كملنة شغلنة ورجعنة للبيت . اني هم رحت سويت غدة وتغدينة .. ومرت الايام واستلمنة حصتنة من الورث اني نصيبي كلت لامي راح اشتري سيارة واتعلم سياقة علمود اروح وارجع بيها للدوام.مر شهر .
ورة الشهر رجعت من دورة السياقة العصر. دخلت للغرفة اريد ابدل ملابسي . اجت شيماء كالت
شيماء ... ولج رحاب تعاي اكلج شغلة صارت اليوم بس لاتكولين اني كتلج
رحاب .. شنو كولي
شيماء .. تذكرين الرجال الاجانة وشفنا بلمحكمة علمود شغلة الورث
رحاب .. اي شبي
شيماء .. ولج اليوم خطبج
رحاب ..شنو صدك ولج
شيماء .. اي ولج اليوم اتصل علة امي بس ......
رحاب ... بس شنو ولج احجي
شيماء .. بس امي ماقبلت وكالت رجال جبير مانطي
رحاب .. هااا خوش وسكتت
ضليت بس اصفن اكول يعني هو يفكر بية . لمن نمت ..
كعدت الصبح ضليت انظف بلبيت شفت تلفون امي علشحن . اخذتة وفتحتة شفت سجل المكالمات شفت رقم مسجل بأسم ابو مريم ..وعلية صورتة
باوعت علرقم وحفظتة . رجعت للغرفة واخذت تلفوني وحفظت الرقم بي .وخليت الموبايل علميز وطلعت من الغرفة . كملت شغلي وصار العصر وطلعت لدورة السياقة هناك تأخرالمعلم وبقينة ننتظر.. اني فتحت جنطتي وطلعت تلفوني وطلعت الرقم وباوعت علية وضلت افكاري تشجعني اتصل وحيائي يرفض الى ان طلعت ميت مبرر لنفسي وتشجعت وضغطت علة الاتصال واتصلت علية .. اول دكة خفت فصلتة وخليت تلفون بجنطة .. بهلثناء وصل المعلم وبدة يشرح ..فجئة دك تلفوني اني احس كلبي طفر من مكانة وكانت علامات الارتباك واضحة علية . المعلم كال رجاء لو تغلقون اجهزتكم لو تخلوها صامتة . لبين ماينتهي الدرس . فتحت الجنطة وطلعت تلفوني شفت اختي شيماء تتصل علية .. رفضت الاتصال وخليتة صامت ورجعتة للجنطة .. ضليت صفنة تاخذني وصفنة تجيبني ولافهمت شي من الدرس بهذاك اليوم .ساعة اكول ليش اتصلت وساعة اكول ليش ماتصل .. لمن كمل الدرس وطلعنة كلت خلي اتصل علة شيماء اشوف شعدها مخابرتني خاف مصطفى بي شي . طلعت جهازي باوعت علة تلفوني لكيت 6مكالمات فتحتهم لكيتهم من (ابو مريم).. خفت وفرحت ورتبكت نحرجت ..
&
&
&
