حَياةٌ في زمنِ الموتِ

"الحلقه الخامسه عشر"

‎#حياة_في_زمن_الموت

للكاتبه 💖 الجبوريه 💖

Al_jubouria
افتحلي باب القفص من عمري ضاعت فرص
احكيلك اني قصص ما مرت بأنسان ..
طير اني واهوا السماء ومتعلق بسجان
لا يحن هو علية ولا طاير وخلصان
حبيته اني بوفه ومسجون خلاني ..
اتحملت كل قسوته وانوب اخذ جنحاني
وشلون يبوس السما المايمتلك جنحان
ومنين اطير بعد ومقفله البيبان ..
لو انت مثلي تحب مسجون ما اخليك
كان اخذ من العمر من العمري انطيك
تدري بيك اشكثر بيك ولهان ...
بكد السما والهوا والاغصان

و هيج لتوجهنا لبيت فيروزه و الي هو على بعد دربونتين من بيت جدي القديم ..

.. عمو هذا هذا و هذا سطحه اي اني ختلت بيه .. ها عمو انزل
خالد .. على كيفج لا تمشين سريع و تركضين لا يروح يوكف كلبج

فتحت الباب .. هو اول و تالي راح يوكف كد ما متحمسه مرت خمس سنوات و ما شايفتهم

دكيت الباب و هو قفل الابواب مال السياره و شال فهد و اجه وكف يمي

سمعت صوت فيروزصاحت .. منو

كتله لخالد انت كلها اني .. هو ابتسم و كال انه

ما سمعت بعد شي بس باوعت حسام فتح الباب اعرفه بس كبران بس ملامحه هي نفسها ..

حسام .. منو
.. اني
من فتحهه شافني كبل فتح عيونه و كال ولج هاي انتي الزيبك لو اني غلطان ..

ضحكت .. اي اني مريم

ضحك و صاح .. فيروزة فيروزه تعالي شوفي منو اجانه
و ثنين جهال ابنائهم يمكن واكفين يمه
اجتي فيروزه باوعت عليه بتركيز كبل عرفتني ..

فيروزه .. ولج ها هاي انتي خرب عمي شكد تشبهين امج  عبالك عمتي ساره واكفه كبالي
و شبكتني و تبجي و اني هم مثلهه
حسام .. يابه دمشو جوه كملو عناقجن راح تخلصنهه بالباب

دخلت و كتله فوت عمو

فيروزه باوعت ورايه .. و فتحت عيونهه .. هذا منو

خالد .. انه رجلها
باوعت بوجهي و باوعت عليه .. مو هواي جبير عليج

حسام .. هسه يا فيروزه خلي يفوتون تفضلو فوت خويه فوت
دخل و هو يكول يا الله دخل انطاني فهد و كعد اني اخذت فهد حطيته بحضني و كعدت

و كعدت يمي فيروزه .. اي شعجب و شلون و وين ما وين

.. اسكتي يمعوده لو باقيه تحت رحمه فليحه و لا رايحه يم خالتج

فيروزه .. ليش شبيهه يا ستار
.. لا قابل شبيهه شافتني ثوله و طفله هلعمري دعش جنت يعني وره اربع شهور من روحتي يمهه زوجتني

شهكت .. عزه بعينهه "و باوعت لفهد" لتكوليلي هذا ابنج

باوعت بوجه فهد و برائته و هو و نايم .. اي ابني