الجزء الثاني....
طبعا امتحانتي كانت علي الابواب وبقيت اليوم كله بس قاعده بقرا احيانا تالا بتجي تقرا معاي ومرات انا بمشي ليها لمن يوم الاحد جا وبكره الاتنين اول يوم في امتحاناتي طبعا انا اصلا متوتره من الامتحانات وكمان ابوي البقيت ما فاهمه تصرفاتو ولا فاهمه حاصل معاهو شنو بقيت اليوم كله طبيعي شارده وبفكر وطبعا انا اي تالا صحبتي شديد وزي اختي لكن المشاكل العائليه دي ما كنت بحب احكيها ليها كتير يعني الا لمن الموضوع خلاص يكبر شديد
يوم الاحد ده انا صحيت من صباح الرحمن استحميت وطوالي قعدت في المكتبه راجعت اي شييييي ما خليت سؤال او ورقه ما حليتها قفلت اي شي واتصلت لي تالا ردت لي
تالا....الو يقلبي
قلت ليها خلصتي ولا لسا
تالا...والله يا اسيل دي قومتي من الكرسي
قلت ليها انا زاتي والله تعالي لي ياخ ابوي لسا ما جا وقاعده زهجانه
تالا...عدي لي عشره بس بتلقيني جيت
اسيل...😂😂طيب منتظراك نزلت تحت وقلت لي اوليفيا تجهز لينا اكل لحدي ما تالا تجي فعلا تالا ما اتأخرت خمسه دقايق كده وجات
مشيت فتحت الباب سلمت عليها ودخلنا قلت ليها ارح غرفتي فوق
تالا...كل ما اجي عندك بقعد في غرفتك مليت منها تعالي نقعد هنا في الصاله
قلت ليها اقعدي طيب
قعدنا وبقينا نتونس واليفيا جابت لينا الاكل بس بدينا ناكل كده الباب دق عرفت انه ده ابوي
قمت سريع فتحت وسلمت عليهو جا سلم علي تالا وقعد معانا وكده وقام طلع غرفتو
تالا....مالو عمو؟؟
قلت ليها مالو
تالا...بري زي تقول مارق من حرب وشو تعبان
قلت ليها بري ما عارفه
فجاءه في تلفون اتصل
عاينت لي تلفوني لقيت
ما فيهو اي شي
عاينت لي تالا قالت لي تلفوني ما جبتو
قمت افتش في الكنبه لقيت ابوي مخلي تلفونو في الكنبه الكان قاعد فيها
انا لا اراديا شلت التلفون لقيت الرقم مسجل (انور)
فتحت الخط وقبل ما اقول الو
سمعت الراجل بقا بكورك وبقول كلام غريب كان بقول انت يا ايهاب انا لو ما سجنتك وصدقني ما حخليك وعشرتك طلعت عشرت كلاب
قبل ما ارد ابوي جا نازل من السلم ولمن شافني ماسكه تلفونو جا سريع وجراهو مني وقفل الخط
ابوي...بتردي علي التلفون لي؟؟
قلت ليها يا بابا التلفون اتصل وانا قلت بكون واحد من اصحابك
ابوي بي صوت عالي شديد.....ما تقولي لي بابا ولا زفت التلفون ده تاني لو ضرب لي الصباح ما تهبشيهو فاهمه ولا لا
وشال التلفون ومرق
طبعا انا بقيت واقفه وما عارفه المشهد الحصل ده حلم ولا واقع
انا اسيل الابوي عمرو ما رفع صوتو علي هسا يتكلم معاي بالطريقه دي
وكمان قدام صحبتي
ابوي العمرو ما عاين لي عين كعبه ولا رفض لي طلب لي فجاءه اتغير وبقا طبيعي متوتر وبكورك
انا ابوي وانا شافعه ما علا صوتو علي يعليهو علي هسا؟؟؟؟
الحاجه دي ضايقتني لي درجه انه انا في اللحظه ديك لو ما كان معاي تالا عاديييي كنت سويت شي لي نفسي
اتخيلو معاي انا بت فتحت عيوني في الدنيا دي لقيت نفسي في بلد اجنبي ما بلدي ولا ثقافتي ولا عندي بيهو اي ارتباط
لقيت نفسي يتيمه الام ما عارفه يعني شنو كلمه ماما
دايما كنت بعاين لي خالتو ناهد(ام تالا) وهي بتوصيها وبتخاف عليها وكنت بسال نفسي لي انا ما عندي ام
معقوله يكون احلا شي في الدنيا انا محرومه منو؟؟
ليه لمن يعملو اجتماع امهات في المدرسه انا امي ما بتجي؟؟
هي ما بتحبني عشان كده مشت وخلتني
الزول الوحيد الفي حياتي بابا يعني انا بابا ده نقطه ضعفي ونقطه قوتي اي فرح حزن اي شي بحس بيهو سببو بابا
