمي ع وجهك
خنساء.. شدي ارفعيله
دلال.. من معاه
خنساء.. عزو بس
دلال .. نتحشم
رانيا.. توا ناديه عزو بري بس
-----------------------------------------
مديحة.. اهلآ يابنتي كيف حالك
صابرين.. الحمد لله
مديحة .. تفضلي خنساء ياخنساء
خنساء.. اووو صابرين وحضنتها
صابرين.. شن الجو
خنساء.. تمام وانتي
صابرين .. مية مية
خنساء.. خشي تفضلي
------------------------------------
صابر.. هذو كان قالو لا بعد هالمشاور الما نفرغ فيك
جعفر.. انا الى بنفرغ فيه الحق
حسين.. لاأنا بنفرغ ف روحي
صابر .. تعرف النعتة
حسين.. إيه
صابر .. هييي
-------------------------------------------------
صابرين.. شن جوك وشن مدايرة
خنساء .. الحمد لله تمام
صابرين.. باهي كويس
خنساء.. خيرك مش على بعضك
صابرين.. شي
----------------------------------------------------
ثريا.. وواك نسيت دبشي ف الدار لبست قميص أمين الى كان معلق وطلعت
أمين .. كان واقف ع مراية الدولاب وقعد يشوف لثريا الى لابسة قميصه الى جايها فوق الركبة وشعرها المبلول
ثريا .. اسفة امين نسيت دبشي ولبست قميصك
أمين.. بدا يقرب منها هيا كانت منزلة راسها وتجفف في شعرها
ثريا.. قامت راسها ولقت أمين واقف قدامها زعلت مني
أمين .. زاد قرب وبدا يفتح ف بطم القميص وحدفها ع السرير
-------------------------------------------
عزو .. فتح الباب
صابر.. السلام عليكم
عزو.. وعليكم السلام
صابر.. منزل موسى..........
عزو.. وصلت تفضل
صابر.. الله يبارك فيك ياولدي
عزو.. تسلم ياعمي وسلم ع حسين وجعفر
صابر.. خش وقعد يهدرز مع عزو لعند جاء موسى
موسى.. ياهلا ياهلا زارتنا البركة
صابر.. والله عيب عليك حادف روحك هالحدفة
موسى.. ههههههه شن حالك
صابر.. الحمد لله
موسى.. وانت شن حدفك عندنا
صابر.. انا جاي ناوي القرب لكن كان رفضتونا بنفرغ فيه واشر ع حسين اهو خبرتك
موسى.. هههههه هذا ولد المرحوم فرج
صابر.. ايه هذا حسين وهذا صاحبه ولد خليفة
موسى.. مرحبتين مرحبتين
صابر.. نحنا جايين ياموسى نبو قربكم وحسين زي ولدي وأعز وين قال نبي خنساء بنت الحاج موسى قلت وين بنلقو أحسن منهم
موسى.. بارك الله فيك
--------------------------------------------------
عزو.. خش يجري خنساء ياخنساء بري أطرحي من دولاب امك جاك عريس
خنساء.. هيييي غادي فيه البنت
عزو.. اسف اسف مانتبهت
صابرين.. قعدت تضحك
--------------------------------------------
ثريا.. وهيا راقدة ف حضن أمين حبي
أمين.. نعم
ثريا.. مش نادم لأنك قربتني
أمين.. مش انتي مرتي
ثريا.. عارفة لكن خايفة تكون ندمت
امين.. معاش تخافي مش قتلك انا نبي شوية وقت بس
ثريا.. زادت خشت ف حضنه نحبك
-----------------------------------------------
موسى.. شوفي بنتك هياااا
مديحة.. تمام هييي ومشتلها
صابرين.. نمشي نعاون البنات ف المطبخ
مديحة.. قعمزي قعمزي انتي مش غريبة
خنساء.. لو الموضوع زي ماقال عزو عريس ماعريس انا مش موافقة
مديحة.. انتي غير أسمعي قبل
صابرين.. أسمعي انتي
خنساء.. هااااا
مديحة.. انتى مش صغيرة توا والولد كويس ويبيك وبوك يشكر فيه
خنساء.. مانبيش ومادخلني فيه كويس ولامش كويس
صابرين.. ليش هكي ياخنساء
