Before The Future [Wattys 2021 Winner]

CHAPTER 8

Chapter 8: Chief Of Police

PINALABAS sila Agasé sa loob ng horror house. Mabilis na dumating ang pulisya at ang scene of the crimes operative. Pinalabas sila pero tinipon ang mga tao na nasa loob ng horror house nang mangyari iyon.

"You okay, Bennie?" tanong ni Third kay Benilde at hinawi ang hibla buhok ng dalaga na nasa mukha nito.

Nakatitig lang si Agasé sa dalawa. Gustuhin man niyang magselos ay pinigilan niya ang sarili. Kumuyom ang kamao niya at napahinga siya nang malalim. Inisip na lang ni Agasé na mas importante ang nangyayari sa paligid niya.

Nakita ni Agasé na kinuha na ang bangkay ng biktima. Abala ang mga imbestigador sa pagkuha ng larawan sa nangyaring krimen. Nakatitig ang binata sa mga kasamahan niya na pumasok din sa horror house.

"Inspector Santos, nandito po si Chief Delfranco," sambit ng isang pulis na lumapit sa lalaking may ngalan na Inspector Santos.

"Bakit nagawi si Chief dito?" halos pabulong na wika ni INSP. Santos. Pabulong man ay may diin ang boses ng lalaki.

"Naka-civilian si Chief. Kasama yata niya ang pamilya niya rito sa Amusement Park," wika ng isang pulis. Pagkatapos ay umalis na ito.

Sinulyapan ni Agasé ang mga kasama. Nandoon ang grupo ng mga binata, pati iyong tatlong babaeng kasing edaran nila, dalawang lalaking nakaitim, isang lalaki na solo na sinasabing pinsan ng isa pang couple nandoon. Ang huling tiningnan ni Agasé ay ang partner ng babaeng namatay.

Isa-isa na silang kinuhanan ng mga pulis ng statement ng mga imbestigador. Pinapasok sila isa-isa sa isang kuwarto malapit sa hotror house. Opisina iyon kung saan dinadala ang mga nawawalang gamit o kapag may nahanap na nawawalang mga bata.

"Ikaw na raw, Agasé," untag ni Third kay Agasé. Tumango si Agasé at sumunod sa.isang pulis.

Pumasok si Agasé sa isang kuwarto. Malamig sa loob dahil sa dalawang naglalakihang aircon. Umupo siya sa isang bakanteng upuan at sa harap no'n ay isang lamesa.

"Ako si Chief Delfranco."

"Kilala kita, chief. Ang mga pulis mo ang may hawak sa kaso ng mga magulang ko."

"Ilang taon ka na?"

"Kaka-seventeen ko pa lang."

"Anong buong pangalan mo?" tanong ng pulis kay Agasê. Ang isa namang pulis na nandoon ay ang nagre-record sa usapan nila.

"Agasé Hydrox Favilion."

"Bata ka pa pala. Ikaw ang tagapagmana ng mga Favilion kung hindi ako nagkakamali. Sabi ng mga nauna, ikaw raw ang nakakita sa bangkay?" tanong ni Chief Delfranco.

"Iyong tatlong babae ang nakakita. Tumili silang tatlo kaya agad akong lumapit at rumesponde. Doon, nakita ko ang bangkay ng babae," sabi ni Agasé na diretsong nakatitig sa mata ni Chief Delfranco.

"Wala ka bang kakaibang napansin bago nangyari?"

"Iyong ilaw ay namatay ng ilang minuto. Hindi ako sigurado kung isa iyon sa pakulo ng horror house o ang killer ang gumawa no'n. Bago kami pumasok ay wala naman akong napansin na kakaiba. Masaya pa silang pumasok ng partner niya sa horror house," pahayag ni Agasé. Tumango-tango si Chief Delfranco.

Sumenyas ang chief sa isa pang pulis. Doon ay may inilapag itong bagay na nakalagay sa isang supot. Kumikinang na bato na mukhang hindi buo ang parte.

"May ideya ka ba kung ano ang bagay na ito? Nakita ito sa crime scene. Malapit sa bangkay ng babae."

"Anong pangalan ng biktima?"