قفلت البيت وطلعت صعدت بسيارة . علي كال وين مصطفى كتلة بقة يم امي .خليت بنتي بحضني ومشينة . وصلنة لبيت علي 🏤 باب جبيرة فتحها رجال .دخلنة بسيارة اباوع من الجامة اشوف بستان والاشجار والورد علة طول طريق السيارة سنادين الورد الملون نزلت من السيارة صار البيت كبالي قصر . دخلنة اجت مرية تلكتنا اخذت الجنط . صعدتها اباوع علبيت مثل الي اشوفة بلافلام .تحفيات راقية بناء راقي .فرحت بلبيت وتفائلت بي ماتوقعت هاي بداية مأساتي .. علي كالي رحاب خلي نصعد لغرفتنة . صعدت الدرج واني اباوع بلبيت السلم لونة ذهبي يلمع .وكلشي مرتب حسيتة مثل بيت الملوك . وصلت لغرفتي دخلت غرفتي الغرفة عبارة عن جناح بي حمام وركن خاص لبنتي بي غرفة اطفال . وركن ثاني بي غرفة نوم . وتخم قنفات وثلاجة .. وكلشي كان جديد .وراقي . علي كال رحاب عجبتج الغرفة كتلة حبيبي طبعا واني مذهولة فتحت الكنتور وضليت ارتب ملابسي .علي كال عوفي وتعاي اريد اكلمج بموضوع .كتلة كول حبيبي كعدت يمة كال رحاب اريدج تتحملين بنتي مريم ترة عصبية والبيت هي مسؤلة عنة من تمرضت والدتها صار كلشي بكيفها .حاولي تتفهمين الوضع . البنات متأثرات بوفاة امهن .ومن هلحجي . كتلة علي مايصير غير الخير الخاطرك كلشي اتحمل .ضلينة بلغرفة اني وعلي لمن صار وقت العشة كال علي خلي ننزل . نزلنة كعدنة بصالة علي صاح علة المرة الي تشتغل عدهم ام وليد حضري العشة ونادي للبنات خلي يجن .
اني خالة بنتي بحظني وساكتة شوية واجن بناتة اثنين
مي ومها . كلش حلوات مي عيونها خضر وشعرها اشقر حالتة واصل لركبتها ومها عيونها سود بس وساع وشعرهالخصرها صابغتة دانتيل احمر يخبل لابسات تراكات برمودة لون اسود. دخلن للصالة هلو بابا بوسن ابوهن وباوعن علية علي كال بابا هاي رحاب زوجتي واختكم ميسم .اني رحت عليهن وسلمت وبوستهن هنة هم سلمن علية خوش سلام . اني كعدت يمهن واخذن ميسم يلاعبن بيها . ضلن يسولفن مبينات حبابات .علي كال بابا وين اختكم كالت مي هسة علة جية . بقينة نسولف دخلت علينة وحدة طويلة بيضة عيونها كبار كانت لابسة نظارات طبية . وخالة شال مفتوح بس مغطية شعرها ركبتها مبينة . لابسة بنطرون اسود وسترة قصيرة سودة .وجنطة . علي من شافها وكف علة حيلة وسلم عليها يعني مبين من سلامة يحسبلها الف حساب .
