رجعنا تانيييي بي روايههه وان شاءالله تعجبكم ودايرا تفاعل كتير عشان اتحمس معاكم
قصتي المره دي مختلفه شويه يعني ممكن تكون فكره جديده
الروايه ححكيها علي لساني انا بس بي اسم اسيل❤
بسم الله نبدأ
#الجزء الاول
انا اسمي اسيل ايهاب عمري ١٧ سنه عايشه في امريكا مع ابوي❤
امي الله يرحمها اتوفت وهي بتولدني اول ما امي اتوفت ابوي ساقني وجينا امريكا ومن اليوم داك ما حصل شفت السودان ولا حتى بعرف شي عنها ولا عن اهلي الفيها.
وكل ما كنت اسأل ابوي انا ما عندي اعمام او خيلان او كده يقول لي انتي بس عندك عم واحد اسمو حسين...
طبعا ابوي النوع الموفر لي اي شي في الدنيا مستحيل اقول دايرا شي وما يجيبو لي كانت طلباتي دايما مجابه ومنفذه كنت عايشه احسن عيشه وشايله احسن تلفون وبلبس احسن لبس وطبعا كنت ممتحنه اخر سنه في الثانوي وبعدين امشي الجامعه😥💔
انا كنت ذكيه شديد وبفهم الحمدلله والشي ده كان واضح من وانا صغيره بحب افكر واقرا كتب واشوف قضايا معقده واحلها وكده
يعني حياتي مع ابوي كانت مثاليه الحمدلله🙏💙
لكن طبعا كان العنصر الاسري مفقود يعني لا ام لا خاله لا عمه اي صح ابوي حنون شديد وما مقصر معاي وكان لي ام واب لكن برضو دايما كان نفسي يكون عندي اهل وكده
وابوي ما كان يخليني افتح الموضوع كتير او كل ما اجي اسألو من خالاتي او كده بتهرب من الموضوع وانا ما كنت عارفه السبب شنو😊❤
المهم حياتي كانت عباره عن اني بمشي المدرسه برجع بلقا الخدامه محضره لي الاكل باكل وبطلع انوم اصحا بالليل القا ابوي ياداب رجع اقعد معاهو اقرا شويه وانوم وهكذا...
احنا ساكنين في فيلا تقريبا بي مسبح وجنينه وكده لانه ابوي وضعو المادي فوق الريح وعندو شركات هنا في امريكا وفي السودان..
الفيلا الجمبنا كان عندي فيها صحبتي سعوديه اسمها تالا
انا بي طبيعتي زوله انطوائيه شديد يعني لو زول داير يتكلم معاي ممكن اسبوع هو يحاول بس انه يتكلم معاي وانا ياداب ابدا اتجاوب معاهو
لكن تالا دي غير اييييي شييي
انا من جيت امريكا وكنت طفله كنت بلعب معاها ودخلنا مدرسه سوا واي شي كنا بنسويهو سوا ومافي زول بصبرني علي القعده من غير اهل ولا عيله غير تالا🙏❤❤❤❤❤❤❤❤❤
.............................................................
الليله يوم الخميس صحيت الصباح بدري جهزت نفسي وشلت مفتاح العربيه وطلعت اتصلت لي تالا جاتني برا ركبنا العربيه واتحركنا علي المدرسه..
طبعا انا داخله مدرسه اجنبيه يعني وانا وتالا ومعانا بتين تاني تقريبا بس العرب
المهم دخلنا الفصل والاستاذه بدأت تقول انه الامتحانات النهائيه الاسبوع الجاي ولازم تستعدو وكده واصلا خلاص ختمنا المناهج بس بقينا نمشي نراجع ونشيل اوراق عمل وكده
الاستاذه...Hey girls next week it will be a vacation and you will start exams next Monday
(هاي يا بنات الاسبوع القادم سيكون اجازه وستبدأون الامتحان يوم الاثنين المقبل)
اسيل....احسن زاتو نقدر نقرا
تالا...اي الحمدلله يارب
انا وتالا طلعنا مشينا المكتبه شلنا اي شي بنحتاجو وكده وطلعنا علي البيت طوالي
تالا دخلت بيتهم وانا شفت عربيه ابوي واقفه بره استغربت انه ابوي جاي بدري كده ليه قلت اخش سريع اشوف الحاصل شنو
بركنت العربيه وفتحت الباب ودخلت
سالت اوليفيا(الخدامه) قلت ليها ابوي وين؟؟
اوليفيا.....في الطابق الفوق في مكتبو(طبعا بتتكلم انجليزي لكن انا حكتب ليكم بالعربي😂😂)
