ابن الاجاويد

البارت الرابع والسبعون

_٧٤_

#أبن_الاجاويد(رد الدين)

#بقلمي_أسماء_ديمير

المره صارت خركه بالارض ، ام مؤيد فوك راسها ، دكت على خدها يااا خيه شجاج عود كلج تبشري ، وانتي صرتي هالشكل ..

ركض عليها لهيب يصيح يماا صدك تحجين كولي يالله ، ردي يما يضرب على خدها ..

اني واكفه لازمه ظهري وامسح بدموعي ، اجت ام مؤيد تبوسني وتباركلي تكلي مو كتلج مابيج شي ، البشاره اريدها بيدي يله ..

لهيب حار بامه ، يصحي بيها خطيه ..

واني واكفه مسطوره وام مؤيد واكفه كبالي تكلي اريد البشاره مال توم ، لا راحت جابت ماي تغسل لعمتي ولا اهتمت ، ضلت واكفه يمي مجتفه اديه وتكلي يله البشاره عيوني ..

نوب اندارت على عمتي الي بعدها ممطوله بالكاع .

كالت يااا بس لا المره انجلطت من الفرح ..

ردت عليها دصحيها ام مؤيد هذا لهيب منصدم خطيه ..

شالتها شيل هيه ولهيب دخلوها ، هيه بلشت تصحه وتون وتهذري خطيه ..

كعدت على تخم تعبانه ، وكفت كبالي تكلي يله يمه شبيج جحفيه ، دورقي ياايمه شجاج جن الحمزه ساطرج ..

كتلها والله اني ماشيل افلوس ابد ، روحي لهيب وكليله مايقصر ..

انتو الا الواحد يطالب ماعدكم احساس يمه ابد ، لو شهم جان نزع حتى هدومه ونطاهن الي ..

ضحكت خلفه الله عليج خاله هيج صارت ، مدهوشين ياخاله ومنا عمتي خربت ، وانتي تفكرين باكراميه ..

انداريت على لهيب وحاجيته ، دورق لام مؤيد يمعود نخرت راسي ..

هو فز ها هاا اي والله نسيتج اعذريني ، حرت بيهم ونسيتج ..

شال فلوس من جيبه وخلاهن بيدها ، حسبتهم وارتاحت ويله ضحكت ، هلهت اله و كالت دروح اسويلكم لكمه ..

نوب اندارت على عمتي ، حجت يااا ام لهيب شهل عياره دصحي جاييج توم وجنتي انتي كبل تتمنين ريحه طفل ..

عمتى مادري شنزل عليها وصحت نوب كعدت تبجي خطيه ، فرشت بالارض تبجي ولهيب حاظنها ..

اني بس صافنه ، يمكن لان اعرف راح اخلف وبيه امل ماعندي ذيج الفرحه وذيج صدمه ، عكسهم همه ، احسهم مخترعين وممصدكين ..