بعد يومين عند امل جالسه بالجلسه الخارجيه وحاطه يدها على خدها وسرحانه تتذكر امس بالليل لما كانت مع يارا.
(نسترجع الموقف)
"امل شافت يارا من بعيد تكلم بالجوال وراحت لها
امل : يارا ايش فيك احسك مخروشه!
بلعت ريقها يارا بتوتر : قاعده ادور بخاخ الربو حق مهند ومن الحوسه عجزت احصله
دق قلب امل بقوه : ليش ايش فيه؟
يارا : من امس هو تعبان الحين داق علي ومره متأزم ومو قادر يطلع!
امل بدون شعور طاحت ع الكرسي رجولها مو قادره تشيلها وعيونها امتلت دموع وصارت تبكي متجاهله نظرات يارا المنصدمه!
جلست جنبها يارا بخوف : امل شفيك؟
امل ماردت عليها ولازالت تبكي
يارا : يختي لا تخرشيني انتي بعد اشفيك!
امل ببكاء صرخت فيها : دوري للبخاخ حقه لا تجلسين تسولفين!
يارا : بسم الله الرحمان الرحيم ف…
قاطعها صوت اسيل : يارا هذا هو البخاخ حصلته!
اخذته منها يارا بسرعه : ياعمري تسلمين "رفعت الجوال لاذنها ودقت على مهند" وينك؟……يلا اللحين اطلع لك!
مشت يارا متوجهة للباب وبسرعه فزّت امل وراها رايحه ل الشباك وبمجرد ما شافت مهند تقوست شفايفها ببكاء ونزلت دموعها.
اسيل من وراها : مسكين!
مسحت دمعتها امل وعيونها تراقبه بصمت
اسيل باستهزاء : شرايك تروحي له؟
امل : بالله بعدي عني مو رايقه لك!
اسيل ضحكت : اتبعي قلبك يامل العقل والكرامه مو نافعينك بشيء!
قبل تتكلم امل وتصارخ عليها مشت اسيل وتركتها.
سرحت امل وهي تناظر مهند الي توجهة للكراسي الي بالحديقه وجلس هناك وهو يكح ويضرب صدره بخفيف ووجهة احمر.
يارا رفعت حاجبها لما شافت امل تناظر له من الشباك وتبكي وتقدمت لها : امل؟
مسحت دموعها امل ولفت لها بصمت
يارا بضحكة وهي رافعه حاجبها: خير؟؟؟
امل : وش الي خير؟
يارا ابتسمت بخفيف وقبل تقول اي شيء قاطعتها امل وقالت بهمس وقهر : ايه احبه ارتحتي
ضحكت يارا بصوت عالي : اقسم بالله كنت حاسه بس اكذب احساسي
امل ببكاء : امانه كيفه ؟ مره يتألم او لا؟
يارا : والله من اول مارجع من دوامه امس وهو تعبان وحالته حاله!
امل من كل قلبها : الله ياخذ دوامه
ضحكت يارا وسحبت يدها معاها : يلا تعالي احكيلي كيف حبيتيه
جلست معاها امل وتناهدت وبدأت تحكي لها من اول مره شافت فيها مهند وهي لما فتح لها الباب وصارخ عليها لأخر مره شافته بأخر موقف بينهم.
يارا بدهشه : طلع الي بينكم اكبر من توقعاتي!
امل ابتسمت بألم
يارا : امل "بلعت ريقها" يعني ماودي اقولك أن تكذبين عيونك وتصدقيني بس ترى مهند اخوي واعرف مثل ماعرف نفسي او اكثر "سكتت" ماعنده هالحركات مهند يعني احس في شيء غلط لان مهند يكره كل بنت كذا يعني مادري بس احس في شيء غلط داخل بينكم!
امل : يارا؟ مو مهم كلشيء الحين مو مهم؟ مثلا لو اكتشف ان في شيء تسبب بكل ذا وان مهند بريء ولو ان ماله عذر ابدا مارح ارجع معاه زي قبل ابدا ابدا ابدا ولا حيرجع الي بيننا ابدا!
يارا : عادي لا ترجعون زي قبل صيروا احلا من قبل!
