اعرفكم بنفسي اسمي رحاب عمري 30 سنة طولي 165 وزني 60شعري متوسط الطول اسود .بيضة . عيوني سود كبار .جسمي رشيق .. كثيرة الاهتمام بنفسي . احب ارسم والقراءة والشعر صح ماكملت دراسة بس احب القراءة والكتب كملت الاعداديةواشتغلت معلمة بروضة وبديت اساعد امي بمصرف البيت لان اني الكبيرة بأخواتي ازوجت مو بأختياري.لان امي رادتني ازوج ابن خالتي . لان خالتي بعد وفاة ابوي وكفت ويانة بهواي امور . ازوجت واني عمري 18 وصار عندي طفل اسمة مصطفى .. ابد ماتفقت وي زوجي اغلب حياتنة مشاكل لان هو كان عصبي واني كنت صغيرة ماعرف اتعامل ويا .. انفصلت عنة ورة اربع سنين من زواجي ..انفصلت عن زوجي بعمر ال24سنة رجعت لبيت اهلي . ابوي متوفي . عشت وي امي واخواتي. اسماء بلكلية قسم تربية وشيماء تدرس بلاعدادية انطوني اهلي غرفة وعشت وياهم اني وابني .. كنت مرتاحة ومامتندمة ابد لاني منفصلة بلعكس حسيت بلحرية .. كنت اني ابيت اهلي مسؤلة عن الطبخ .والتنظيف وكلشي . لان اخواتي يدرسن بين دوام وشغل البيت وطلبات اخواتي وتربية ابني نسيت نفسي .مرات امي تكلي انتي عمود البيت وفد يوم كعدت الصبح غسلت ولبست ملابس الدوام واجيت يم امي اتريك
رحاب.. صباح الخير يمة
امي .. صباح النور رحوبة
رحاب .. اي يمة عاشت ايدج ريحة الجاي بلهيل تجنن امي .. بلعافية ماما
كملت ريوك وردت اطلع يمة محتاجة شي اني رايحة
امي .. الله وياج ماما بس رحاب تكدرين تطلعين من وكت .
رحاب .. ليش يمة
امي .. عمج خابرني
رحاب .. . وشذكرهم بينة من اتوفة ابوي لاشفناهم ولاشافونة
امي .. يكولون طلع النة ورث . .
رحاب .. صدك يمة وشطلع النة
امي .. مادري عمج كال اليوم امركم وافهمج بس يمة خاف تصيرلي طلعة ويا تعاي من وكت علمود ابنج .
رحاب .. اي يمة اشوف بلكي يقبلون اطلع واذا تردين اخذة وياي
امي .. لايمة شيطلعة وياج الجو بارد
رحاب .. لعد اشوف بلكي ينطوني رخصة واطلع من وكت
امي .. خوش
رحاب .. يلة يمة مع السلامة
امي .. الله وياج يمة
طلعت لدوام وبقيت تقريبا ساعتين وبعدين رحت اترخصت من مديرة الروضة وكتلها عندي شغلة اريد اطلع . انطتني اجازة ورجعت للبيت . لكيت ابني نايم وامي بلمطبخ . رحت كتلها هايمة اجة عمي كالت هسة علة جية .. واحنة نسولف اندكت الباب اجة عمي امي كالتلي يمة رحاب كملي طبخ لبين ماروح اشوف عمج شعندة ..راحت امي واني بقيت اكمل الطبخة ..
صاحتلي امي كالتلي رحاب تعاي سلمي علة عمامج لبست شالي ورحت للاستقبال اول مادخلت صار
بوجهي واحد . طويل اشكرشعرة بي ضربات شيب عيونة خضر لابس قاط اسود شكلة مرتب ومحترم . مديت ايدي سلمت علية حسيتة صفن بوجهي . ورحت سلمت علة عمي .. وكعدت يمهم وهمة يسولفون عمي كال ماشاء الله رحاب كبرانة .امي كالت اي وصارت ام .. عمي كال الله يوفقها .ويكتبلها نصيب احسن .. اني شكرا عمو ☺
كملو كلامهم وي امي وتفقو باجر يرجعون علمود ياخذونة نوقع اوراق. وراحو.. اني سألت امي
رحاب .. يمة منو اجة وي عمي
&
&
&
