*لِحُزني حكايه...YARA YACOUP*
الجزء الثامن والعشرون
اليوم التاني خالتو هاجر صحتنا من الصباح وعامله فطور قالت تمشي تشوف خالتو سماهر بقت كيف انا حاولت اني اتحجج بي اني مرهقه وكده لكن خالتو هاجر قالت لي لا الا تمشي وكده ما صح
فعلا مشيت وانا اصلا ما نفسي اشوف عمر نهائي ود كانت اول مره يجيني الشعور د💔.
مشينا انا وخالتو هاجر ومنى لمن وصلنا البيت خشينا وسلمنا عليهم وخالتو سماهر بقت كويسه شديد الحمدلله
قعدو اكلو وطبعا انا ما اكلت لاني ما باكل الاكل التقليدي د
شربت عصير وقعدت في تلفوني
لفتني صوت عمر وهو نازل من السلم وبقول اي يا نغم اتلفت رفعت راسي وهو اول ما شافني قفل التلفون وجا سلم لمن جا جمبي قال السلام عليكم وقعد
انا اصلا ما رديت ليهو
بقا قاعد ولا كانو حاصل شي اساسا وبتونس وبضحك
عمر....وين عمو يوسف ومؤيد ؟
خالتو هاجر.... جاينك بعد شةيه ما تمرق قالو الا يجو يشوفوك بقيت كيف!
عمر....ما بقصرو والله ياخ
خالتو سماهر.... مالك انتي يا بتي خشمك ما فتحتيهو؟
قلت ليها لا ماف شي وانا العبره خانقاني خلاص ما قادره اقعد جمبو كده واعاين في وشو طوالي طلعت بره وبقيت بجر نفس وبقول اسيل انتي قويه يا اسيل قويه
سمعت صوت عمر وراي وهو بقول قويه شديد
اتلفت عاينت ليهو ودايرا اتخطاهو اخش البيت مسك يدي
قلت ليهو عمر فك يدي
عمر....لا ما حفكها قبل ما افهمك
قلت ليهو عمر ما دايرا افهم انا وبقيت بعلي صوتي شديد
عمر وهو بضغط يدي قوي صوتك ما تعليهو
قلت ليهو بي صوت عالي شديد فك الزفت د فكني ياخ قرفانه منك ومن اي شي بخصك
عمر...اتكلمي بي اسلوب يا اسيل عشان نا اسوي شي ما يعجبك
انا كمان لمن قال كده فرت شديدددد بقيت بقول بي صوت عالي داير تعمل شنو وريني بعد العملتو انت في شي بتعمل تاني؟
وريني في شي؟
خالتو هاجر وخالتو سماهر طلعو سريع ووراهم دنيا ومنى
خالتو هاجر.... فشنو اصواتكم عاليه كده ليه؟
قلت ليها خليهو يفك يدي يا خالتو وانا ببكي وبصرخ
خالتو سماهر.... فك يدها يا عمر
عمر....لو ما سمعت انا داير اقول شنو ما حتمشي
قلت ليهو عمر انا ما قادره اعاين ليك في وشك ما قادره دايرني اسمعك اصلا بي ياتو عين جاي تتكلم معاي وريني بي ياتو عين؟؟؟؟؟
خالتو سماهر.... عملت للبت شنو حالتها كده يا ولد
قلت ليهو جاوبها عملت شنو يلا ولا صح ما حتقدر تقول ليهم لنا ححكي ليكم ولد المصوت يا خالتو لمن دخلت علبهو المكتب كان ببوس في نغم الهي حبيبتو القديمه ياخ انا خجلانه احكي ليهم والله الطريقه المقرفه الكنتو مقربين فيها علي بعض
لا وشنو انا البقول ثقتي فيهو كبيره اصلا انا متخلفه لاني فكرت احب زول زيك
منى...اسيل روقي فشنو يا بت ما كده
عمر....خليها تتكلم يا منى خليها
قلت ليهو بي صوت عالي ما تمثل انك مثالي ما تستغزني انت عارف انك حقير صح
عمر وهو بلوي لي يدي صوتك ما تعليهو للمره الالف
فجاءه حسيت زول جراني منو رفعت راسي لقيتو مؤيد وعمو يوسف ضرب عمر في صدرو قاليهو مجنون انت؟؟؟مجنون من متين الرجال بستقو علي البنات من متين؟؟
امشي من هنا يلا ما داير اشوفك يلا
