*لِحُزني حكايه....YARA YACOUP*
الجزء السابع والعشرون
اليوم التاني صحتني دنيا الساعه كانت اتنين ضهر قمت مخلوعه قلت ليها د شنو يا دنيا؟؟؟؟
دنيا....ما تسوي لي فيها مستغربه قومي يا بت امبارح انتي نايمه الساعه كم شايفاك منزله ستوري سبعه صباحا
قلت ليها اييي ما هناي عمر جاني
دنيا....وتتتتت؟؟
قلت ليها والله جا صالحني🙈❤️❤️
دنيا.....بري صعبه صعبه
قلت ليها زحي كدي خليني استحما واصلي واقرا ياسين
فعلا خشيت الحمام استحميت وغيرت هدومي وصليت وقريت السورة وجيت قعدت قلت ليها ما نفسي افطر حخت كورنفليكس ما عندك فيهو مشكله صح
دنيا...اي ختي
مشيت ختيت وجبت المعالق وقعدنا ناكل وكل وحده فاتحه تلفونها
لمن فتحت الواتس لقيت تالا معلقه لي علي صورة عمر كاتبه لي احياا انا وكل البنات معلقين ربنا يخليكم لي بعض وكده الا نغم كانت كاتبه لي وحلاتي حبيبي يا ناس
طبعا لمن قريتها وشي بقا عامل كده😱😱😱😱😨😨😨
قلت ليها وتتت؟؟
واستغربت من طريقه كلامها المقرفه وفي نفس الوقت ما نفسي اسال عمر عشان ما اضايقو
قلت لي دنيا عمر بحب شنو اكتر شي في الحلويات؟
دنيا....افكورس الكوكيز
قلت ليها طيب حعمل كوكيز وامشي ليهو في المكتب
دنيا....فجاءه؟؟
قلت ليها اي فجاءه
فعلا قمت سويت الكوكيز وختيتو في علبه وطلعت لقيت دنيا بتلم في حاجاتها
قلت ليها فشنو؟؟؟
دنيا...حمشي لانه ماما د اتصلت علي قالت لي مرهقه شويه
قلت ليها كيففففف مالها خالللتووو؟؟؟
دنيا....يا بت من الشغل بس روقي يلا انا طلبت ترحال وهسا تحت هو
قلت ليها حمشي معاك انا ويت البس بس
دنيا....لالا امشي انتي ياخ والله ماف شي واصرت شديد اني امشي لي عمر وفعلا هي اتحركت وانا لبست بنطلون جينز عادي ومعاهو تشيرت ابيض وفوقيهم العبايه الفاتحه وطرحتي وعملت ميكب نهاري هادي وشلت الكوكيز ومفتاح عربيتي ومرقت
وصلت الشركه وانا داخله لاقتني كرستين (السكرتيره)
قال لي هاي اسيل وجات سلمت علي قلت ليها عمر جوه حسيت وشها اتغير كده قالت لي اي بس معاهو زول
قلت ليها زول منو؟؟
كرستين...سكتت انا استغربت طوالي دخلت وفتحت الباب بقيت واقفه بس ما قادره اتحرك لي قدام او ارجع ورى وبدون ما احس علبه الكوكيز وقعت مني وطلعت سريع برههه
وبقيت نازله في السلالم زي المجنونه
وركبت عربيتي واتحركت
عمر طلع قال لي كرستين د اسيل؟؟؟؟
كرستين....ايوا يا استاذ
عمر بقا خاتي يدو في راسو وبقول لا اله الا الله محمد رسول الله
**************************
وانا سايقه تلفوني اتصل ما عاينت اصلا د منو بقا بتصل كتير شديد رديت قلت ايوا نعم بي زهج
دنيا....اسيل الحقيني يا اسيل امي الحقيني امي فاقده الوعي وعمر ما برد
قلت ليها شنوووو جايه جايه انا قريبه شديد منكم
فعلا خمسه دقايق بس انا وصلت ليهم وسرعه شلنا خالتو وركبناها العربيه وسريع اتحركنا مشينا المستشفي دخلوها وقالو الضغط حقها نزل والسكري ما منتظم وطوالي ركبو ليها درب
انا بقيت قاعده في الكرسي ومدنقره راسي ما عارفه افكر في الشفتو ولا افكر في خالتو الجوه د
وانا مدنقره سمعت صوت عمر بقول وينها وجاري ووشو احمر شددددددددديييييييد واصلا عمر د الله فوق وامو تحت💔💔💔💔💔💔💔💔
بعد شويه الدكتور جا طالع وقال يا جماعه عادي ضغطها رجع بس حنخليها معانا لانه ظهر ليها صليبين في السكري
بقينا قاعدين بس وعمر ولا فكر يفتح خشمو معاي
بعد شويه هو دخل ليها جوه وانا ودنيا لحقناهو وبقينا واقفين وهي قامت وبتتكلم
جيت جمب راسها قلت ليها كيف يا خالتو هسا؟؟
خالتو سماهر....تمام يا بتي ربنا يخليك لي يارب ومسكت يدي بقيت ماسكه ليها يدها بس
عمر طلع خلا الغرفه
خالتو سماهر....مالو عمر يا بتي
قلت ليها ما عارفه بكون خايف عليك وحاولت ما احسسها انه في شي عشان ما تزعل
