اجة كتلة علي ام مريم تعبانة لاتتعبها بلكلام . سكت وراح كعد علقنفة وينفخ ويتحسر .. اعيونة حمر وجه مخطوف من التعب والقلق ..
رحت جبلة كلاص مي بارد ارتاح اشوية بعدين باوع لام علي كاللها بأبتسامة اخر مكان جنت اتوقعج بي هذا . تجين لضرتج ماصدك ..
ابتسمت ام علي وكالت دنيا عجائب عيش وشوف ...
ضحك ابو علي وكال رحاب راح اجيب عشة من برة . لاطبخين شي اليوم نتعشة سوة ..
اني رحت للمطبخ احضر اللبن والفواكه ..حاجيت اختي علفايبر وكتلها علة الصار اجلي جيتج لباجر ..
اجة علي وجايب عشة كعدت مصطفى من نومتة واجة يتعشى ويانة .. كالت ام مريم هذا ابنج كتلها اي كالت الله يحفظة حلو ..
كتلها شكرا . كالت اني احب اباوع علاطفال احس بلأمل بعيونهم ..
بعدين كملنة عشة وشربنة جاي . علي كال لزوجتة يلة خلي نروح ..
اخذ علي زوجتة وطلع واني احس كلبي راد ينفجر من الغيرة . كملت واجبات ابني ورحت انام . تمددت علة السرير وكلام ام مريم يدور براسي . الى ان غفيت .
صباح يوم جمعة ...
اتصلت علة اختي اسماء
الو اسماء
هلو رحاب
مريلي اليوم نروح للدكتور
خير رحاب اكو شي
لا ماكو بس اريد اجيك امور الحمل واعرف جنس الطفل
خوش العصر امرج
وصار العصر رحنة للدكتور دخلت واني بيني وبين نفسي اكول يارب تطلع بنية يارب ابنية
وبعد الفحوصات والسونار كالت الدكتورة امورج جيدة وانتي نهاية الشهر الخامس وحامل بأبنية
رحاب . صدك دكتورة الحمد لله
بقت الدكتورة تفحص وتمشي جهاز السونار علة بطني وكالت انقلبي يمين ويسار ..بعدين كالت كل شهر لازم تسوين مراجعة .. كتلها ليش كالت الطفلة تعبانة
اني خفت يمة لا اسم الله ماكو شي دكتورة
طلعت من الدكتورة واني مهمومة رحت لبيت اهلي حجيت لأمي ضلت تسولفلي كالت من جنت حامل بيج كالولي نفس الشي يمة لاتخافين هذولة الاطباء يكولون هيج حتة ترجعيلهم .وهمة المستفادين .. حجي امي وفرحتي لان طلعت حامل بأبنية نساني شوية . حجيت لعلي وكالي لاتخافين ماكو شي
مرت الايام وبطني كبر وبديت احضر لولادتي حضرت ملابس الطفلة وكلشي يخص الولادة كان علي وياي بكل خطوة اخذت اجازة من دوامي .
فد يوم كعدت الصبح باوعت للتقويم شفت نفسي بعد يومين ادخل بشهر التاسع . قرب موعد عملية الولادة.رحت احضر الريوك حسيت بتقلصات قوية بطني كعدت علة الكرسي كلت يجوز لان نهاية شهر . اريد اكوم ماكدر من مكاني احس بألام ولادة اخذت تلفون اتصلت علة علي وامي..
اجو اخذوني للمستشفى الدكتورة كالت عدها ولادة مبكرة وتباوع بأوراقي . كالت هسة تدخل للعمليات طفل تعبان . اني خفت كتلها دكتورة خاف يصير شي علطفل .. كالت لا ان شاء الله ماكو شي
