حَياةٌ في زمنِ الموتِ

"الحلقه السابعه"

#حياة_في_زمن_الموت
للكاتبه 💖 الجبوريه 💖
Al_jubouria
السلام عليكم سبق و نوهت التنزيل راح يكون 3 ايام تنزيل و اليوم الرابع استراحه .. و الوقت ما اكدر احدده لكن من 4 لل 10 ما اتاخر اكثر و لان كتابه البارت جدا صعبه و سانوه عن السبب لاحقا ..

"
أَحبَكمْ قلبي وما عشقتُ سواكم يهون علينا بعدكم ونواكم
تذكرني الأحلامُ إِني أَراكم عرفتُ لذيذ النوم كيف يكونوا
وما أَغمضت عيناي بعد فراقكم ولا لقلبي بعد المنامِ سكونوا
يخيل لي في المنامِ إِني أَراكم وإِني لأهوى النومَ بغير حاجةٍ لعلي لقاكم في المنامِ يكونوا
"

رحت انام و جان اسمع خالتي ترزل بصباح و اكله لمطعم والله و بقيت دايخه منهم الى ان نمت

و مر اسبوع و جان اسمع خبر عن تحديد يوم امتحانات السادس اللابتدائي و رحت لزهير اتوسل بي

.. عمو عليك الله شتريد انطيك بس خلي امتحن و على كد النجاح
.. انطيني فلوس
كتله بكلبي لو عندي جان مكابلتك

مجان كدامي غير انطيه سواري الذهب ..

و انطيته السوار و هو اخر ذكرى من عائلتي المشتته و حياتي المميته ..

و ما جذب خبر جاب قرار نقلي لاحد المراكز بالناصريه ..

و قريت زين على كد النجاح و امتحنت و بالمركز هواي غششونه و الحمد لله بعد فتره نجحت ..

بس شنو كلش تعبت بهاي الفتره و خاله سهام اخذتني للدكتور كتب على ادويه كال الهه مايحتاج ابر بس شوي تريح نفسيتها و تقلل ركض لان قلبهه ضعيف

بس هي اصرت عليه الا يكتبلي ابر و وكفتله رجل و نص ..

و هو هم ما صدك كبل كتب ابر ...
و هي معولت راحت اشترت العلاج و اخذتني للبيت و كعدت تنسقلي و تكلي لبسي احلا شي عندج و ضفرتلي شعري الي يوصل لركبتي

و لبسي جان بدي اصفر و بنطرون بوري و فيونكه بشعري للزينه

اخذتني و رحنا لبيت كبير و حلو دكت الباب طلعت المره الي اسمهه ام عزام ..
ام عزام .. يا هلا بسهو زارتنا البركه يا هلا تفضلي فوتي والله من حسن حضج امي اليوم جايتنا زياره

دخلنا فاتت خالتي باست ايدها و اشرتلي عود بوسي ايدهه ..

رحت هي المره ما قبلت لزمتني و كعدتني يمها و تكول ما شاء الله و كان شنو هالجمال حبوبه سهيوه منيلج هالحوريه هاي

سهام .. خاله بالج عنها لا تعديج شوي مريضه سوده عليه فلاونزه هاي بنت ساره اختي الله يرحمه

الحجيه .. يا سبحانك الهي شكد تشبه امهه ، شسمج يحليوه

ابتسمت .. مريم
الحجيه .. مريم العذراء تحفظج بنيتي الله يحميها شكد حبيتها خو ما هواي متوجعه