علي ... وصلت لبيتي ودخلت لكيت زوجتي ام مريم كاعدة بغرفتها .. اجيت كعدت يمها .. اعرفكم عليها زوجتي اسمها عواطف عمرها تقريبا 60 قبل ثلاث سنوات اكتشفنة هي مصابة بمرض خبيث سوت عملية بلهند وبقت تتعالج وحاليا شوية احسن بس بعدها تحت الرعاية الطبية ...
كعدت يمها .. وضاع علية الكلام اريد ابدي ماعرف شلون بقيت اسأل علة صحتها وكل اشوية اكلها اشلونج .. هي كالت كول علي شعدك .. كتلها ها شعدي
كالت الحجي الي بكلبك كولة
ها وشعرفج عندي حجي بكلبي
باعت علية وكالت عشرة عمري وابن عمي اعرفك بدون ماتحجي ..
علي .. ضميري انبني من كالت هيج والدمعة صارت بطرف عيني كتلها ماريدج تزعلين .. كالت ازوجت مو
باوعت عليها بستغراب كتلها شمدريج
كالت مو كتلك اعرفك بدون ماتكول
علي .. سكتت مانطقت بكلمة هي كالت اذا انت ازوجت ليش جاي تكلي
باوعت عليها بعجز وتايهة مني الكلمات .. كتلها هااااا وسكتت كالت كول اريد اسمع شنو الي خلاك تجي وتكلي هسة ...رغم مرضها وعجزها بس حسيت موقفها اقوى مني .. عمري كلة خلصتة بعيد عنها خلصت عمري سفر وهي فنت عمرها ابيتي وتعبت علة اولادي الى ان وصلو الى اعلى المستويات .. ضليت مدنك راسي .واحاجي نفسي .. اكول ضلمتها اي ضلمتها .. بقيت ساكت باوعت علية وكالت كولي ليش ..
شلت عيني وباوعت عليها شفت بعيونها دمعة هضم .. حسيتها مكسورة خاطر .. انعكد الساني .وماكدرت احجي .. كالت كول علي الصار صار سكوتك مايفيد بشي ..
كتلها .. رحاب حامل ..
كالت .. منو رحاب زوجتك كتلها اي كالت والمطلوب مني كتلها مامطلوب شي بس الطفل محتاج هوية وزواجي مامسجل بلمحكمة واجيت اخذ موافقتج ..
كالتلي علي . انت عبرتني من زمان ونسيتني والدليل ازوجت بدون علمي.. الي تريدة سوي اعتبرني موافقة
ودمعتها نزلت .. رحت الها وحضنتها ودموعي صبن .. كتلها اعذريني .. هي بقت ساكتة . عمرها كلة خلصتة وياي وهي سلكتة عمرها ماسمعتني كلمة ..حضنتها وضليت اتعذر منها ..بعدين طلعت من الغرفة وصحت لبناتي كتلهم تعالو جهزو امكم نريد نطلع ..
واخذتها وطلعنة تعشينة برة وطول الطريق اعتذر منها . ادري بنفسي دست علة كلبها وهي مريضة بس موبيدي رحاب تجري بدمي ماكدر علة فراكها ..
طلعنة اني وعواطف وتعشينة برة وفترينة بسيارة ورجعنة للبيت . هي اول ما وصلنة حطت راسها ونامت .لانها مريضة وتاخذ علاجات ومسكنات ..
اني ضليت يمها وماحسيت علة نفسي ونمت كعدت الصبح تريكت وبدلت وطلعت للشغل ..
اتصلت علة رحاب وكتلها اليوم اتغدة يمج ...
