الجزء السابع...
اليوم التاني لمن صحيت لقيت البيت جايط وفي اصوات تحت وكده طبعا ما من عوايدو البيت يكون كده طوالي استحميت وغيرت هدومي ونزلت تحت اشوف فشنو
لقيت ناس كتير تحت عرفت انه في ضيوف وكمان جاين بي شنطهم وطبعا انا كأسيل كده بكره الجوطه والناس الكتير
عمو يوسف.... بتي السمحه صباح الخير تعالي سلمي علي عمك وخالتك
المره القاعده قالت وايييي يا قلبي والله ياها بت ايهاب الله يرحمو ونزلت فيني بوس واحضان وانا طبعا اسكتو ساي اتلفت بس
خالتو هاجر(مرت عمو يوسف)....اسيل دي خالتك مروة بت خالت ابوك طوالي وده زوجها عمك عثمان
قلت ليهم اهلين نورتو وقعدت
اها بقو بتونسو وما خلو موضوع ما فتحوهو وطبعا حركه شينه اقوم اخليهم خصوصا انه المره دي بتتكلم معاي كتير يحليلها
وعندها تلاته بنات جايباهم معاها لكن قالت بوصلو بعد شويه المهم اصلي ما اطمنت للوضع قلت طوالي بعد كم يوم امشي بيت عمي حسين
خالتو هاجر....اسيل حببتي قومي سوي لينا قهوة كده منى بتي دي مرقت والله
قلت ليها والله يا خالتو ما بعرف اسوي قهوه للاسف ممكن اعمل ليكم عصير لكن
عمو يوسف قعد يضحك قاليهم بت امريكا معذوره
وحتي خالتو هاجر د كانت طيبه مستحيل تسوي لي حركات زي خالتو ليلي مرت عمو حسين
خالتو هاجر... ومالو حببتي بتتعلمي متخافي نهائي
خالتو مروه(بت خالت ابوي دي)...بري زاتها تتعلم لي سماحتها براها والله توقف صفوف العرسان د ماشاءالله تبارك الله ايه من الجمال
قلت ليها دي عيونك يا خالتو والله تسلمي ياخ
المره كمان من قلت ليها كده قالت واي عان الكلام لازم اديك بوسه وقامت باستني
انا عادة نا بحب الحركات دي لكن والله حبيتها شددددديييييييد ياخ المره طيبه
وحلفت الا تقوم تعلمني اعمل القهوة😂😂😂😂
بعد ما علمتني وجيت قدمتها للي ناس عمو بره بقت بس مقعداني جمبها وتتونس معاي
بعد شويه مازن جا داخل ومعاهو تلاته بنات ومحمد ومؤيد اولاد عمو حسين
انا طوالي قلت كملللتتت معاك يا اسيل
خالتو مروة...قلتي شي
قلت ليها لالا يا خالتو
البنات اها جو يسلمو والدلع المصطنع والعواره اعوذبالله
في اتنين سلمو علي ووحده واقفه مع مازن بعيد كده
بعد شويه مازن عمل لي حركه نظام تعالي
مشيت ليهو قالي تعالي بره ومسكني من يدي وطلعنا
قلت ليهو لها حصل معاك شنو؟؟
مازن...شايفه تيسير الكانت واقفه معاي دي
قلت ليهو اها؟؟
مازن...دي احسن وحده تعرف تهكر ملفات وتخترق حسابات
قلت ليهوو بالجججددد
مازن...اييي ومتخافي زولة ثقه علي ضمانتي ولمن يقولو ليك علي ضمانه مازن معناها خلاص
قلت ليهو فديت الواثق انا 😂😂😂
وقعدنا نضحك ونهظر
مازن كان اقرب زول لي حرفيا وانا معاهو بحس بي نفس الامان الكنت بحسو مع بابا مازن لمن كنت بشوفو اي خوف او قلقل طوالي بزح مني اي بعرفو لي شهر او اقل لكن كلامو العاقل شخصيتو القويه ثقتو في نفسو كل حاجه فيهو بتخلي الزول يثق فيهو سريع ويمكن ده الشي الحصل معاي
اثناء ما نحن واقفين جو محمد ومؤيد طالعين
مؤيد....بت عمنا المفتريه
قلت ليهو منو دي
محمد...مفتريه معانا بس التواضع بخلوهو لي مازن وغمز لي
قلت ليهو ايواا بس افتري ما افتري د ما مجال اختصاصك انت وبعدين انت منو عشان ما افتري عليك
