الجزء السادس...
اليوم التاني من الصباح بدري صحيت لبست هدومي وشلت شنطه فيها اللابتوب حق ابوي والدفتر الكتبت فيهو الاسئله حقت امبارح
نزلت تحت لقيت عمو يوسف ومنى ومرتو بفطرو ومعاهم ولد اول مره اشوفو طبعا ما بهمني اعرفهم ولا اقعد معاهم قلت السلام عليكم
عمو يوسف.... وعليكم السلام يا بتي صباح الخير يلا تعالي افطري
قلت ليهو صباح النور وختيت الشنطه حقتي وجيت قعدت جمب منى وانا بفطر
عمو يوسف قالي اها يا بتي لابسه كده علي وين
قلت ليهو دايرا امشي اقابل عمو حسين بخصوص الاسئله الحكيت ليك عنها امس
عمو يوسف.... اي يا بتي امشي وخلي مازن ود عمك ده يوصلك
طبعا يا بتي ده ولدي الكبير مازن جا امس من السعوديه
عاينت للولد قلت ليهو اهلين مازن
مازن...سلسوله بت عمي ياخ
حسيتو طيب وظريف شديد لانه طول القعده بضحك وبتكلم وكده المهم وشو بشوش
بعد ما خلصنا الفطور عمي قالي اقعدي انتظري مازن يلبس ويجيك فعلا انتظرتو لبس ونزل ومرقنا انا طبعا طوالي فتحت الباب الورى دايرا اركب كده
مازن...هوي راكبه ورى ليه السواق حقك انا تعالي قدام
ضحكت وجيت ركبت معاهو قدام واتحركنا علي بيت عمو حسين
مازن...اها يا بت عمي
قلت ليهو انتو ما مصدقين اني بت عمكم ولا شنو من جيت اي زول بقول لي اها يا بت عمي اسمي اسيل
مازن....😂😂😂😂😂عان فصيحه كمان وانا قلت بت امريكا ما ناقشه شي
قلت ليهو لالا ناقشه ما تخاف
مازن...طبعا ابوي حكا لي انك جايه هنا عشان تعرفي القتل ابوك منو لكن اسمعي السودان د انا عارفو وعشت فيهو كتير
اول ما زول يموت مقتول ولا مقطع عديل بحققو في القضيه يوم يومين تلاته يا زوله بالكتير اسبوع وبعدين بجو يقفلو ليك القضيه والناس تنسى وكان الله يحب المحسنين
قلت ليهو بس انا ما طالبه من زول يحقق لي في قضية موت ابوي انا بنفسي حعمل الشي ده يعني ما محتاجه مساعده من زول واصلا انا ما بثق في زول هنا فشغلي حيكون بيني وبين نفسي بس
مازن....لالا عيب الكلام ده هسا لو ابوي ولا عمي حسين سمعوك بتقولي ما بثق في زول بياخدو موقف منك
قلت ليهو انت دايرني اثق في ناس شفتهم قبل تلاته يوم يعني بس اكيد بحترمهم وبعزهم والله
وانا بقول الكلام ده وصلنا البيت بتاع عمو حسين وانا نازله قلت ليهو وبعدين يا مازن هم ما حيعرفو الا اذا انت وصلت ليهم
قعد يضحححككك وقالي لالا انتي صعبه
ضحكت ونزلت دقيت الجرس فتحت لي الشغاله دخلت جوه لقيتهم قاعدين في السفرة بفطرو
عمو حسين اول ما شافني قام قالي ارح طوالي اقعدي
قلت ليهو انا هسا قمت من صينيه الاكل والله يا عمو كمل اكلك بالهنا انا حطلع انتظرك في الجنينه بره لمن تخلص تعال لي
مرقت وخليتهم بفطرو
خالتو ليلي(مرت عمي حسين)....غايتو يا حسين بت اخوك طبعها كعب من جات ضحكتها ما شفناها بس الحمدلله
نور(بت عمي حسين)...اي والله يا امي شايفه نفسها شديد بري منها
عمو حسين...لالا ياخ بس البت ما متأقلمه وابوها مات الاسبوع الفات دايرنها تعمل شنو يعني تقعد تضحك كانو ما حصل شي
**********************************
انا بره طلعت اللابتوب حق ابوي وبقيت بفتش قلت يمكن القا شي يفيدني اثناء ما انا بفتش في عربيه وقفت جمب البيت ونزلو منها ولدين كبار يعني شباب
وهم داخلين البيت وقفو واحد منهم قالي دايرا منو؟؟
قلت ليهو انت الداير منو؟؟
.....ده بيتي كيف داير منو
قلت ليهو وده بيت عمي برضو
التاني قالي دقيقه دقيقه انتي اسيل بت عمنا ايهاب الجات من امريكا