عشت معاهو ١٧ سنه عمري ما احتجت شي عمري ما قلت اخخ الا لقيتو جمبي ومساهر فوق راسي
هسا فجاءه يتغير ٣٦٠ درجه بقا عصبي متوتر بكورك بقول كلام غريب مساهر للصباح
انا لاول مره احس بي خوف وانا قاعده في البيت مع ابوي
المهم بعد ما ابوي مرق انا بقيت واقفه ومصدومه وبعاين للباب الطلع منو وبقول هسا حيجي داخل تاني بابا اصلا ما بزعل مني فضلت منتظره لكن لا بابا ما رجع💔
تالا حست انه انا اضايقت لانه هي عارفه انه ابوي بالنسبه لي *عصب الحياة*
تالا....اسيل عايني اقعدي كدي وروقي انتي عارفه عمو ايهاب الفتره دي مضغوط بالشغل وهو ما بكون قاصد
انا بقيت ببكي وبقول ليها هو هسا مرق وهو زعلان مني يا تالا يعني بابا هسا متضايق مني(اي انا الكان مزعلني ما انو كورك فيني لا كنت زعلانه لانه بابا لاول مره زعل مني وكورك فيني بي سبب تصرفي الما عجبو)
تالا....لالا ما زعل منك يا بت هو اصلا ما عندو غيرك في الدنيا دي يزعل منك كيف هسا اصبري شويه وحيجي راجع ليك صدقيني انتي براك عارفه ابوك بحبك كيف
قلت ليها طيب انا طالعه غرفتي ارح
تالا...لالا خلاص ارجع البيت انا وعليك الله خليك واعيه يا اسيل
قلت ليها حاضر
وصلتها لحدي الباب وطلعت غرفتي فوق بقيت قاعده في نص السرير وبفكر في الحصل
فكرت انا هسا لو عندي اخت او اخو كيف كانت حياتي حتكون تلقائيا لقيت نفسي بضحك💔💔
جات اوليفيا خاشه الغرفه ومعاها مويه
شافتني في نص السرير ببكي جات وقعدت جمبي
طبعا اوليفيا مره عمرها بكون كم واربعين هي المربيه حقتي من وانا صغيره وتقريبا احن زول علي بعد ابوي💔
اوليفيا....انا سمعت السيد ايهاب لمن كان بكورك فيك لكن عادي يا بتي ما تبكي ابوكي مضغوط في الشغل
انا في اللحظه دي كنت محتاجه زول احضنو واقعد ابكي لمن اوليفيا جات طوالي حضنتها وقعدت ابكي
وهي عشان حنونه شديد قعدت تمسح لي في راسي وكده فجاءه سمعت زول بقول احم احم
عاينت للباب لقيتو ابوي
اوليفيا طوالي طلعت بره
انا قمت من السرير سريع ومشيت وقفت قدامو قلت ليهو بابا انت عارف اني ما كنت قاصده والله يا بابا فتحتو بي حسن نيه واصلا ما عارفه منو المتصل ولا بهمني وانا ما زعلت عشان انت كوركت فيني بالعكس انا الزعلني انك زعلان مني
ابوي طوالي حضني وقالي يا بت انتي طيبة قلبك دي جايباها من وين انا الجاي اصالحك تقومي انتي تصالحيني
تعالي تعالي نقعد نتونس لينا زمن ما اتونسنا
مشينا قعدنا في السرير
ابوي بقا قاعد قصادي وقالي اسمعي يا قلب بابا انا الفتره دي مقصر شددديييييددد معاك وعارف الحاجه دي
والله يا اسيل انا لمن كنت بصرخ عليك ما كنت واعي
لمن طلعت ومشيت مع اصحابي كنت بفكر انا كيف صرخت عليها كده
انتي عارفه يا اسيل انا وانتي بنشبه بعض في حاجات كتير
قلت ليهو كيف يعني يا بابا؟؟
ابوي...مثلا انتي فقدتي امك وانا فقدت امي
انا بعتبرك اي شي في حياتي امي وابوي واختي وبتي وحبيبتي الما بقدر اعيش يوم بدونها وانتي كمان بتعتبريني كده
قلت ليهو منو الغشاك قاليك بعتبرك كده
ابوي....😂😂😂😂😂في عز الظروف د بتهظري معاي
قلت ليهو اعمل شنو قاعده طول اليوم بعاين للحيطان وانت بقيت ما شغال بي
ابوي...طيب في موضوع كده دايرك فيهو
قلت ليهو سجمي ما تقولي جاني عريس
ابوي...عريس في عينك انا ما حخليك تمشي من جمبي نهائي
قلت ليها خلاص معليش سكت اها
ابوي....اسيل انا لازم بكره اسافر!!!!!!