امل :هه مابعد موت الهوى غير الغبينه!
يارا : امانه امل لا تتسرعين وحطي له مليون عذر!
امل : مايمديني احط له اعذار هو بنفسه قايل لي اني نزوه والحكي الي قلته لك!
يارا : يمكن لانه معصب قال هالحكي ماتدرين يا امل!
امل : تدرين وش يريحني؟
يارا : وش؟
امل : اني عارفه اني ماكنت زي اي بنت عرفها بكل اختصار ماني البنت العابره فحياة مهند وهالشيء مطمني أن البعد مارح ينسيه الوصل أللي كان!
يارا : متطمنه من ناحية البعد؟
امل بغصه : بس خايفه ينسونه النساء!"
صحاها من سرحانها يد مناف أللي التفت حول كتفها : اموله؟
لفت له : هلا؟
مناف : بتروحين معاهم عند اهل زوجة سامي؟
امل كشرت : ايه غصب عني!
مناف بتردد : وهند؟
امل : مارح تروح بتجهز اغراضنا عشان لارجعنا البيت
مناف : حتى انا ظهري متكسر وتعبان مارح اروح
امل : ترى الكل رايح وش بيجلسك انت!
مناف : قلت لك تعبان ومره وحده عشان اجهز اغراضي انا بعد.
امل : الا على الطاري جد بيسكنون جنبنا رعد واخوانه؟
ضحك مناف على حماسها : ايه صدق!
ضحكت امل بفرحه : وناسه!
تناهد مناف وقام : بروح انام انتبهي لنفسك ولخواتك
مشى من عندها وامل مبتسمه له توجهة لغرفته وفتح الباب وبدون شعور رفع حاجبه وهو يشوف رعد يقلب ب اغراضه
مناف : خير ي اخ رعد؟
رعد واخلاقه قافله : شاحني وين؟
مناف : مالقيت الا غرفتي تدور فيها شاحنك؟يلا اقلب وجهك مو عندي شاحنك!
رعد : ولد لا تكلمني بهالاسلوب لا العن شكلك
مناف : ولد؟ اصغر عيالك انا؟
رعد تكتف : كل زق
مناف فتح الباب : يلا وريني عرض اكتافك لا امردغك!
رعد ضحك بيأس : مناف جد ياخي بالله تعال معانا!
مناف : والله ماني رايق وميت نوم ومو مصدق اننا افتكينا من عصام
ضحك رعد : ياولد راحه نفسيه قسم بالله!
مناف : طيب اقلب وجهك يلا
رعد استند ع الباب : امس كنت بالمحكمة عشان دلال؟ليش ماطلقت اختي؟
مناف رفع حاجبه : نعم؟؟
رعد : ايه الي سمعت طلقها ترى قدامها مستقبل تبي تدرس وتتزوج وتجيب بزارين كثير واصير خال وكذا!
مناف احتدت ملامحه وانسدح على السرير : كل زق هذا اول شيء ثاني شيء زواجي اصلا من اختك غير صحيح لانه بدون تحليل واصلا بدون هويه فمايحتاج اطلقها
رعد : شفيك تضايقت؟اجل تحسبها بتقعد تنتظر حظرة جنابك طول العمر
قام مناف ودف رعد برا الغرفه وسكر الباب : مُزعج!
.
.
الساعه الثانيه عشر منتصف الليل
عند "اسيل" "وهند" بالمطبخ.
لفت لهند بقهر : هذي ثالث وحده اسويها وتخرب!
ضحكت هند وهي تطقطق بجوالها : يلا طيب سوي الرابعه!
اسيل : لااااا خلاص فقدت الامل اني اضبطها
هند مبتسمه بخفيف
اسيل : بروح ابدل ملابسي وارجع "تناهد" جهزي الاغراض عشان اسوي الرابعه
ضحكت هند بقوه : اوكيه
طلعت اسيل وظلت هند جالسه بالمطبخ وتجهز مكونات الكيكة وسرحانه.
صحاها من سرحانها صوت رساله بجوالها ,توجهت للجوال وشافت الرساله الي كانت من مناف ومحتواها : وينك؟"
ردت عليه "مارحت معاهم!"