فعلا عمر دور العربيه ومشا وانا بس ماسكه في مؤيد وببكي شديد
دخلوني جوه وبعد ما هديت وخلاص
عمو يوسف طبعا منى حكت ليهو اي شي
قام قالي هسا يا بتي دايرا شنو الدايراهو ببقا
قلت ليهو ماعارفه يا عمو بس دايرا ارجع البيت انا خلوني ارجع البيت
مؤيد.... طيب يلا ما تبكي بس
فعلا رجعت البيت واليوم كله قافله نفسي في غرفه وما اتكلمت مع زول بس قاعده بفكر وببكي لمن فجاءه قلت لي نفسي بتبكي ليه انتي؟؟؟ عشان ثقتك كانت كبيره فيهو؟؟ عشان حبيتيهو؟؟ طيب اوكي حبيتيهو وعمل موقف زباله حتبكي كده؟؟ ولمتين ؟؟ اسيل قومي انتي تخريجك بعد اسبوع قومي يلا ده الفرحه الكنتي دايرا ترفعي راس ابوك فيها
قمت استحميت وصليت وقريت قران الحمدلله ارتحت شويه وشلت تلفوني اتكلمت مع تالا وقعدت تقول لي طيب حتعملي شنو
قلت ليها تالا انا ما قادره اشوفو قرفانه منو يا تالا
تالا...فكري بعقلانيه هو عمل كده ليه مش ممكن تكون هي القربت منو ما هو
قلت ليها تالا لو سمحتي عمر الانسان الوحيد الما بعمل حاجه الا بي ارادتو ما تحاولي تقنعيني عليك الله
تالا....انا ما ببرر ليهو طبعا لكن ديل رجال وفي لحظات ضعف لو هو المشا لحدي بيتها وقرب منها اوكي بس هي الجاتو واكيد اتخاففت وقربت منو وعمر كونو راجل ما قاومها
قلت ليها لو بحبني كان خلا علاقتو معاها رسميه يا تالا اقفلي الموضوع خلاص عليك الله صدعت.
قفلت منها وخشيت الواتس رديت للناس السافهاهم فجاءه دق لي محمد رديت واتونست معاهو وقعد يضحكني شديدددد بالجد فرحت شديد من المكالمه حقتو🥺❤️❤️❤️❤️❤️❤️❤️❤️❤️❤️❤️❤️
لمن خلصت ختيت في الاستوري حقي صوره سودا وكتبت تحت #وقد كان قلبي بأسمري ولهان💔
انا لمن كتبتها ما قصدي الفت نظر زول او كده لقيت اي زول بقا بسالني فشنو مالك ما رديت ولا لي زول واحد
**************************
بديت اجهز لي تخريجي وكده واشتريت الفستان وكده بعد يومين من الحصل اتصلت لي دُنيا بالليل كده
رديت ليها قلت ليها اي يا دنيا
دنيا....اسيل عمر وين؟
قلت ليها ما عارفه ما بتكلم معاهو في شنو؟
دنيا...من اليوم الطلع فيهو لمن اتشاكل معاك تلفونو قافل وما عارفين عنه شي
انا طوالي قلبي اتقبض لكن قلت مع نفسو مالي ومالو قلت ليهو ما عارفه والله
دنيا...طيب شكرا وقفلت
بقيت بفكر د مشا وين كمان اكيد عمل كده عشان اخاف عليهو لكن انا ما حشتغل بيهو اصلا
انا اي من جوه كنت خايفه لكن بكابر وبقول خلاص حيكون وين يعني
فعلا انا بقيت ما بفكر في عمر الا لمن اجي انوم ما كان داخل وانس وانا ما كنت بسال منو ولا حتى دنيا ما بسالها
الاسبوع د كله مرا وعمر ما عارفين عنه شي حتى ناس بيتنا عرفو وسالوني قلت ليهم ما بتكلم معاهو انا
لمن خلاص بكره تخريجي والناس كلها مقلقه وعمر وين وعمر وين انا بديت اخاف شديد واتوترت
جاني تلفون عاينت لقيتها نغم قلت ياربي د مالها د اكيد فقدتو وطوالي رديت عليها
نغم...الو اسيل كيفك
قلت ليها هلا بخير
نغم....فاضيه؟؟
قلت ليها خير في شي؟؟
نغم...حابه اشوفك
قلت ليها اا معليش حبي ما بقدر هسا مش لاني مشغوله بس ما حابه اشوف زول وخصوصا انتي😉
نغم....اسيل لو سمحتي....
