ابن الاجاويد

الرابع والخمسون

_٥٤_

#ابن_الاجاويد(رد الدين)

#بقلمي_أسماء_ديمير

لتين ..

لا توهموها بالوعود فترحلو ..

فلربما كتب الرحيل شتاتها ..

ولربما تبكي القلوب وتشتكي ..

ان فاتها برحيلكم مافاتها .

بالله رفقاً بقلوب فانها .. تبني على تلك الوعود حياتهااا...

مشيت بسرعه وانهزمت منه ، مالتفتت من صدمه لزمت اديه افرك بيها ، مشيت ركض للداخل ، دخلت للغرفه بهدوء حتى ماتحس عمتي ، تلفلفت بالغطا متوتره ..

كلي احبج ، كالها يالتين كامله ا ح ب ج ..

مو صعبه موو صغيره الكلمه ، لعد ليش استخصرها بيه ، مو هو شافني شلون عانيت بسببه ، كل الي كاله مايشفي كلبي ، كلمه خايف عليج ماتبرر ابد ..

اعرف الي كاله ومستوعبه انو اذا ازوجته معناها ادخل حرب ويه القريب كبل الغريب ، معناها اضل طول عمري منبوذه من اهله وناسه ..

هذا شي مو قليل ، ويمكن هو هذا الي خاف منه ، شلون مرته تنكرهه طول العمر هو مابيده شي عليهم ، الحب هم من الله قابل يزرعه بكلوبهم ..

ليش تبررين اله لتين ، هان عليج دمع عينج ذيج اليالي  ..

للصبح والله مامنت ، بس اتكلب ، كلمه وحده منه كلبتني كلب ، وكفت حتى تفكير خلت بس توتر والحيره ودكات الكلب الي ممنتظمه ..

ثاني يوم صبح ماطلعت ، ضليت حابسه نفسي ، يمكن اعاقب نفسي ، مدري اعاقبه هو ..

اسمع حسه بالصاله ، نوب يكول لعمتي لتين وين ، تكله نايمه ..

لو المحه يفتر بصف شباك الغرفه ، اغلس واضل كاعده اتفرج ، المهم مااشوفه نفسي ..

ضل تقريبا يومين  يكعد كبال شباك الغرفه توالي اليل ، هم مانفهت اله ، بس اجذب اذا اكول مااراقبه ..

لا راقبت ، بس ماطلعت ، جن كتل جعفر جاب نتيجه زينه ، خلاني اوعه جنت اسوي وشسويت كبل ..

من اصفن شكد اكره نفسي ، معقوله وكفت كباله وتوسلت بي ، عزاا اي والله ، معقوله جنت اتصرف وياه تصرفات عوجه ومااخفت ؟؟!!!

صدك عرمه على كولت عمتي ، هو ضل على هل حاله ، يوكف كبال شباك  ، معناها اني هنا اطلعي ، اخلي ايدي على خدي ، وارقب بي من وره شباك بهدوء ...

تالي بزع كام يشمر حصو صغار على شباك معناها اطلعي ...

تالي عصب ونكت نفسه وكام دخل ، معصب ويدردم ،

يومين شارده منه ماشوفته وجهي ابد ، لحد ماراح والتحق واني صفيت مثل جلب افتر وافر باذاني   ...