غلطة غيرت حياتي (مكتملة)

البارت السادس والعشرون

انت تمتلك مفاتيح قلبي وجميع اقفاله ، وعشقا يتوغل بداخل اعماقي ...كل النصوص والكتابات والاقتباسات لن توافيك حقك ومكانك في قلبي لهذا لن اقول اني احبك ......لانها اصبحت لا تكفي ❤❤

دخل سليم للمنزل بسرعة وعجلة من امره وعلي وجهه امارات الغضب لمجرد فكره انها احبت غيره وجد عمته تجلس في  الداخل .
زهرة : مالك يا ولدي متلهوج كدا ليه كان في وحش بيچري وراك .
سليم وهو يحاول تهدأت نفسه : لا ابدا يا حبيبتي انا بس نسيت ملف مهم وجيت اخده .
زهرة : اااه جول كدا طب يا ولدي خد نفسك متستعچلش عموما اطلع شوفه ربنا يعترك عليه .
سليم : حاضر يا حبيبتي .... بقولك اي يا عمتو.
زهرة: جول يا ضنايا .
سليم مدعي اللامبالاه : اومال فين نور مش شايفها .
زهرة باستغراب : نور ... ليه يا ولدي في حاچة ولا اي .
سليم : لا ابدا يا عمتو بس كانت عاوزه حاجة من كليتها ف جبتهالها عاوز اعرف هي فين عشان اديهالها مش اكتر .
زهرة: اه يا ولدي هتلاجيها ف الڤرنده شوفتها بتذاكر هناك .
سليم بسرعة: طب يا حبيبتي هرحلها اديها الحاجة وامشي مع السلامة.. وقبل يدها .
زهرة بابتسامة: الله يسلمة يا جلبي ويچعلك ف كل خطوة سلامة .

اما في الڤرندة كانت نور تجلس تراجع دروسها
الا ان شعرت بظل طويل يقف امامها فرفعت راسها لتجده سليم يقف امامها بهيبته و قوته ينظر لها وعلي وجهه علامات الغضب الهادئ .
وقفت مكانها بصدمة : سليم .... اي الي رجعك بدري كدا انت مش بترجع دلوقت انت كويس .
سليم : كويس جدا .
نور : اومال مالك في اي وليه وشك مكشر كدا حصل حاجة .
سليم : حصل وبيحصل حاجات كتير عاوز افهمها منك .
نور بدهشة : مني انا ... والله انا الي ما فاهمة حاجة في اي يا سليم .
سليم بعصبيه : في انك بقيتي انسانه تانيه غير الي انا اعرفها .
نور بصدمة: انا ..... ليه بتقول كدا ، اي خلاك تقول كدا .
سليم بغضب : هو انتي مبتحبنيش زي ما قولتيلي
كانت مجرد مشاعر عابرة كدا زي ما بيقولوا مشاعر مراهقة مكنتش حقيقية ولا اي انا عاوز افهم ، معنتش فاهمك معنتش عارف انتي بتحبيني ولا لاء ، ولا كنتي بتعلقيني بيكي وبعد كدا تمشي ... ليه ليه اتغيرتي معنتيش بتقولي بحبك زي كل مره بتهربي بعنيكي مني ،بقيتي متتكلميش معايا عن شعورك بقيتي بتبعدي مش فاهم ليه ... ولا يكونش حبيتي غيري .
نور بدموع وصياح: اي الي انت بتقوله ده .
سليم بغضب : الي انا حاسه .. هو ده الي انا حاسه هو معني هروبك مني كدا يا مشاعرك كانت مزيفة يا حبيتي غيري ، انهي فيهم الاجابة يا نور ريحيني وجوبيني .

كانت تستمع له ودموعها تجري علي وجنتيها من كلامه ..من كلام حبيب قلبها الجارح
سليم بغضب شديد : ردي علياااا فهميني حبيتي غيري ردييييي .
نور ببكاء شديد : عمري.. عمري ما حبيت غيرك عمري .
سليم : اومال اي ريحيني .
نور بدمع : انا عمر ما مشاعري ناحيتك كانت مشاعر مزيفة وعمر حبي ليك ما كان مزيف وعمري ما حبيت ولا هحب حد غيرك ابدا .... بس انت عاوزني اقول بحب ليه ، اقولها ليه وانا كل مره بقولها بتقابل بالسكون وابتسامة مبتوصلش لعنيك حتي، بقولها بكل ذزه حب جوايا الاقيك قابلتها بسكوت وصمت ... يا سليم انا انا الي ببادر بكل حاجة ، انا الي جيت قولتلك بحبك وانا الي بقولها كل مره ،انا الي بتوحشني وانت علي طول بتكون واحشني ببعتلك رساله اقولك انزل عاوزه اقعد معاك ، انا الي بعرفك كبيره وصغيره ف يومي ، انا الي بهتم بيك ، بتصل اطمن عليك .... انا الي بعمل كل حاجة يا سليم كل حاجة ،لحد ما تعبت ..حسيت نفسي اني بفرض نفسي عليك لما لاقيتك مبتقولش حاجة ، وياريتك ما بتقولش بس دا انت مبتقولش ومبتعملش مفيش تصرفات بتبين حتي انك بتحبني
لما لاقيت كدا بعدت اديتك مساحتك معنتش بقول مشاعري عشان مبلاقيش رد عليها غير رد فاتر ملوش معني ، هربت بعيني منك عشان عيوني بتفضحني وبتفضح حبي ليك عيني هتقول كل الي انا بجاهد اني اخبيه ، قولت ابعد لو حبتني هتيجي ، هتيجي وتقولهالي ... لو محبتنيش يبقا مفرضش نفسي عليك اكتر من كدا وعشان مشاعري متنجرحش اكتر من كدا بردو ...... عرفت ليه يا باشمهندس ، مش عشان مشاعري مزيفة ولا عشان حبيت غيرك ، ده عشان تعبت من المبادره الي ملهاش مقابل حتي لو بكلمة ونظره حلوه ..... عن اذنك .