ابن الاجاويد

مقتطف من المستقبل

مشيت للمخزن فتحت الباب بهدوء اتلفت ، هو من فتحته الباب فزز ، دخلت بهدوء حجه بحه الالم ، حقه جسمه كله كدمات ..  هاي انتي ..

ماحجيت تقربت اشوف اديه مزنجله ..

رجعته ادور مفتاح حجه ليش جايه بهيج وقت شبيج ..

مارديت عليه ، رجعت لمينا كتلها هذا مزنجل والمفاتيح ماندله..

خرب بحظي خلي نرجع لتين عليج الله سالفه تخوف هاي من اولها ماضابطه وطلعت النه عرضه ...

فرصتنه وحيده مينا هاي ليش نضيعها عمج راح يروح برجلين ونخلص منه..

رادت تحجي نترت بيها ولي روحي انا اكمل بحدي امشي ارجعي جبانه ، يايوم صار براسج خير انتي من وره خوفج راضلين طول عمره مكفخه ، فرصه اجت ليمنه حق نستغلها ..

خايفه ولج ..

اني اكمل سالفه بس انتي راقبي الي ..عفتها ومشيت للصاله هيه كعدت بالارض ميته خوف تبجي ..

والله خاف جان عدي خوف قليل هسه حتى عضامي طكطكت من الخوف بسببها ، ابد ماتشجع او تدعم ، نوب خلتني اندم جبتها وياي وترتني ، لزمت كلاده الي جابها الي بابا طلعتها وبستها ..

كله علمودك والله اريد اخذ حقك ، اريد اخيسه بالسجون نفس ماحرمك النفس ، الا اندمه واضيع عمره بين اربع حياطين ..

هديت الكلاده  وفتحت باب صاله نايمين صوت شخير واصل للستار ..

كاظم نايم على بطنه مثل البغل ، عمي رافع تك رجل على حايط شلون نومه عوجه ..

الحب والكرزات والبطاله تارسه صاله ، تقربت رجل مرتضى الا شوي ادوس عليها مالك محط رجل من جثثهم كل واحد بكد الثور ..

تقربت من كاظم اشوف عنده مفاتيح ماكو ..

مشيت لعمي بصفه صفطه مال مفاتيح هسه ياهو منهن هذا شعرفني ..

خليت شالي على مفاتيح حتى لايطلعن صوت من اشيلهن صوت ينكتم جوه شال ، شلتهن على كيف ، وخرت بسرعه وعمي كام يحوص ..

احس دمي جمد من خوف ، والله اذا حسو عليه ، ماطلع منا الا جثه ، ومحد يندل الها اثر فوكاها ... غمضت عيوني من الارتباك ، طلعت على كيف اتلفت عليهم خاف واحد فتح عيونه وشافني ..

طلعت بسرعه لازمه كلبي، مينا لكيت وجهه داعي دم من خوف ، شبيج كبر

عبالي لزموج ولج ..