طلعت براحه وانا في السلم سامعه ابوي بكورك وبقول يفشي ياتو سر ياخ اصلا يا حسين انت اي زول من طرفك بعمل لينا موضوع
مشيت وقفت جمب المكتب براحه
ابوي....اسمع اسمع انا نازل السودان اليومين الجاين ديل لكن انا لو جيت ما حخليه عايش
طبعا انا مخلوعه من كلام ابوي بعدين هو اتلفت وشافني واقفه
ابوي....برجع ليك يا حسين بعدين
انا حسيت لمن ابوي شافني لون وشو اتخطف
ابوي....بتي السمحه كيف المدرسه الليله وجا سلم علي وباسني من راسي
قلت ليهو بابا انت نازل السودان لي؟؟وده منو الما حتخليهو عايش؟؟
ابوي...اااا لالا يا بتي ما تشغلي بالك ودي امور شغل بس الشركه الممسكها لي عمك هناك حاصل فيها شويه مشاكل
قلت ليهو اهااا طيب
#وقفه
طبعا انا كنت بصدق ابوي في ايييي شي يقولو لي مستحيل يوم اشك في حرف قالو لي ابوي يعني كلام ابوي ده خلاص بصدقو الف في الميه عشان كده ما كنت بتدخل في امورو اكتر من اللازم يعني يقول لي الحاجه اصدق وخلاص
#نرجع
قعدت اتونست مع ابوي شويه وبعدين مشيت غرفتي ومسكت الورق حقي وقعدت احل فجأه اتزكرت الطريقه الكان ابوي بيتكلم بيها بالتلفون لي كان بتكلم بالوحشيه دي لكن طوالي قلت ده شغلو وانا ما لي دخل خلاص
حليت الورق حقي وشلت التلفون اتونست مع تالا شويه خشيت قروب عاملاهو مشرفه الفصل شفت الاسئله المنزلنها وقفلت التلفون ونمت
*********************************
زي الساعه تلاته صباحا كده جاتني صحيه فجاءه نزلت من السرير ومشيت فتحت التلاجه الصغيره الفي غرفتي لقيت فيها عصير بس مافي مويه
قلت يا الله من اوليفيا كم مره قلت ليها تتأكد انه التلاجه فيها قزايز مويه
فتحت باب غرفتي وطلعت لاحظت انه باب المكتب بتاع ابوي فاتح استغربت ابوي قاعد في مكتبو للساعه تلاته صباحا ليه؟؟!
مشيت علي المكتب وفتحت الباب لقيت ابوي مطلع ملفات كتيييييره وشغال باللابتوب
لمن شافني طوالي قام
ابوي....بسم الله يا بتي مالك؟؟ في شي واجعك ولا عيانه ولا دايرا شنو اوليفيا دي زاتها وينها
قلت ليهو ابوي روق مافي شي بس نزلت اشرب مويه لانه تلاجتي مافيها ولقيت نور المكتب حقك فاتح جيت اشوف فشنو
ابوي....اااا طيب اقعدي يا بتي اجيب ليك مويه
فتح التلاجه الفي زاويه المكتب طلع قزازه مويه وفتحها وادني ليها وقعد قصادي
قلت ليهو ابوي فشنو من الصباح انت مشغول وبتكورك انا ما فاهمه
ابوي....زي ما قلت ليك يا اسيل مافي اي شي شويه مشاكل في الشغل وبتتحلا واصلا قايم انوم انا يلا قومي
فعلا ابوي قفل انوار المكتب وطلعنا هو خش غرفتو وانا خشيت غرفتي وقعدت في المكتبه حقتي
وبقيت بفكر اول مره من اتولدت اشوف ابوي كده لي ملامح وشو زي الزول الحاصله ليهو مصيبه قلبي كان مقبوض شديييددد دخلت الحمام طوالي اتوضيت وصليت ركعتين ودعيت انه ربنا يحمينا من الجاي
*************************
#نوصف اسيل وتالا قبل ما نمشي في الاحداث
**اسيل طويله لونها ابيض ضعيفه لكن ما شديد شعرها لي نهايه ضهرها اسيل كانت جميله لي درجه اي ولد في المدرسه نفسو بس يتكلم معاها لكن هي ما مديه وش لي اي زول❤
**تالا كانت من السعوديات السمحات والسمر برضو كانت طويله وضعيفه وعيونها كبار وسمحين شديد بالمختصر جميله لكن ما بتحصل اسيل❤❤
**ايهاب ابو اسيل كان من رجال الاعمال المعروفين في العاصمه واشنطن كان راجل عندو سلطتو ونفوذو وعندو اسمو في سوق الاسهم
#يتبع
ما تنسو التصويت
في امان الله🙏❤❤❤❤❤❤❤❤❤❤❤❤❤❤
