حَياةٌ في زمنِ الموتِ

"الحلقه الرابعه عشر"

#حياة_في_زمن_الموت

للكاتبه 💖 الجبوريه 💖

Al_jubouria
"
لآبد يردون بآچر
سوي نفسك مآ شفتهم ..!
بآلك يحسون آنتَ تذكرتهم !!
آثگل شويه يـ گلبي ..
مره خليهم محطة وآنتَ سآفر !!
آنتَ والدخآن وصبرك والمطر ..
آدري بيك تريد تبجي 
آبجي وحدك آنه سآكت  ..
ل : مظفر النوآب
"

حط الطفل بايدي و اني صافنه طفل كلش صغير مبين خمس او ست سنوات كد ما ضعيف و ناعم ..

و رجعت انطته جنطه ثانيه و اوراق ..

كال الهه .. مشكوره هاي فلوسج و طلع ظرف مليان فلوس
انطاهه الهه و كال يالله امشي مشيت كدامه للسياره و اني مو فاهمه شي

باوعت عليه و اني شايله الطفل حايره ابقي يمي او ارجعه اليوره ..

هو ذي الجنطه و اجه و هو يبتسم كال اصعدي و انطيجياه
و فعلا اخذه من ايدي  و الطفل جان غافي على چتفي ..

اخذه بايده يطلع شكدوته عبالك نمله من يمه ..

و رجع حطه بحضني و الطفل ضميت راسه لصدري و هو نايم ..

ابتسمت كلش يشبهه هذا اكيد ابنه ..

صعد السياره و راح مشى مسافه وكف السياره على سياج النهر ابتسم و كال .. هذا فهد

باوعت بوجه الطفل و رجعت باوعت بوجهه و كتله .. اني كلت اكيد هذا ابنك ما شاء الله كلش يشبهك
خالد .. اي ، تكدرين تبقين يمه من اروح للدوام ؟

راسا انداريت عليه .. اي
خالد .. او اني فكرت هو يبقيج يمه بس طلع كلش صغير تكديرله ، او اعوفه يم زينه

.. لا لا اني يمي و الله اضوج وحدي

ابتسم .. بكيفج لعد هاهيه
و مشا السياره و رجع حجه .. تره هو مريض

.. يا حبيبي شبيه
.. توحد
.. سامعه عن التوحد بس هو شنو ؟
.. التوحد يسموه الذاتويه يعني اضطراب بالطيف الذاتوي ب الطفل و المصاب بيه ينحصر بدائره بنفسه يعني ما يحجي ما يتاثر او يسوي ايماءات اذا صحتي اسمه جنه ما سمع اذا عصبتي ما يهتم جنه ما شايف يعني عنده صعوبه بالتواصل و بالفهم و حتى بالنطق ما يعرف كلمات و اذا عرف فيحجيهن و هو ما يعرف معناها يمكن حافظ كلمه او ثنين اربع كلمات كحد اقصى اله على اي شي يحجيهن

لا يضحك لا يبجي لا يتعاطف لا يقبل احد يلمسه او من ما كان هاي هسه ناطيه منوم ما مدرك اي شي ..
متعود على روتين واحد  و اني خوفي من هاي النقطه يجوز يتاذه و ياذينا ..
مرات يصير مؤذي بشكل اذا ما تحمل ..
و يكون ما عنده اصدقاء لان عنده مشاكل بالتواصل و بالمجتمع يكون ..
و مرات ما يتعرف على اهله و ما يعرف احد ..

بعدين اندار و ابتسم .. ها تراجعتي ؟
.. لا بالعكس اني اتعاطف وياه خلي يمي

اشر براسه و كمل الطريق وصلنا اجه اخذه من ايدي دخله لبيت زينه الواكفه متفاجئه ..
و دخل بس جنطه ..