مناف "فيّ اكل؟تو صحيت وجوعان؟"
ابتسمت هند بتفكير وابتسامة شر ثم كتبت له "انتظر خمس دقايق وتعال للمطبخ واكون مسخنه لك الأكل"
رد لها مناف "اوك اتروش واجيك!"
ضحكت هند بفرحه ورتبت الطاوله وبسرعه طلعت الاكل من الثلاجه ودخلته الميكرويف على دخلت اسيل الي قالت : ليش بتسخني الاكل
هند ابتسمت : جعت!
اسيل : تونا ماكلين ياظالمه!
هند : بطني وكيفي!
ضحكت اسيل وتقدمت ل الطاوله : وراك ماجهزتي الاغراض كلها؟
هند بضحكه وبهدوء وهي تسحب جوالها من الطاوله : جهزيها انتي
اسيل لفت لها : وين رايحه؟
هند : بطني عورني بروح الحمام وانتي بكرامه اذا جهز الاكل حطيه لي ع الطاوله!
هزت راسها اسيل بمعنى طيب ورفعت شعرها لفوق وشمرت اكمامها .
.
.
هزت راسها اسيل بمعنى طيب ورفعت شعرها لفوق وشمرت اكمامها وبدأت من جديد تحاول تسوي الكيكه
عند مناف ، طلع من غرفته وعيونه بجواله متوجهة للمطبخ وابدا مو منتبه ,وصل للمطبخ ودخل وعيونه لازالت بجواله اما هند أللي كانت متخبيه ورى الباب بهدوء طلعت وسكرة الباب بقوه وبهاللحضه مناف انتبه للباب ولف لورى وكذالك اسيل لفت للباب وانصدمت من وجود مناف
رجع مناف لف وانصدم هو بعد من وجود اسيل ، لحضه صمّت وكل واحد منهم يناظر الثاني بدهشه.
بلع ريقه ولف للباب : معليش كنت افكر هند موجوده هنا!
شدت اسيل على قبضتها بقهر : ايه هي كانت هنا بس طلعت قبل شوي
ابتسم مناف لما فهم حركت هند وكذالك اسيل كانت فاهمه حركة هند ومقهوره منها!
اسيل : ترى الباب خربان مايفتح غير من برا!
عقد حواجبه مناف : بالله!
اسيل هزت راسها بأيه وقلبها يدق بقوه!
مناف تناهد وتقدم ل الطاوله وجلس وامامه كانت واقفه اسيل أللي حاولت قدّر الأمكان تتجاهله مع ان قلبها مربكها وابدا مو مركزه بشغلها.
مناف تنحنح : معليه بعذبك معاي بس ممكن تسوي لي شاهي
ابتسمت له وقلبها بيطلع من مكانه من قو ضرباته وتوجهة للغلايه عبتها مويه ورجعت لشغلها!
اما مناف فأبداً ما كان ياكل ولا باله مع اكله ، كان مستند ع الكرسي وعيونه تراقبها وتراقب رجفة يديها وارتباكها الواضح جداً وكان مبتسم بضحكة لانها تحاول تتجاهله.
رفعت اسيل خصلات شعرها المتمرده عن وجهها وقالت : ممكن ما تناظرني؟
مناف ضحكت ولف عنها
اسيل : قايله نكته انا؟
مناف تنحنح وبضحكة قال : طيب ممكن تسوي الشاهي عشان اكل واطلع؟
توجهة للغلايه وبيدها الكوب وقلبها يدق بقوه ومرتبكة وبدون ماتنتبه وهي سرحانه تسللت قطرات مويه حاره على يدها وبصرخه أفلتت الكوب من يدها بدون ماتحس
اما مناف فقام لها بسرعه وقلبه يدق بقوه خوفاً عليها وسحبها للمغسله فتح المويا البارده ودخل يدها بداخلها وصار يفرك لها بخفيف على مكان الحرق.
اسيل عيونها كانت مليانه دموع وترجف بشكل مو طبيعي مو الم من الحرق قد ماهو ربكة من قرب مناف!