قلت ليهو تسافر وين وليه؟؟
ابوي...السودان
انا طبعا في اللحظه د انصعقت قلت ليهو ابوي وانا انا ما عندي غيرك هنا تمشي كيف يعني؟؟
ابوي....اسمعي اصلا انا ما حتاخر يعني مسافه تخلصي امتحانات حتلقيني في وشك وبعدين اقعد معاك للابد
انا ما عارفه لي كان قلبي مقبوض فكره انه ابوي مسافر دي نهائي ما كانت داخله راسي لكن كنت بقول طيب وشغلو لالا انا ما لازم ابقا انانيه هو اكيد عندو حاجات برضو غيري
ابتسمت ابتسامه بارده كده وقلت ليهو طيب يا بابا الله يوصلك بالسلامه
ابوي....الله يسلمك يا بتي ووعد ما اتأخر عليك
قلت ليهو طيارتك متين؟؟
ابوي...الساعه تمنيه يعني تمشي وتودعيني وتمشي امتحانك
ونسيت اقول ليك انا مشيت لي عمك خالد ابو تالا ووريتهم انك حتقعدي عندهم الفتره د واديت اوليفيا اجازه يعني من بكره تمشي ليهم
قلت ليها خلاص تمام ان شاءالله
ابوي....يلا اخليك تنومي تصبحي علي خير
قلت ليهو وانت بخير يارب
ابوي طلع وانا هنا ياداب الخوف دخل قلبي اسبوعين من غير ابوي حيحصل شنو وانا حقعد كيف والسودان د بعيده ووووووو مافي فكره ما جات ماره في راسي انا ما عارفه اليوم ده كيف نمت
************************************
اليوم التاني صحاني ابوي من خمسه قمت اتوضيت وصلينا الصبح جماعه وقرينا سوره ياسين وقعدنا
انا كنت بعاين لي ابوي نظره بتاعت دي اخر مره حشوفك فيها
ابوي....مالك؟؟
طوالي ابتسمت وقلت ليهو لا مافي شي والله
ابوي....طيب انا دايرك شويه في المكتب الحقيني
طبعا استغربت من كلام ابوي لكن مشيت وراهو طوالي
دخلت المكتب لقيت ابوي جاب ورق كتير وختاهو كلو قدامي
قلت ليهو ده شنو؟؟
ابوي...اول شي وقعي وبعدين حوريك ده شنو
قلت ليهو حاضر شلت الورق ووقعت علي اي شي
بعد ما خلصت قلت ليهو اها د شنو
ابوي....كده كل الاملاك الانا بملكها بقت بي اسمك وهي كالتالي
بيتنا ده وعمارتين تاني في امريكا
شركه DL الفي امريكا والفرع الفي باريس
مزرعتين في ضواحي امريكا
عندي يا بتي بيت في دبي
وتلاته بيوت في السودان
وطبعا شركه DL الفرع الفي السودان
انا بعد كلام ابوي فوق الخوف الفيني خفت زياده وبقيت بفكر انه دي كلها املاك اي انا عارفه ابوي غني لكن ما كنت قايله للدرجه دي
ابوي كمل كلامو بي الدنيا ما معروفه يا بتي واهلك الفي السودان ممكن يطمعو بيك انا كده عملت الاحتياطات كلها
قلت ليهو ابوي انا ما دايرا اي شي انا بس دايرا افهم انت بتعمل كده لي
ابوي...اي شي في وقتو سمح يلا قومي جهزي معاي شنطتي
انا في راسي كان في الف سؤال لكن قمت وجهزت معاهو الشنطه وجهزت نفسي ومشينا بي عربيتي انا
طلعنا انا وابوي وتالا
وصلنا المطار وانا خلاص للحظه بس كنت حمشي مع ابوي بدون ما يهمني اييي امتحان او اي شي
نزلنا وانتظرنا زي نص ساعه بعدين نادو علي الطياره المتوجها علي السعوديه (لانه ماف طيران مباشر للسودان لازم يعمل كونيكشن)
ابوي....اسيل يلا يا روحي دي طيارتي تعالي خليني اودعك
طبعا ما شفتو انا اول مره اخش في حاله زي دي ابيت افكو وابكي زي العمري ما حشوفو تاني وتالا دي تجر فيني بعد ما كملت دموعي وهو زاتو قعد يبكي بعدين فكيتو
ابوي دخل صاله المغادره خلاص وانا وتالا رجعنا للعربيه
تالا طوالي شالت مني المفتاح عشان انا بالجد ما كنت قادره اسوق
اتحركنا علي الجامعه والامتحان بدا
كنت كل ما اجي اكتب شي انساهو واقعد افكر
لكن بحاول ارجع واستغفر عشان اجيب نسبه تفرح ابوي
كتبت القدرت عليهو ومرقت ما اتلفت لا كده لا كده طوالي ناديت تالا واتحركنا علي بيتهم
#يتبع
ما تنسو التصويت
في امان الله
دايرين نعمل شي عشان يزيد التفاعل جبت ليكم فكره سمحه كل اسبوع حشوف اكتر زول بقرا سريع وبصوت وبعمل كومنت واذكر اسمو في نهايه البارت وحكتب رقمي عشان يتواصل معاي لانه حتكون في جوائز يلا دايرا تفاعللللل🙏❤❤❤❤❤