انا ما عارفه لي فرت كده لكن محمد اسلوبو دايما بكون مستفز وكلامو غلط فبقيت برد ليهو بالطريقه دي بس
وقبل ما ادخل قلت لي مؤيد بعدين برسل ليك وتسب
مؤيد....اسيل بي حالها ترسل لي
قلت ليهو شفت كيف وضحكت معاهو ودخلت خليتهم واقفين
************************************
محمد... بت عمكم دي عندها نفسيات
مازن...بالغت والله اطيب منها ماف
مؤيد...اي والله طيبه ياخ وبعدين زوله وحيده وكده
مازن...اي والله اها يا شباب علي وين كده سريع؟؟
مؤيد....انت عارف الحاج مشغلنا كيف يا مازن
مازن....هههه اي خلاص اتيسرو
مؤيد ومحمد مشو ومازن دخل جوه
**********************************
محمد....شفت بت عمك دي انا لو ما جبت راسها
مؤيد....انت مجنون ولا شنو دي اختنا الصغيره افكارك القذره د امشي سويها مع غيرها
محمد....كويس كويس وضحك
******************************
انا لمن دخلت لقيتهم بخططو لي رحله بكره وما بعرف شنو ما ركزت معاهم شديد وانا طالعه علي غرفتي عمو يوسف ناداني جيت راجعه قلت ليهو اي يا عمو
عمو يوسف....يا بتي بكره نحن من الصباح ماشين البحر نقيل هناك وضابحين وكده جهزي نفسك عشان تمشي معانا
قلت ليهو لا يا عمو انا بقعد وانتو امشو
مازن....هوي يا بت ما عندنا بنات بقعدو براهم بلا دلع معاك
قعدت اضحك
خالتو هاجر.... لا يا اسيل ما صح منك ما تمشي معانا وزاتو ناس عمك حسين ماشين
قلت ليها خير ان شاءالله يلا عن اذنكم انا طالعه غرفتي
مازن...ما تنسي القعده
قلت ليها اي حاضر
وانا طالعه في السلم جاتني مكالمه من تالا رديت عليها
تالا...الوو اي يا اسيل شنو يعني الا يسالو منك ولا كيف
قلت ليهو هوي انتي انا الايام الفاتت برسل ليك تالا...اسكتي المهم هاك ابوي داير يتكلم معاك
عمو خالد.... اي يا بتي كيفك
قلت ليهو اهلين عمو انا بخير والله انت كيفك وكيف صحتك
عمو خالد.... تمام والله يا بتي بس فاقدنك
قلت ليهو ما تفقد عزيز ولا غالي
عمو خالد.... يا بتي انا هنا طبعا مزبط امور الشركه واي شي كله تمام بس الدخل ده اختو في حسابك ولا كيف
قلت ليهو اي يا عمو رسلهم في حسابي طوالي
عمو خالد.... والله يا بتي في كم موظف كده برضو دايرين زياده وانا طبعا دي ما قروشي عشان اتحكم فيها
طبعا انا ما بعرف في الحاجات دي قلت ليهو دقيقه يا عمو نزلت تحت اشرت لي مازن قلت ليهو هاك اتكلم بدون ما افهمو شي
فعلا شال التلفون وقعد مسافه كبيره شديد يتكلم وكده بعدين قفل
مازن....انتي شركه ابوك واوراق المزارع والبيوت والعربات مخلياها مع الراجل د؟؟
قلت ليهو اي ده عمو خالد بثق فيه اكتر من نفسي
مازن...ايوا خلاص تمام انا هسا شرحت ليهو اي شي وكده تاني بتواصل معاهو انا
قلت ليهو طيب والموضوع حصل فيهو شنو
مازن...ماشي انادي تيسير وارجع انتظرينا فوق انتي
قلت ليهو طيب
شلت اي شي زي كل يوم وطلعت فوق بعد مسافه جات تيسير سلمت علي وقعدت ومازن قعد يقلب في الاوراق وكده
بعد زمننننن
تيسير....يسسسس فتححح
مازن....احلا زوله والله يلا بعد ده اديني انا كدي
شال اللابتوب وبقا بقرا في الكلام المكتوب كله بالانجليزي والمحادثات وكان مصدوم شددديييييددد
قلت ليه مازن مالك؟؟
مازن....ده شنو غسيل اموال؟؟
