Before The Future [Wattys 2021 Winner]

CHAPTER 17

Chapter 17: Maid

NAPUTOL ang tawag ni Maia kay Agasé. Sinubukan ni Agasé tawagan ang cellphone ni Neon nang paulit-ulit. Hindi sumasagot ang lalaki, inaasahan na iyon ng lalaki.

Nasa salas sila ngayon ni Ulysses. Pilit nilang tinatawagan ang numero ni Neon Leviste. Pero sa huli, bigo pa rin ang dalawa.

"Ano na? Sumagot na ba?" tanong ni Ulysses kay Agasé. Umiling si Agasé at napahugot nang malalim na hininga.

"Hindi sumasagot."

"Malamang, hindi talaga sasagot iyon. Na-track ko naman na siya. Sugurin na lang natin . . ." sabi ni Ulysses at tumayo sa sofa. Nakasunod lang ng tingin si Agasé sa kaibigan.

"Saan ba iyong na-track mo na lugar nila?" tanong ni Ulysses.

"Sa condo ni Neon Leviste, sa Saturno Condominium," sagot ni Ulysses.

Tumayo na rin Agasé at sinundan niya ang kaibigan. Lumabas sila sa building. Gamit ang motor ni Ulysses ay papunta sila condominium ni Neon. Lumipas ang ilang minuto at nakarating na sila sa condominium ni Neon. Agad nilang pinuntahan ang palapag kung nasaan ang binata.

Nang makarating sila sa condominium ni Neon ay bukas ang pinto, pero wala ng tao sa loob.

"Negative," sabi ni Ulysses.

"Tangina naman!" inis na bulalas ni Agasé. Natadyakan niya pa ang trashcan na malapit sa kanya.

"Saan na tayo?" tanong ni Ulysses.

"Puntahan natin iyong mama ni Maia," sagot ni Agasé. Huminga nang malalim si Agasé bago muling nagsalita. "Nasa hospital daw ang mama ni Maia, sabi ni chief sa akin."

"Saang hospital?"

"St. Miriam Hospital daw. Malapit sa presinto iyong hospital na iyon . . ."

"O ano pang hinihintay mo? Tara na!" sabi ni Ulysses at hinila si Agasé.

Agad nilang pinuntahan ang ina ni Maia sa hospital. Nang makarating sila sa hospital ay naabutan nila ang ina ni Maia na walang malay. May oxygen ito sa ilong.

Hinang-hina at maputla ang ina ni Maia. Ang sabi ni Chief Delfranco kay Agasé, may kanser sa baga si Sarah Natividad. Malala na ang sakit nito, ang bayarin sa hospital ay sinalo ni chief.

"M-Maia . . ." nanghihinang sambit ni Sarah.

Agad lumapit si Ulysses at Agasê sa babae. Nakabukas na ang mga mata nito at nanghihina ito. Pilit itong kumikilos pero napapaaray ito kahit maliit pa lang ang galaw na nagagawa.

"Huwag po muna kayo kumilos, ma'am," ani Agasé.

"Opo, kasi nasasaktan kayo lalo." Inalalayan ni Ulysses ang babae na bahagyang maiangat ang kama.

"A-Ang anak ko . . ."

Hinawakan ni Sarah ang kamay ni Agasé na ikinagulat niya. Tiningnan siya sa mga mata ni Sarah. Nagluluha ang mata ng babae. Kitang-kita ang sakit at pangungulila.

"I-Iligtas mo ang . . . a-anak ko." Tumulo ang mga luha sa mata ni Sarah.

Mariing napapikit si Agasé. Nasasaktan siya sa nakikita niya. Lalong sumidhi ang kagustuhan niya na mailigtas si Maia sa kamay ni Neon Leviste.

"Ililigtas ko po ang anak niya. Ibabalim ko siya sa 'yo."

—
GALIT na galit si Neon. Mahigpit niyang hinawakan ang braso ni Maia. Namula na ang balat ng dalaga sa diin ng pagkakahawak ng binata rito. Nangingilid ang luha ni Maia habang nakatingin kay Neon. Nanginginig siya at hindi na halos magalaw ang katawan.