طلعت بره انا وخليت معاها دنيا لاحظت لي عمر القاعد في الكرسي ومدنقر راسو وببكي بي حرقه
لي لحظه حسيت الدكتور قاليهو شي عن خالتو مشيت قربت منو عمر كان ببكي وبي صوت كمان معقوله د كله عشان امو؟؟؟؟
كان في حاجه جواي بتقول اسيل امشي لي حبيبك اسيل د عمر الوقف جمبك وما خلاك ولا ثانيه امشي خليهو يبكي في حضنك يا اسيل
وبدون ولا ذره من التردد مشيت قعدت جمبو ورفعت ليهو راسو
عمر طوالي حضني وبقا وماسك فيني شددديييييددد وبقول لو ما انتي رديتي كانت حتمشي صاح؟؟
انا ما رديت ليه؟؟؟
ليه امي تحتاجني وما امشي يا اسيل
لكن انا ما فتحت خشمي بي كلمه اي كنت حاضناهو وبمسح ليهو في شعرو لكن كل ما اكون دايرا اقول حاجه تخفف عنه بتزكر المنظر الشفتو
اثناء ما انا حاضناهو سمعت صوت بتاع زول بجر نفس شديد كده اتزكرت انه عمر عندو ازمه والعطور ما بتنفع معاهو وانا خاته عطر وكمان هو ببكي
فجاه هبشتو لقيت جسمو عباره عن لوح تلج
بقيت بكورك شدددديددد لي درجه اي ممرض طلع يشوف في شنو وشالو سريع وادوهو جرعه اوكسجين وطلعو ليهو القميص
ده كان ممكن يكون اصعب امتحان ختاني فيهو ربنا عشان يخلي الزول البحبو يغلط لكن ما اقدر ازح من جمبو لاني لو زحيت ما حيغيب عن بالي ولا ثانيه
انا قعدت لحدي اذان العشا في المستشفى عمر بقا كويس لكن لسا كان مرهق ونايم وخالتو اصلا كانو حيبيتوها
الساعه لمن جات حداشر خالتو هاجر اتصلت لي قالت لي وين انتي حكيت ليها بقت تكورك فيني ولي ما وريتينا وانتي وانتي فهمتها القصه وكده وقفلت
وطبعا انا حبيت معاهم كنت
انا بقيت قاعده جمب عمر الهو الازمه المره د تعبتو شديد ودنيا مع خالتو
زي الساعه اتنين صباحا تلفون عمر اتصل وبقا بتصل كتير طلعتو من جيبو لقيتها د نغم قفلت التلفون وختيتو وكنت قاعده بس ومدنقرا راسي بقرا قران
عمر....اسيل
رفعت راسي مخلوعه قلت ليهو فشنو مالك
عمر....بردان شديد انا
بردان
طلعت للممرضه قلت ليها قالت لي انتو ما جبتو شي من البيت معاكم
قلت ليها هسا ممكن امشي
الممرضه....يا بت الساعه اتنين صباحا شوفي اي شي غطيهو بيهو ان شاءالله عبايتك د
قلت ليها حاضر
مشيت لي دنيت سالتها بقت تقول لي مستشفي ما فيها شي ود شنو الاهمال د وكده طلعت خليتها بتتكلم
مشيت الغرفه لي عمر طفيت المكيف والمروحه وطلعت عبايتي وبقيت قاعده بي تشيرت وبنطلون والطرحه لافاها فيني
غطيتو ورقدت في الكنبه لحدي الصباح انا عيني دي ما غمضتها اصلا
**************************
لمن اصبحنا الصباح عمر الحمدلله بقا كويس شديد وخالتو كمان كتبو ليها خروج
طلعنا كلنا ووصلتهم للبيت وطوالي مرقت وانا مارقه عمر مسكني من يدي
اتلفت قلت ليهو يدي فكها تاني شي انت هسي تعبان كلامنا حيكون بعد ما تبقا كويس ده لو لسا بيناتنا كلام وجريت يدي منو ومشيت بيتنا
اول ما وصلت غرفتي انا قعدت ابكي بي حرقه كده مبالغه يعني انا قدامو كنت قويه هسا مالي ما كان نفسي وهو في وضع زي د ما اكون جمبو لكن عمر اجبرني اعمل كده التصرف العملو عمر خلاهو يبقا قدر النقطه في نظري اتصدمت شديد بالجد بقيت بس قاعده والتفكير يودي ويجيب فيني لحدي ما نمت
**************************
صحيت الساعه خمسه مغرب كده مشيت اتغديت وجيت قعدت في تلفوني لقيتو خاتي صورتي ستوري وكاتب
*لم اكن اعرف انه سيكون لي اماً ثانيه ذات يوم*
ولا اشتغلت بيهو كانو ما قاعد وقفلت التلفون ونزلت تحت
#دردشتنا
طيب واحد من معاني الحب
انك لو زعلان من زول بتحبو وهو في حاجه ليك ما تخليهو براهو
اسيل بالرغم من انها قويه شديد لكن حنونه قلبها ما سمح ليها تشوف حبيبها كده وتسكت بالرغم من الموقف الحصل لكن هي اخدتو في حضنها وطبطبت عليهو لمن كان بردان هي كانت بترجف من الخوف عليهو بس لي مجرد انه بردان
حبو صح بالله🙂❤️❤️❤️❤️❤️
#يتبع
في امان الله ما تنسو التصويت