قلت ليهو هو شنو الغسيل اموال انا ما فاهمه فشنو؟؟
مازن...اسيل اصبري يخ وبقا بقرا وكل شويه يقلع عيونو اكتر
قلت ليهو مازن جيب اللابتوب بفهم براي لو ما داير تفهمني
مازن...دقيقه انا زاتي ما فاهم يعني هسا الشركه بتاعه ابوك الفي السودان دي حقت غسيل اموال كيف الكلام ده
انا طبعا لمن سمعت غسيل اموال دي حسيت راسي لفه ابوي انا بشتغل في الحرام؟؟؟؟
قلت ليهو مازن كيف يعني لا والله مستحيل اقرا تاني كدي مازن ده شنو البتقول فيهو ده
مازن وهو بكورك....اسيل اسكتي ياخ خلينا نفهم
يعني البضاعه الكان انور بوديها لي توشكر دي كانت سلاح مهربنو من بره السودان ابوك بجيب السلاح تهريب وببيعو لي العصابات دي بي مبالغ هائله وبشيل القروش بستثمرها
انا طبعا بقيت بعاين لي مازن متأمله انه يقول لي ده مقلب يقول لي الكلام ده كذب
ابوي انا كان دايما بحذرني من الحرام وبقول لي القرش الحرام بأذي الزول طيب هو لي ما كان بعمل بي كلامو
انا طوالي نزلت غرفتي وقفلت علي نفسي بالمفتاح وبقيت ببكي شديد لاني ما مصدقه لا بابا كان بأكلني بي قروش الحرام لا ما قادره اصدق والله ياخ لي بحصل معاي كده انا ليه اي شي بحصل لي في الدنيا كعب ما حصل يوم حصل لي شي خلاني اضحك بالرغم من اني ما كعبه ولا بأذي زول بقيت بسأل في نفسي اسئله كتير وبعدين فجاءه لقيت نفسي وقفت بكا ما عارفه انا دموعي انتهت ولا انا زهجت ولا شنو
**الباب دقق
اسيل انا مازن افتحي
قمت فتحت الباب ودخلت وهو دخل وراي
انا قعدت في السرير وهو قدامي في الارض
مازن....من اولها حنبقا ضعاف كده؟؟
وين اسيل الحتحقق في القضيه براها وين اسيل الما محتاجه شي من زول
بالرغم من اني وقفت بكا لكن اول ما شفت مازن حسيت نفسي ضعيفه شديد قلت ليهو مازن انا متاكده في شي غلط انا عارفه بابا مستحيل يعمل شي غلط مازن عليك الله ما تقول عن بابا حاجات زي دي يا مازن والله هو كان طيب
مازن اتأثر شدديييييد لمن شافني كده طوالي حضني وبقا بقول لي كله حيعدي وبالك حيهدا خلي ايمانك بربنا كبير وهدا انا معاك اعتبريني ابوك اي عارف نفسي اسمح منك واصغر منك لكن ما حنك
طوالي ضحكت وضربتو وقمت من حضنو
مازن...يلا ختي يدك في يدي ونوعد بعض انه حنكون جمب بعض لحدي ما نعرف القتل عمو ايهاب منو وما حنضعف يلا اوعديني
قلت ليهو وعد
مازن قام من الارض حي بنطلوني السمح اتوسخ بي سببك فالحه بتي اوعك تبكي واللابتوب حيكون معاي طيب
قلت ليهو حاضر
قام وهو طالع قلت ليهو مازن
مازن...جزمه مازن اقصد عيون مازن
قلت ليهو رمه اسمع
مازن...اها يا دلوعه العيله دايرا شنو
قلت ليهو شكرا شديد وبالجد انا بثق فيك شديد وربنا ما يحرمني من وجودك جمبي يارب
مازن جا راجع وباسني من راسي وقالي ولا من وجودك انتي يلا نومي وما تفكري
انا قفلت النور ونمت
*************************
مازن مع نفسو....الله يصبرك يا اسيل والله البتمري بيهو ما هين لكن معقوله عمو ايهاب وتجارة السلاح والله ما اتوقعت ياخ
#يتبع
ما تنسو التصويت
في امان الله
والله يا جماعه معلييييشش لكن الكهربا عذبتني وكمان عيد ميلاد البستفريند وكده لازم نجهز ونعمل حركات ان شاءالله تاني ما بتاخر اعفو لي
مستنيه اراءكم يا احلا ناس❤❤❤❤❤❤❤❤❤❤❤❤