قلت ليهو الحمدلله علي السلامه
الولد الكان بتكلم معاي بالاول جاني قالي العفو ياخ انا مؤيد
والتاني جا سلم قالي وانا مهند يا مزه
قلت ليهم وانا اسيل
قعدو يتونسو معاي وكده استلطفت مؤيد اكتر ما عارفه لي
بعد مسافه جا عمو حسين مارق لقانا بنتونس
عمو حسين.... خلاص دايرين تصحابو بتي دي وتخربوها لي
مؤيد....والله بتك ما محتاجه يا حاج
قلت ليهو فعلا ما محتاجه
الولدين دخلو جوا وانا وعمي بقينا قاعدين قلت ليهو يا عمو دايراك تركز معاي شديد عشان انت الوحيد الحتقدر تفيدني هسا
عمو حسين... طوالي يا بتي ابدأي انا معاك
طلعت الدفتر الكتبت فيهو امبارح قلت ليهو قبل اي شي انور ده منو؟؟؟!
عمي ده كان قاعد كويس اول ما قلت اسم انور صلح قعدتو ووشو اتغير قالي انور ده الكان ماسك الشركه لي ابوك
قلت ليهو طيب انا دايرا اقابلو لو ممكن
عمو حسين... والله يا بتي هو خلا الشغل قبل فتره انا ما بعرف هو وين حاليا
قلت ليهو طيب اكيد رقم تلفونو حيكون عندكم
عمو حسين... اااا الرقم...ايي يمكن بشوفو ليك
انا طبعا ملاحظه عمي ده اتوتر وبقا بتمتم لكن ما فاهمه هو بعمل كده ليه
قلت ليهو طيب يا عمو شركه ابوي دي شغلها شنو؟؟
عمو حسين.... كيف شغلها شنو يا بتي شركه DL للصادرات والتوريد
انا هنا عرفت انه عمو حسين ما حيتجاوب معاي او ما داير يساعد اصلا لانو لو دايرا يساعدني ما بخبي اي شي عني طوالي انا وقفت الاسئله وعملت نفسي مصدقاهو قلت ليهو طيب يا عمو تسلم كتير ما بتقصر خلاص انا هسا ارجع البيت وبشوفك تاني
عمو حسين....دقيقه انادي محمد ولا مؤيد يوصلك
عمو دخل وبعد شويه جاني محمد قالي ارح يا مزه
مشيت معاهو وركبت قدام عادي واتحركنا
محمد....اها يا اسيل سنقل ولا تيكن ولا وضعك شنو؟
قلت ليهو عفوا؟؟؟ (استغربت اصلا يسالني ليه عرفت متين لمن يسالني اسئله زي د)
محمد....مالك انتي رسميه كده
قلت ليهو لا ما رسميه بس ماف زول بتكلم في خصوصياتو ما شخص غريب
محمد....ههههه لالا ياخ كيف غريب انا ود عمك
قلت ليهو ود عمي الشفتو الليله😂😂😂😉
محمد....والله انتي قادرة
قلت ليهو الحمدلله عاد
محمد وصلني البيت طلعت غرفتي وعرفت انه انا لازم اعتمد علي نفسي لانه عمو حسين من طريقتو الليله ما ناوي انه يساعدني
طوالي دقيت لي تالا فيديو كول
تالا....اها بشري
قلت ليها اصبري كدي كيفك
تالا....اسيل انا تمام وانتي تمام اها حصل شنو
قلت ليها والله من الصباح زي ما قلتي لي مشيت لي عمو حسين عشان اسألو
ولمن سألتو من انور بقا بتمتم وبقول لي خلا الشغل ليهو فتره وما بعرف شنو طوالي عرفتو ما داير يجاوب فما تعبت معاهو كتير
تالا....طيب والشركه ما عرفتيها حقت شنو
قلت ليها برضوو سالتو ولقيت نفس جواب ابوي شركه صادرات وتوريد
انا هسا اتعرفت علي ولد عمي اسمو مازن وزي الارتحت ليهو كده غايتو بكره حطلب منو يوديني الشركه اشوف الحاصل فيها شنو
تالا...ياخ كان تمشي طوالي انتي الخلاك ترجعي البيت شنو
قلت ليها المشكله متقيده بي العربات حقتهم لاني ما بعرف الشوارع
*الباب دق*
قلت ليها دقيقه يا تالا برجع ليك
مشيت فتحت الباب لقيتو مازن
قلت ليهو يا هلاا
مازن....زهجان وما عندي موضوع قلت اسوقك تقعدي معاي فالسطوح
قلت ليهو انا شغاله لكن ما حنك بمشي اشتغل معاك فوق دقيقه اجيب الحاجات د
جبت الحاجات وطلعنا فوق
*السطوح عاملين فيهو قعده كده حلوه شديد كراسي كبيييرههه وفي نصها تربيزه
المهم قعدنا
مازن...اها ما وصلتي لي شي لسا!!!