طق قفلت الخط في وشها
بعد ساعه تقريبا مني جاتني في البيت قالت لي في زول جاك
وكان وراها نغم
قلت ليها افتكر اني قلت ليك مت نفسي اشوف زول!!!!
منى جات وقفت جمبي قالت لي عشاني
قلت ليها طيب
اها اتفضلي يا استاذه وقبل ما تبدي لو دايرا تعرفي شي عن عمر انا ما عارفه
نغم....اسيل انا حتكلم وما تقاطعيني متزكره اليوم الانتي جيتي فيهو المكتب طيب انا لاني بت زيك واي بت ما بتحس بالبت الزيها د بتكون ما بت ناس اسيل انا اي بحب عمر وبقولها ليك في وشك لكن يشهد الله عمر ما غلط نهائي
انا كنت بحاول اتقرب منو واليوم د مشيت ليهو وسلمت عليهو واتونسنا وهو معتبرني زي اختو لا اكتر لا اقل.
لمن انا وقفت جمبو وقلت ليهو عمر في رمش في خدك
لمن جيت عشان ازحو ليهو زح لي يدي قمت ضحكت وقلت ليهو عادي يا ود وفعلا وانا بزح لبهو الرمش حاولت اني ابوسو اي انا قليله ادب وما عندي تربيه حتقولي كده صح؟؟؟
لكن يا اسيل عمر لا هبشني لا جا جمبي حتى بعديها قالي كيف تعملي كده وكورك فيني شدييييدد مش عشان انتي شفتيهو لا عشان عمر اصلا ما النوع د اسيل انتي ظلمتي عمر وما حاولتي تفهمي منو اي شي انتي بس صديتيهو
قلت ليها بي خوف كده طيب يعني هو ما مرسلك؟
نغم...اسيل ما تخلي الشيطان يلعب بي افكارك انا كيف حقول شي زي د عن نفسي لو ما هو حقيقه
وطلعت خلتني انا بقيت من الصدمه ما قادرا افكر ما قادرا اصدق الكلام السمعتو ولا قادرة اصدقو
شلت تلفني ضربت لي تالا ودنيا قلت ليهم تجوني هسا ما بعرف كيف
فعلا خمسه دقايق لقيتهم جو ومنى معاهم قعدتهم حكيت ليهم اي شي
طبعا تالا مصدومه ومنى ودنيا بعاينو لي بعض بس
دنيا...وتلفونو مقفول كمان!!
تالا...وتخريجك بكره!
قلت ليهم انا جايباكم تفكرو معاي ما توتروني ياخ عليك الله
منى....اسيل عمر لمن جا اتكلم معاك سويتي شنو كوركتي وما خليتي شي صح استحملي بعد د وبعدين انتي وين ثقتك فيهو لي ما حاولتي تسمعيهو
كلام منى كان حار انا طوالي قعدت ابكي قلت ليها طيب خليهو يجي انا حسمعو والله وينو لي خلاني في اعز لحظات الحوجه ليهو
منى طلعت خلت الغرفه ولحقتها دنيا
تالا....اهدي عمر ما حيخليك براك اكيد انتي بس روقي
قلت ليها ما دايرا اتخرج بدونو يا تالا والله ما نفسي لو عمر ما جا انا مستحيل امشي التخريج مستحيل
تالا.....متخلفه انتييييي ما تمشي كيف يعني؟؟؟؟
قلت ليها تالا خلاص دايرا انوم انا خلوني براي
طلعت وانا بقيت قاعده في السرير وببكي بس شلت تلفوني ودخلت المحادثه حقتو وبديت اسجل ليهو فويس(ريكورد...مقطع صوتي)
عمر انا محتاجاك وينك؟؟ ما حتكون جنبي بكره؟ مش دايما بتقول لي حكون معاك طيب وينك هسا عمر ما دايرا اتخرج بدونك وينك يا عمر ما قدرت اكمل كلام رقدت بي البكا والتفكير والله نمت ما صحيت الا تاني يوم الظهر استحميت ولبست فستان التخرج عشان امشي مكان التصوير وكده وقفت قدام المرايه وقلت لي نفسي اضحكي يلا متعودين عليك اسيل القويه فعلا ابتسمت ابتسامه باهته وطلعت مشيت حتى بدون ما اودع زول
طبعا عارفين جرجرة التخريج والتصوير والزفه بالعربات وكلام كتير شديد كده وبعد ما روحنا مرقت مشينا القاعه بتاعت التخريج لقيت ناس بيتنا قاعدين كلهم كان نفسي بس المحو💔
