ابن الاجاويد

مشاهد من قصه قد الكتابه

السُوالف كُلها تگضي
وتُبقى سالِفتي طويلهَ
وهَمي ما سُولفته لاحَد
خاف يحسِبني أشتكيّله

نايمه بفراشي واحوص ، ياربي اريد اكوم اروح للحمام مثانتي راح اطك بس اخااف ، ضليت بمكاني اتكلب ، اخاف اطلع بره الغرفه اخاف من الظلمه ومن صوت عمي بليل ، .

زين اكعد مينا هااا ، لا اكيد مراح تكعد وتعيط بيه ..

كلبت على اليمنه وكورت نفسي احاول اكتمها ، اكوم اروح بسرعه وارجع مايحس ، لا اخاف مثل ذاك اليوم يطلعلي عمي من الظلمه سكران ويجلب بيه ..

زين اكعد اختي ، خاف يعصب علينا ، نفس مااعصب على بابا ويضربنا نفس ما ضربه وطلع الدم من راسه .. جريت نفس خايفه ، كتمت نفسي من سمعت يده باب تتحرك ..

غمضت عيني حيل وسكنت ماتحركت بعد ، الباب انفتحت واكو خطوات مشي ، حسيت على صوت شهكه وبجي بسكوت ، فتحت عيوني بس مارفعت الغطى ..

ضليت على نومتي خانسه اكو حركه بالغرفه .. تشجعت ورفعت الغطى شوي ، لان اختي مينا كاعده بصف الحايط مكنبصه ولازمه بطنها تبجي بهدوء ..

وخرت الغطا بسرعه شهكت يااا شبيج ..

هيه التفتت عليه متفاجئه شكعدج هاا من شوكت كاعده ..

- كمت لحيلي اروح عليها رفعت اديها لا لا تجين خليج بعيده ..

خلت اديها على وجها تكتم البجي حتى صوتها ميطلع ..

- شبيج دمعت عيوني شبيج يااكلبي ليش تبجين شكوو ..

تقربت عليها امشي على كيف ليش تبجين ..

اشرتلي لاتجين عفيه لا تتقربين ، وجهه احمر دموعها تارسه وجها ، ولازمه جسمها بديها ، مكوره روحها جن تحمي نفسها ..

تقربت حيل عليها وحظنتها ، كامت تشهك حيل وتبجي ،

من قهري وخوفي بجيت وياها ليش تبجين ليش عمو ضربج موو ليش دائما يضربج هاا ..

سكتت بس تبجي ،

سالتها ضربج لان طلعتي بره الغرفه بليل موو .. هو كلي اذا تطلعين بليل من الغرفه اضربج .

بس تهز براسها وتبجي ، كتلها ليش طلعتي انتي اني هسه محصوره وماطلعت ليش ماتحملتي للصبح ..

خلت اديها على وجها وزاد بجيها وتحاول تكتم نفسها بيدها ، حظنتها حيل دشداشتها مادري ليش مفتوكه من فوك ، ودكم مكطعه ؟؟!!

اكيد عاتها من ملابسها وضاربها ، هو دائما يضربنه ويعيط علينه ، وامي دومها تسكت ومدافع عنه ..

ولا كانو احنه بناتها ، ماعرف على شنو تحبه ومفضلته علينه هو واحد سكير ، بلا اخلاق ولا خوف من الله ، متيه بيته وابنه وجاي يمنه ساكن طول النهار حتى بليل ماخلصانيين منه ..