خنساء.. انا توا نبي نكمل قرايتي وبعدها نحضر وبعدين نفكر ف الزواج
مديحة.. باهي هوا يبي يشوفك ويحكي معاك
خنساء .. لايعني لاااااااا
صابرين.. انتي نوضي وفهميه انك ماتبيش هكي بوك مش حايتحشم وهوا يرفض فيهم ويعرف ان هدي رغبتك
خنساء.. تمام خمس دقايق بس
مديحة.. نوضي البسي
خنساء.. خشت ولبست
رانيا .. كان حلو وافقي عليه
خنساء.. لا
---------------------------------------
موسى.. تفضل ياولدي ودخله لدار القعاد
أمين.. درس سيارته وخش سلم وبعدها خش الداخل وتلاقى مع خنساء وهيا لابسة عبايتها ووشاحها
دلال.. دفتها هيا العريس يراجي
أمين.. وقف رانيا شن فيه
رانيا.. جاي عريس لخنساء
أمين.. حس الدنيا دارت بيه وعصب
---------------------------------------------
خنساء.. خشت لدار السلام عليكم
حسين.. وعليكم السلام
خنساء.. رفعت راسها فيه وشافتله انت
حسين.. بتسملها ايه انا
خنساء.. قعمزت مقابلاته كيف عرفت انا وين نسكن وكيف عرفت حوشنا وين
حسين .. سر هذا
خنساء.. دعاء وصابرين صح
حسين.. ذكية انتي
خنساء.. يعني شن قتلك انا ف الكلية
حسين.. ان الحب أفعال وانا جيت من الباب ولعلمك لو رفضتي حايفرغ فيا عمي خنساء .. ليش
حسين.. لأنى جبتهم المسافة هدي كلها من غير فايدة بجديات خنساء انا شاريك ومتمسك بيك ولو ترفضيني توا حانجيك مرة تانية وثالتة ورابعة
خنساء.. بس مش حاتعيش مرتاح معاي راه لازم تعيش حياتك
حسين.. انا راجل نحب الشقاء ونحب العذاب وراضي انتي اعطيني فرصة بس نتعرفو ع بعض أكثر
خنساء.. تقدر تراجيني 5سنين أخرات
حسين.. نراجيك عمري كله
خنساء.. انا موافقة بس الزواج حايكون بعد 5 سنين
حسين.. تم
---------------------------------------------------
بعد مرور سنتين وتحديدآ يوم 23.3.2016
عزو.. اهيا طلعت هيا هجوم وبدا يضرب فيها بالدحي والزبادي
خنساء.. لااااااااا
عادل.. وهدي وحدة مني
عبسي وفاضل .. وحتى نحنا
موسى.. حرام عليكم اضربوها ف وجها زي هكي
خنساء.. اااااااي
اليوم خنساء تخرجت ودارت حفلة ف الكفتيريا
-------------------------------------------------
امين .. بعد ماوافقت خنساء ع حسين فقد الأمل منها وعاش ايامات صعبة بس ثريا وقفت معاه وصبرت عليه ف سنة 2015 حصل خدمة ف طرابلس وأجر غادي ونتقلو وكان يرفع ف ثريا لحوش بوها ويطلبو ف السماح من ناسها مفيدة سامحتهم وحنت فيهم أما ابراهيم عذبهم هلبة لكن ف الأخير سامحهم بعد رفعوله حفيده الى سموه إبراهيم
---------------------------------------------------زايد .. خطب نورة رسمي وحددو عرسهم مع عزيز ودلال
----------------------------------------------------
صابرين.. عايشة قصة حب مع هيثم وعرسهم ف الصيف
---------------------------------------------
دعاء.. حاليآ مكبدة ع عبد السلام خال خنساء
---------------------------------------------
داليا.. بفضل الله ختمت القرأن وأكثر واحد فرحان بيها موسى وكأنها عواضته ع الأيام الى عاشهم بعد ماأغتصبها سالم
--------------------------------------------------
دعاء.. خنساء ترا تعالي شوي الدكتور يبيك ف القاعة
خنساء.. هيا جيتك
دعاء.. ابعدي عليا ريحتك زفرة بالك خالك يبي يبوسني ولاشي
خنساء.. خزي عليك ياحيوانة