همس لها وانفاسه تلفح وجهها من قربه : لا تخافين
برجفة همست : طول عمري كنت خايفه الا معاك!
لف وناظر عيونها وبدون شعور تعلقت عيونهم ببعض ثواني واقترب منها مناف اكثر لما جبينه لامس جبينها وقمة خشمه كذالك لامست قمه خشمها.
همست له بصوت باكي : بعدك موّتني مناف!
رفع يده وابعد خصلات شعرها عن وجهها وبهدوء طبع بوسه على جبينها وكذالك عيونها وقمة خشمها كل هذا وهو رامي كبريائه ورى ظهره ومو شايف قدامه غير اسيل وشوقه لها.
مسكت وجهه بين يديها وهمست : أيه انا لازال عندي بك امل!
مناف بهمس موجوع : مو قادر اتجاوز أللي صار يانغم
فتحت فمها بتتكلم لكن قاطعها لما طبع على جبينها بوسة طويله مع تنهيده وهمس : توبه من الحب توبه "ناظر عيونها" ماكسبت من الهوى غير الذنوب!
ببكاء وبحة وجع همست : اذا انا ذنب؟مني لا تتوب "سكتت شوي"لاتتوب تكفى!
بكت ومن بين بكائها نطقت : بس ابي ترجع هذيك الليله أللي سالتك فيها من تحب؟وقلت انتي!
تسللت دمعه من عيونه وهمس : وللحين انتي!
لف عنها وكان بيطلع لولا انها سبقته ومسكت يده وهمست : تخيل؟
مناف اللي وجهه قلب احمر وكان ماسك دموعه رغم ان مشاعره جياشه.
اسيل ببكاء : تخيل كل تعب عمري؟ولا اخذتك بأيّة حال؟ وتخيل كل تعب هذيك الليله من هروب وخوف وظلام الليل "بغصه نطقة" والسيل أللي جمعني فيك ولا أخذتك
همس بصوت مخنوق لما شافها مو قادره تكمل حكيها من البكاء : تخيلي كل هالحب أللي بصدري لك ومو قادر اسامحك!
طاحت اسيل لان رجولها ماعادت قادره تشيلها اما مناف فبنفس حركة رعد توجهة ل الشباك وفتحه ونقز منه للخارج تارك وراه قلبه وقلب اسيل متألمين!
.
.
اليوم التالي عصراً
عند رعد جالس بالجلسه الخارجيه للمجلس مع جدته وجده واخوانه وبيده كوب القهوه وسرحان.
صحاه من سرحانه صوت جدته : ها يارعد وش قلت بموضوعنا
استعدل بجلسته : هو صح اني ادمي ابغى اتزوج بس مو يعني اني بتسرع بقرار مثل ذا الله يهديك!
جدته بحده : وش الي تتسرع؟ليش مو واثق بنفسك وانك رجال بيت وتعتمد على حالك!
رعد : الا واثق بنفسي اكيد بس قاعد افكر يعني واحسب حساب كل خطوه عشان لا اندم بعدين!
جدتهه : اسمع مني والله مارح تندم عبير بنت سنعه وواعيه وعاقله ومافي مثلها وانت عندك شقه ملك وماعليك قاصر!
ضحكت رسيل بقوه من سمعت اسم عبير وماعلقت
رعد ناظرها : اشفي؟
رسيل بضحكة : لا ولاشي كملوا نقاشكم!
رعد رفع حاجبه وقبل يقول شيء قالت رسيل : من كل عقلك رعد بتاخذ عبير؟
رعد : ليش وش فيها؟
ضحكت رسيل : شكلك تبي اسيل تموت علينا "ضحكت بقوه" انت مو ملاحظ وجهها انقلب يوم قالت جدتي عبير ؟ترى عبير كانت خطيبة مناف وكانت حرب هي واسيل
انقلب وجهه رعد ورفع حاجبه : عبير كانت خطيبة مناف؟
رسيل بضحكه : ايه ظلوا ثلاث سنوات مخطوبين لبعض!
رعد لف لجدته وهو رافع حاجبه : بالله منجدك بتزوجيني خطيبة منافف؟
جدته : ايه وشفيها بعدين تراها كانت خطيبة مناف مو زوجته!
