لندن غلاها غير

بارت 30

*** ريم

دقت علي منور الساعه 11:00 الصبح :

منيره : صباح الخير ريم ، وينج ؟

ريم : بالنور ، طالعه اتريق

منيره : بتروحين وياي صوب شما ؟ ترا اليوم اول جلسة كيماوي لها واحس لازم انكون معاها

ريم : امم تمام تمرين علي؟

منيره : اوك طرشي اللوكيشن

***

يالسين على الكراسي قدام باب الغرفه اللي فيها شما ، ممر كئيب مظلم مافي اشعة شمس ولا نور ، كان ابو شما ساند ظهره على الباب ورافع يديه يدعي اما سعود كان يمشي رايح راد على الممر ، وابو سعود يالس ويا امه يقرون قرآن ، طلع الدكتور ووقف قدام ابو شما عشان يرمسه :

الدكتور : تطمن ولا تخاف اذا سمعتها تصارخ هذا من الألم وقوة الكيماوي

شوي شوي بدينا نسمع صوت ونين وصياح وبدا التوتر يزداد لين مابدت تصارخ وتقول ابا امي ، ييبولي امي كان ابوها من ورا الباب يرمسها لاكنها ماترد عليه وشوي شوي خوفه يزداد وصريخها يعلى ، يلس سعود عدال يدته ماسك راسه ومن التوتر يهز ريله اما ابوه راح اييب لامه ماي وانا ومنور كنا يالسين ونهدي بعضنا ، كان شعور غريب ما اتمنى لاي حد يمر بـ هالوقف ويحس بـ هالشعور .

فجأه انقطع الصوت

اليده شما : شو فيها ؟!

ابو شما كان واقف يضرب الباب عشان يفتح والباب اصلاً مايفتح إلا ببطاقه تكون عند الدكتور ، كنا على اعصابنا نتريا ابوشما والدكتور وانا قلبي متقطع على سعود كان منهار وخايف عليها بس مابيده شي صدق ياحظ شما فيه ،طول الدكتور ما يا فـ راح سعود يشوفهم ليش متأخرين ، وبعد خمس دقايق شرفوا

فتح الدكتور الباب ودخل بس ابوها ، وبعد ما طلع قال

ابو شما : فديتها حاضنه القرآن ومبتسمه قلبي مطمئن عليها

اليده شما : الله يقومها بالسلامه يارب

ابو سعود : امين ، اميه قومي بردج الفندق تريحين شوي هني سعود بييلس وبيطمنا على شما

ابو شما : هيه اميه روحي انا وسعود هني

***

**شما

بعد جلسة الكيماوي كنت تعبانه مافيني حيل لاي شي حتى الكلام كان صعب علي ، نمت وقومني سعود الساعه 6:30 العصر

شما : سعود ؟

سعود : عيونه

شما : ابا كوفي

سعود : بس كوفي ؟

شما : امم والدونتس اللي احبه

سعود : من عيوني الحين بطلب لج

شما : وين فوني ؟

سعود : عالجرج

فتحت التلفون ولقيت ثلاث مكالمات فايته من ابوي دخلت تويتر ونزلت تغريده :

ربي أنه أغلى هديه من عندك فـ يارب " أحفظ روحه لي و أدمه لآخر العمر ❤ "

يتبع ...