دعاء.. فتحتلها الباب خشي وسكرت عليها وقعدت واقفة ع الباب
خنساء.. لقت القاعة مزينة بالبالونات وحسين واقف ع الحيط وماسك طورطة حفل تخرج سعيد وبدا يقرب منها
خنساء.. بدت تتبسم امتى بتبطل مؤامرت مع صاحباتي
حسين.. هههههه انفخي الشمعة
خنساء.. قعدت تقرا وتضحك فاتو سنتين وقعدو ثلاتة
حسين.. ليش تضحكي
خنساء.. من جدك تحسب فيهم انا قتلك هكي لإنى توقعتك حاتمل وتفوتني
حسين.. مستحيل نفوتك بعد حصلتك هيا انفخي الشمعة
خنساء.. نفخت الشمعة
حسين .. حط الطورطة وطلعلها هدية وكان خاتم ع شكل فراشة
خنساء.. مانقدرش نقبله
حسين .. اهلك عندهم علم بالموضوع متخافيش
خنساء.. خبرتهم قصدك
حسين.. ستخدمت صلاحياتي كاخطيب
خنساء.. هلبة هكي
حسين.. اقبلي هديتي واليوم بنحدد موعد العرس امي قريب تهبل ع شوفتك
خنساء.. طبعآ انا حاليآ مدايرة تعابير وجه غضبان لكن الدحي شاحطلي وجهي نبان مبتسمه
حسين.. ههههههه تمام فتحلها الباب أطلعي توا والطورطة تلقيها مع دعاء واسمعي
خنساء .. ها
حسين.. نحبك
خنساء.. بتسمت وطلعت بسرعة حست وكأن قلبها بدا يدق من جديد
-----------------------------------------------
امين.. إبراهيم تعال يابابا شوف شن جبتلك
ثريا.. الله بابا جابلنا دراجة
امين.. أوووبا وقعد يسوق بيه
ثريا.. كانت تصور فيهم وفرحانة
أمين .. خنساء ترا
ثريا.. تحولت الإبتسامة من ع وجها انا ثريا ياأمين ثريا
وهدي كانت حياة امين رغم انه جاب من ثريا ولد الا انه مزال نادم ع خنساء ومش قادر يشيلها من دماغه
ثريا .. كانت تزعل منه ويرجع يرضيها من جديد
---------------------------------------------------
اليوم وف اخر صفحة فيكي يامدكرتي وبعد هلبا صفحات ممزقة فيك كانت مليانة بالخيانة والكره والوحدة والحزن والدموع قاعدة نكتب ف احلا دكرى ليا لأنك أكثر وحدة كنتي شاهدة ع معانتي من ايام الاعدادي ولعند اللحظة هدي اليوم عرسي ايه اليوم عرسي صح كتبت فيك اني مستحيل حانتزوج ولانفكر حتى ف الموضوع بس جاء الى غيرلي حياتي وقدر يخلي قلبي يدق اليوم تجاوزت كل الماضي وخليته وراي
نصيحة لكل بنت ردبالك تسلمي ف روحك بإسم الحب ديما حبي نفسك وقدسيها خلي روحك شي صعب وردبالك ترضي بالقليل قبل ماتصدقي كلام الحب لازم تشوفي للفعل وأغلاطك ديما إعتبريهم دروس ليك وردبالك تعاوديهم والشخص الصح مهما تأخر حايجي نتمنى لكل بنت تلقى الشخص المناسب ونصيحة ردبالكم تغفرو للخيانة لأن الى قدر يخونك مرة حايخونك مرة تانية وأول ماتحسي ان كرامتك حاتنداس انسحبي لأن الحب يتعوض لكن الكرامة لا وعمرك ماتتغيري عشان حد 😍😍
دلال.. هيا العريس يراجي فيك البرا
خنساء.. وقفت هييي
دلال..تزغرط
دعاء وصابرين.. طالعة تهبلي
حسين.. كان واقف جنب السيارة وفتح الباب
خنساء.. كانت خايفة وترعش
دلال .. دخلتها للسيارة
دعاء.. محلاه حسين طالع
صابرين.. يهبل
دعاء.. تمسح ف دموعها ربي يهنيها
صابرين..امين يارب
حسين.. شن رايك نهرب بيك لاخيمة لاشي
خنساء.. لا نبي نطلع من حوش بوي
حسين.. وأنا أصلآ نبي نطلعك من غادي ياأحلا حاجة ف حياتي نحبك
خنساء.. نموت فيك
النهاية

ان شاء الله تكون نالت اعجابكم ولنا لقاء ف رواية جديدة نحبكم هلبا وشكرآ ع تفاعلكم الحلو