قام رعد وهو مقهور : خلاص معاد ابغى والموضوع ينصك وعبير ماني متزوجها ولاني اصلا متزوج خير شر
جدته : اسمع مني وخلنا نخطبها لك وان شاء الله زواجكم مع طلال وريما
قبل يرد عليها رعد رفع حاجبه طلال وقال : انا وريما؟ مين قالكم أننا بنسوي زواج؟
رعد تكتف بقهر اكثر : لايشيخ؟ اجل ؟
طلال بهدوء : اتفقنا بعد اسبوعين بمرها جده واخذها معاي ل الشمال وبدون عرس وفشخره!
رعد : سلامات سلامات ؟ وانا اخر من يعلم!
طلال : لا حبيبي انت مو اخر من يعلم اصلا انا تو تذكرت وقلت لكم!
رعد : وليه مافي عرس ؟
طلال تناهد : انا موافق وهي موافقه انت شدخلك؟
رعد : كل زق وتعال بما اني تذكرت خنوقع اوراق الوكاله وارجعها لك وافتك منها ومنك!
طلال : ليش ؟
رعد : خلاص طيرت الشركاء
قام معاه طلال : يلعن شكلك بهالسهوله!
رعد : ولا خذا موضوعهم مني يومين حتى!
عمَّ الصمت بالمكان بعد ماراحوا رعد وطلال وكل واحد بأفكاره عدى رسيل أللي كانت تلعب بكاميرة طلال
سحب منها ياسر الكاميره : ترى بتخربيها ياغبيه!
رسيل : جيب ابغى اتصور
ياسر ضحك : تعالي انا بصورك بين الورد ياورده
رسيل بفرحة نقزت : ياعمري انت
مشى معاها ياسر بهدوء وهو يفكر كيف يسالها
رسيل : يلا خنصور هنا
ياسر : طيب اوقفي زين وابتسمي يلا يلا يلا واخذنا اول صوره للحلوه رسيل
تقدمت منه وهي تناظر الكاميره : شعندك مدلعني اليوم؟
بلع ريقه وضحك : والله مو لشيء بس ببالي سؤال ودي منك اعرف اجابته
رسيل : اسال؟
ياسر تناهد : هذا وشسمه "تنحنح" يوم الزواج لمحت وحده لابسه فستان كحلي و"سكت مو عارف يكمل"
رسيل : وايش؟
ياسر : لا بس ودي اعرف منهي!
رسيل تناهدت : اها بس ترى كثير من البنات كانو لابسين كحلي يعني وضح لي اكثر "كذابه طبعا"
ياسر عقد حواجبه : بأيش اوضح لك؟
رسيل : مثلا كيف لون روجها؟
ياسر : عودي !
رسيل : وشوزها ؟
ياسر بسرعه : عودي بعد!
رسيل : وكيف مسويه شعرها؟
ياسر : من فوق فيه تسريحه بسيطه حلوه ومن تحت مفكوك وناعم
رسيل : قلت لي لمحتها ؟ م شاء الله اشوفك مفصل البنت تفصيل!
ياسر ضحك بأحراج!
رسيل : ماقلت لي اسوار يديها كيف ؟
عقد حواجبه بقهر منها
ضحكت رسيل : امزح معاك "سكتت شوي" هذي ياطويل العمر
ياسر : ايه منهي؟
رسيل بتقهره : هـــــاذي
ياسر مسكها من شعرها بقهر : اخلصي؟
ضحكت بقوه : اي اي سيب شعري
ياسر : ما اسيبه لين تقولين!
رسيل : خلاص والله خلاص هذي هنوده بنت عمي
تركها ياسر : اخت مناف؟
رسيل : شدراك انها اخت مناف هاااا؟؟
ياسر : ياغبيه مو تقولين بنت عمي
ضحكت رسيل : اي صح
ابتسم ياسر ورمى عليها الكاميره وعطاها ظهره ماشي.
رسيل : ياحيوان مو قلت بتصورني؟
ضحك ياسر بقوه وكمل طريقه متجاهلها
°
