علي كال رحاب حبيبتي لاتخافين اني وياج باوعت لعلي وبجيت ماسيطرت علة نفسي امي يمي كتلها ماما ديري بالج علة مصطفى . امي نزلت دمعتها ..علي لازم ايدي .اجت الممرضة كالت يلة رحاب لازم تتحضرين للعملية .. كتلها اي . شال علي ايدي وباسها كال الله يسهلج يعمري
هديت ايد علي وامي اجت باستني .وحضنتني . ورحت امشي وي الممرضة . دخلتني لغرفة كالت راح اساعدج بغيرين ملابسج غيرت ملابسي ونزعتني قراصة شعري وحلقتي وتكرومون شحاطتي .. اني حسيت الالم خف بقيت حاطة ايدي علة بطني ومنتظرة الممرضة كالت يلة رحاب دخلوني لغرفة ثانية وكان تخوف باوعت شفت ادوات العملية وجهزة القلب وغيرها . صارت عندي خوفة اخذتني الممرضة من ايدي وكالت لاتخافين لازم تنسين الخوف علمود طفلج . اني قويت نفسي وتمددت علة السدية . اجاني دكتور التخدير كالي رحاب مستعدة كتلة اي ..خلة جهاز علة خشمي وكالي اسنشقي استنشقت مرتين والثالثة ماحسيت بعد بنفسي ..
وعيت علة الالام قوية ابطني كعدت ابجي اجتني الدكتورة ضربتني ابرة اذكر بس كلت وين بنتي واسمع امي جاوبتني بس مافهمتها شكالت .
صحيت ثاني يوم شفت علي كاعد يمي وامي .. كتلها يمة وين بنتي كالت بلحضانة .كتلها اريد اشوفها وديني الها ..
جابولي كرسي متحرك لان عندي الم قوي بلعملية . ساعدني علي كوة كدرت اتحرك واجلس علة الكرسي . اخذوني للحاضنة دخلت شفت هواي اطفال بحاضنات الممرضة اخذتني علة بنتي باوعت شفتها نايمة وخاليلها جهاز تنفس . خفت عليها كلت لممرضة شبيها بنتي كالت لاتخافين تعبانة من الولادة ..بقيت اتحسسها من ورة الجام ..
رجعوني للغرفتي بقيت بلمستشفى ثلاث ايام بليوم الثالث جابولي بنتي .رضعتها وخليتها بحضني التلمس بشعرها وفرحانة بيها كلت لعلي راح اسميها ميسم. الدكتورة كالت لعلي تكدر تطلعهم بس لاتنسى الي كنالك بي .. باوعت لعلي واشرتلة شنو ابتسم وكال ماكو شي ..