قلت ليهو والله يا مازن لحدي الان طرف الخيط ما لاقياهو
مازن... طيب انا ممكن اساعدك كدي حاولي فهميني براحه براحه
حكيت ليهو القصه كلهاااااا
مازن....يعني انتي هسا لازم تعرفي اي شي عن انور د وتوشكر ده منو وشركة ابوك حقت شنو صح
قلت ليهو اي لازم
مازن....مدي لي اللابتوب ده
اديتو اللابتوب وبقينا بنفتش سوا فجاءه انا سرحت كده وكوركت قلت ليهو مازن مازن اتزكرت شي
مازن....اهاااااا
قلت ليهو مره في زول اتصل في تلفون ابوي ولمن رديت الراجل كان بقول والله يا ايهاب حكشف سرك وما حخليك وحسجنك
وانا متاكده الزول الاتصل كان مسجل بي انور
مازن....دقيقه طيب معناها كده بقا عندنا معلومه جديده
انور لمن اتصل لي ابوك كان بقول ليهو حسجنك واكشف سرك نحن من الجمله دي وصلنا لي حاجتين
الحاجه الاوله انه من كلام انور لي ابوك واضح انه في خلاف بينهم
تاني شي انه انور ده كان ماسك سر لي ابوك
قلت ليهو اي معقوله يا مازن السر يكون متعلق بي انه شركه ابوي دي ما حقت صادرات وتوريد
مازن....امممم احتمال وارد برضو
بس هسا في ملف مقفول في اللابتوب حق ابوك ويمكن لو قدرنا نفتحو نعرف شي
قلت ليهو انت ما عندك خبره في الحاجات الزي د
مازن...عايني خليهو علي بكره ان شاءالله نعمل قعده زي دي وحكون فتحت الملف
قلت ليه بالجد حتساعدني؟
مازن...اي يا بت انتي اختي الصغيره
قلت ليهو شكرا يا مازن والله فرحت انه لقيت زول جمبي بالجد شكرا
مازن ضربني في راسي وقالي في اخت بتشكر اخوها يلا قومي لمي الحاجات د وخلينا ننزل عشان الزمن
قلت ليهو حاضر يلا
مازن...اسيل في زول جاب ليك شريحه سودانيه
قلت ليهو لا اصلا ما شغاله بالتلفون
مازن....غايتو اعمامك ديل مهملين هسا لو توهتي ولا شي جيبي تلفونك حديك شريحتي التانيه
قلت ليهو حاضر تعال تحت
نزلنا تحت وشال تلفوني ركب لي الشريحه وظبط لي اي شي ومرق
***بالجد انا كنت مبسوطه عشان حسيت انه مازن بالجد نفسو يساعدني
#يتبع
توقعاتكم شنوو هل عمو حسين مخبي شي عن اسيل
واسيل حتصل للحقيقه ولا لا
طبعا عشان الليله الخميس وانا قلت ليكم كل اسبوع حختار وحده من الناس الدايما بعلقو
صراحه في اسمين رنا وهاجر بالجد فرحتوني بي تعليقاتكم حبيباتي الله يخليكم ويحفظكم وشكرا علي الدعم بحبكم
ما تنسو التصويت
في امان الله❤❤❤❤❤❤❤❤❤❤❤