طلعت بقيت قاعده جمب ياسمين وبدا الحفل واي شي بعد شويه شفتهم دخلو خالتو هاجر وعمو يوسف عرفت انه د دوري
المذيع.....درست بمدرسه g.b.c بالولايات المتحده الامريكيه ثم بنفس المدرسه القسم الثانوي وعند قدومها الي السودان وهنا حسيت صوت المزيع اتغير واصل الكلام التحقت بجامعة المستقبل الكليه الطبيه الام بكل الحب هاجر حسن التاج الوالد ايهاب عبد الرازق محمد الخريجه اسيل ايهاب عبد الرازق محمد انا كنت بقول الصوت د صوت منو ياربي عمر ده عمر والله واشتغلت اغنيه طاسو حقت جنيت جنيت
وبعدين شغلت اغنيه ابويا وينن لي احمد امين وانا د كله وبحاول التفت لي الزول القال الكلام د صوت عمر ولا انا بتخيل وانا ماشيه علي المسرح في زول لفتني اتلفت لقيت عمر كان واقف ولابس تشيرت مكتوب فيهو خطيب الخريجه انا ما عرفت اصرخ ولا ابكي ولا اضحك طوالي حضنتو وبكيت من الفرح والناس كانت بتصفر وبتكورك وبعدين مشيت استلمت الشهادات وسلمت علي عمو يوسف وخالتو هاجر وخلاص اتصورنا واي شي ونحن طالعين منى جات قالت لي في زول دايرك بره
قلت ليها منو كمان؟
منى...امشي وشوفي واقف هناك واشرت لي
مشيت كان زول ومقبل علي الجهة التانيه مديني ضهرو يعني قلت ليهو لو سمحت
اتلفت لو سمحت في عينك يا جزمه
انا بدون ما احس نطيت فيهو ماااااازززننننن حبيبييييييي اشتتتقتتت ليك والله يا كلب يا جزمه
مازن.....النبذ لازم؟؟
قلت بيهو اسكت مني والله اشتقت ليك
مازن....هرموناتك عجيبه المهم انا زاتي وحاطسمالله❤️❤️❤️❤️❤️❤️
قعدنا نتونس واتصور معاي وبعدين رجعنا البيت وعمر معانا طبعا بعد ما وصلنا قال حيمشي طلعت وراهو قلت ليهو عمر
عمر...قلب عمر!
قلت ليهو انا اسفه لكن
قاطعني طوالي قالي حبيبي خلاص د شي فات ما مفروض نتكلم فيهو نحن هسا بقا عندنا تجربه نتعلم منها صح ولا لا
قلت ليهو صح بس خليني اقول الفي قلبي
عمر....طيب سامعك
قلت ليهو عمر انت عارف اني كنت فرحانه شديد وجاياك لمن خشيت لقيت انه البت مقربه منك كده فانا مستحيل افكر في شي في الوقت د وفعلا د الانا عملتو يعني ما تفتكر اني ما واثقه فيك لا انا واثقه والف في الميه لكن الغيره والشيطان بعملو اكتر من كده دايراك تسامحني💔
عمر....حبيبي طبعا انتي حتعملي كده وغيرك ما كان حيقيف الوقفه الوقفتيها معاي انا وامي اسيل انتي في حز وجعك كنتي حاضناني وبتطبطبي علي تاني داير شنو اكتر من كده اسيل انا بحسك زي حاجه دافيه كده بتحتويني فمستحيل ازعل منك يا قلبي وبوعدك ما يحصل شي تاني يزعلك
قلت ليهو صافي يا لبن
قالي حليب يا أشطه
قلت ليهو بالمناسبه يهناي مشتاقين
خت يدو في وشو قالي خجلتيني يا هناي
انا من الضحك لمن بكيت😂😂😂😂😂😂😂😂😂😂😂😂😂😂😂😂😂
عمر....بسم الله مالك
قلت ليهو عمر حلفتك عيديها يا عمر
عمر....هوي يا بت يلا بلا قله ادب خشي سريع ما فاضي ليك انا
قلت ليهو جزمه طيب يلا
#دردشتنا
الليله بس دايرا اراءكم في البارت ومتوقعين يحصل شنو لي قدام وكده ان شاءالله يكون عجبكم بالنسبه للناس البترسل لي واتساب انا قفلت الرقم معليش وان شاءالله برجع افتحو
#يتبع
في امان الله
ما تنسو التصويت❤️❤️❤️❤️❤️❤️❤️❤️❤️❤️
