البارت الخامسه وثلاثون
كعدت اصيح بنتي بنتي ميسم ماما . شفت نفسي بغرفتي وعلي يمي ومريم علي يبجي باوعت مكانها فارغ مريم تبجي كتلهاانتي السبب بنتي طابت انتي موتيها باوعت لعلي كتلة ياريتني ماجيت وياك ياريتني مازوجتك ولاشفت هذا اليوم وابجي كتلهم اطلعو عني ماريد اشوف واحد منكم طلعو عني بقيت وحدي رحت اباوع شفت صبغ الاظافر علميز طشرت الغراض الي علميز بلكاع باوعت لنفسي بلمراية شفت عيني صغرانة وحلكي صاير صفح.من الصدمة .جبت جنطة ولميت ملابسي بيها وسحبتها وطلعت جانو كلهم كاعدين بصالة شافوني نزلت وكفو كلت لام وليد نزليلي الجنطة . نزلت وكفت كبال علي وكتلة طلكني... ضل ساكت مريم اجتني كالت لاترحين هذا بيتج والله الدكتور كال حتة اذا عاشت هسة من تكبر هم تموت والله مجان قصدي أذيها هيج اني ساكتة . نزلت ام وليد الجنطة سحبتها وطلعت من البيت . علي طلع وراي يتوسل بية ابقى كتلة اذا ابقى اموت . وسكتت كال خلي اوصلج . صعدني بسيارة وطلعنة امشي بسيارة واذكر اشلون من اجيت واول مادخلت للبيت ماتوقعت طلعتي منة تكون هيج .
علي راد ياخذني لبيتي كتلة لا وصلني لامي .
وصلني لامي كتلة روح لاتنزل وياي كالي رحاب لاتعوفيني والدمعة بعيونة ..
نزلت دموعي واني ساكتة فتحت باب السيارة اخذت جنطتي ونزلت . دكيت الباب طلعت اختي انصدمت من شافتني .ضلت تصيح وحضنتني دخلت للبيت خجلانة من امي اذكر كل نصايحها الية حتة مازوج علي . واني مارتديت . دخلت كبل لغرفتي كلت لختي شيماء جيبيلي مصطفى .اجت امي حضنتني واخذت بخاطري اخواتي كعدني يمي كتلها وين مصطفى شو مدى اشوفة امي كالت مصطفى راح لابو . من كالت هيج انفجرت بلبجي وضليت الطم امي حضنتني . ذكرت هذاك الحلم الي شفتة وعرفت الكلادة جانت بنتي .
ضليت ابجي كلت يمة خسرت كلشي كلشي راح ياريت اموت..ورتاح امي تهدئ بية بعدين نمت
مرت الايام وبديت اراجع دكتور نفسي . حالتي تتحسن اخذ مهدئات ابني اشوفة كل اسبوع . كل هذا المرار واني بعدني احب علي
هواي اتصل علية ومارديت غيرت خطي وحساباتي . ضل يجي لهلي ويتوسل حتة ارجعة بس اني كرهت حياتي وي علي كرهت ضعفي وتنازلاتي الة . فضلت احبة من بعيد . واحاول ارجع الي ضاع مني ابني وشغلي و حياتي . .
النهايه
